തിരുവനന്തപുരം : രാജ്യദ്രോഹക്കുറ്റത്തിനുള്ള യു.എ.പി.എ. ചുമത്തി കേസെടുക്കുന്നതില് ഭരണകക്ഷി നേതാക്കളടക്കം പ്രതിഷേധമുയര്ത്തുമ്പോള് ഇടതുസര്ക്കാര് ഈ കുറ്റം ചുമത്തിയത് 152 പേര്ക്കെതിരേയെന്ന് രേഖകള്. ഇതില് 29 പേരെ അറസ്റ്റു ചെയ്തു. മൂന്നു കേസുകള് വിചാരണയില്.
ഒമ്പതെണ്ണത്തില് അന്വേഷണം പുരോഗമിക്കുന്നു. ഇനിയും പിടിയിലാകാന് നൂറിലേറെ പേര് ബാക്കിയുണ്ട്.
രഹസ്യസ്വഭാവമുള്ള കേസുകളായതിനാല് വിശദാംശങ്ങള് വ്യക്തമാക്കാനാകില്ലെന്ന നിലപാടിലാണു സര്ക്കാര്. എന്നാല്, ദേശവിരുദ്ധ പ്രവര്ത്തനങ്ങളില് ഏര്പ്പെട്ടവര് കൂടി ഉള്പ്പെട്ടതാണ് ഈ 152 കേസുകളെന്ന് ആഭ്യന്തരവകുപ്പ് ചൂണ്ടിക്കാട്ടുന്നു. മാവോയിസ്റ്റ് ബന്ധമാരോപിച്ച് കോഴിക്കോട് പന്തീരാങ്കാവില്നിന്ന് അറസ്റ്റ് ചെയ്ത അലന് ഷുഹൈബ്, താഹ ഫസല് എന്നിവര്ക്കെതിരേ യു.എ.പി.എ. ചുമത്തിയതിനെതിര ഭരണകക്ഷിയിലെ സി.പി.ഐ. അടക്കം പ്രതിഷേധ കൊടുങ്കാറ്റുയര്ത്തിയിരുന്നു. പിന്നാലെ, രാജ്യദ്രോഹ കേസിലുള്പ്പെട്ട പ്രതികളുടെ എണ്ണം എത്രയെന്നു മഞ്ഞളാംകുഴി അലി എം.എല്.എ. നിയമസഭയില് മുഖ്യമന്ത്രിയോടു രേഖാമൂലം ആരായുകയും ചെയ്തു. എന്നാല്, പ്രതികളുടെ പേര് വെളിപ്പെടുത്താനാവില്ലെന്നായിരുന്നു മറുപടി.
സംസ്ഥാന പോലീസ് മേധാവി ലോക്നാഥ് ബഹ്റയുടെ നേതൃത്വത്തില് നടത്തിയ പരിശോധനയില് 41 യു.എ.പി.എ. കേസുകള് പുനഃപരിശോധിക്കാന് നിശ്ചയിച്ചെങ്കിലും അതും എങ്ങുമെത്തിയിട്ടില്ല. അലനും താഹയും പ്രതികളായ കേസ് ദേശീയ അന്വേഷണ ഏജന്സി ഏറ്റെടുക്കുകയും ചെയ്തു.
എസ്. നാരായണ്
