തിരുവനന്തപുരം: കേരളം പദ്മ പുരസ്ക്കാരങ്ങള്ക്കായി നല്കി 56 പേരുടെ പട്ടിക കേന്ദ്രം തള്ളി. മമ്മൂട്ടിയും എംടി വാസുദേവന് നായരും മധുവും ശോഭനയും റസൂല് പൂക്കുട്ടിയും എല്ലാം ഉള്പ്പെടുന്ന പട്ടികയില് നിന്നും ഒരാളെ പോലും പരിഗണിച്ചില്ല. എഴുത്തുകാരനും ചലച്ചിത്രകാരനുമായ എംടി വാസുദേവന് നായരെ പദ്മവിഭൂഷണ് പട്ടികയിലാണ് പെടുത്തിയത്. ഈ പട്ടിയിലുള്ള ഏകയാളും എംടിയായിരുന്നു.
സിനിമാ കലാ സാഹിത്യ സാംസ്ക്കാരിക രംഗത്തെ എട്ടുപേരെ പദ്മഭൂഷണുള്ള പട്ടികയില് ഉള്പ്പെടുത്തി. സിനിമാ രംഗത്ത് നിന്നും മമ്മൂട്ടി, മധു, ശോഭന, റസൂല് പൂക്കുട്ടി എന്നിവരും കലാമണ്ഡലം ഗോപി (കഥകളി), സുഗതകുമാരി (സാഹിത്യം), കലാരംഗത്ത് നിന്നും മട്ടന്നൂര് ശങ്കരന്കുട്ടി , പെരുവനം കുട്ടന് മാരാര് എന്നിവരുമാണ് പദ്മഭൂഷന് പട്ടികയില് ഉണ്ടായിരുന്നത്.
പത്മശ്രീയ്ക്കായി കലാരംഗത്ത് നിന്നും സൂര്യാ കൃഷ്ണമൂര്ത്തി, പെയ്ന്റിംഗില് ആര്ട്ടിസ്റ്റ് നമ്പൂതിരി ശില്പ്പകലയില് കാനായി കുഞ്ഞിരാമന്, സിനിമയില് നിന്നും കെപിഎസി ലളിത, നെടുമുടി വേണു, സംഗീതത്തില് പി ജയചന്ദ്രന്, കായിക രംഗത്ത് നിന്നും ഐഎം വിജയന്, സാമൂഹിക പ്രവര്ത്തനത്തില് ബിഷപ്പ് സൂസപാക്യം എന്നിവര് ഉള്പ്പെടെ 47 പേരെയും ശുപാര്ശ ചെയ്തിരുന്നു.
ആത്മീയാചാര്യന് ശ്രീ എം, അന്തരിച്ച നിയമപണ്ഡിതന് പ്രൊഫ് എന്ആര് മാധവമേനോന് എന്നിവര്ക്കാണ് കേന്ദ്രസര്ക്കാര് ഇക്കുറി പദ്മഭൂഷണ പ്രഖ്യാപിച്ചത്. സാമൂഹിക പ്രവര്ത്തകന് എംകെ കുഞ്ഞോള്, ശാസ്ത്രജ്ഞന് കെഎസ് മണിലാല്, എഴുത്തുകാരന് എന് ചന്ദ്രശേഖരന് നായര്, നോക്കുവിദ്യ പാവകളി കലാകാരന് എംഎസ് പങ്കജാക്ഷി എന്നിവര്ക്ക് പത്മശ്രീയും സമ്മാനിച്ചിരുന്നു.
