തിരുവനന്തപുരം: ചോദ്യപേപ്പര് ചോര്ച്ച ഉള്പ്പെടെയുള്ള വിവാദങ്ങള്ക്ക് ഇരയായ സംസ്ഥാനത്തെ ആദ്യ കെഎഎസ് പരീക്ഷയില് പാകിസ്താനില് നിന്നുള്ള ചോദ്യങ്ങള് ചോര്ത്തിയെന്ന ആരോപണവും. 2001 ല് പാകിസ്താന് സിവില് സര്വീസ് പരീക്ഷയില് ഉപയോഗിച്ച ആറ് ചോദ്യങ്ങള് കെഎഎസ് പരീക്ഷയില് ഉണ്ടായിരുന്നതായി ആരോപണം ഉന്നയിച്ച് രംഗത്ത് വന്നിരിക്കുന്നത് പിടി തോമസ് എംഎല്എയാണ്.
ഇക്കാര്യത്തില് അന്വേഷണം വേണമെന്നും അദ്ദേഹം ആവശ്യപ്പെട്ടു. പബ്ളിക് അഡ്മിനിഷ്ട്രേഷന് ചോദ്യപേപ്പറുമായി ബന്ധപ്പെട്ടാണ് ആരോപണം വന്നിരിക്കുന്നത്. കഴിഞ്ഞ ശനിയാഴ്ചയായിരുന്നു കേരളത്തില് ആദ്യമായി കേരളാ അഡ്മിനിസ്ട്രേറ്റീവ് സര്വീസ് പരീക്ഷ നടന്നത്. പരീക്ഷ കഠിനമായിരുന്നെന്നാണ് എഴുതിയ ഭൂരിപക്ഷം ഉദ്യോഗാര്ത്ഥികളും പ്രതികരിച്ചത്. ഇതിന് പിന്നാലെ ചില പരീക്ഷാ പരിശീലന കേന്ദ്രങ്ങളുടെ റാങ്ക് ഫയലിലുള്ള ചോദ്യങ്ങള് ചിലത് പരീക്ഷയില് ഉള്പ്പെടുത്തിയതായിട്ടുള്ള ആരോപണങ്ങളും ഉയര്ന്നിരുന്നു.
അതേസമയം ഈ ആക്ഷേപം പിഎസ് സി അധികൃതര് തന്നെ തള്ളിയിട്ടുണ്ട്. സിലബസ് മുന്കൂട്ടി നല്കിയിരുന്നതായും അതിന് അനുസരിച്ചുള്ള ചോദ്യങ്ങളാണ് ഉണ്ടായിരുന്നത് എന്നും സമാന ചോദ്യങ്ങള് വന്നിട്ടുണ്ടെങ്കില് യാദൃശ്ചികം ആണെന്നും പിഎസ് സി പ്രതികരിച്ചത്. പരീക്ഷയുടെ പ്രത്യേക ചോദ്യരീതി മൂന്കൂട്ടി മനസ്സിലാക്കാന് കഴിയാതെ പോയതാണ് ഈ വിവാദങ്ങള്ക്കെല്ലാം അടിസ്ഥാനമായി അവര് പറയുന്ന ന്യായീകരണം. ചോദ്യങ്ങള് പകര്ത്തിയതല്ലെന്നും പറയുന്നു. പരീക്ഷയുടെ ഉത്തരസൂചിക കഴിഞ്ഞ ദിവസം പ്രസിദ്ധീകരിച്ചിരുന്നു.
പരാതി അഞ്ചു ദിവസത്തിനകം ഉദ്യോഗാര്ത്ഥിയുടെ പ്രൊഫൈല് വഴി നല്കാനാകും. പരാതികള് പരിശോധിച്ച ശേഷമായിരിക്കും അന്തിമ ഉത്തരസൂചിക പ്രസിദ്ധീകരിക്കുക. അതിന്റെ അടിസ്ഥാനത്തിലായിരിക്കും മൂല്യനിര്ണ്ണയം നടത്തുകയെന്നും പിഎസ് സി പറഞ്ഞു.
