മെഗാസ്റ്റാര് മമ്മൂട്ടിയും സൂപ്പര്സ്റ്റാര് മോഹന്ലാലും ഒരുമിച്ച നിരവധി സിനിമകളുണ്ട്. ഇവയൊക്കെ സൂപ്പര്ഹിറ്റുകളുമായിരുന്നു. ഫാസില് സംവിധാനം ചെയ്ത് 1998-ല് തിയേറ്ററുകളിലെത്തിയ ഹരികൃഷ്ണന്സും വന് വിജയമായിരുന്നു. മോഹന്ലാല്, മമ്മൂട്ടി ബോളിവുഡ് താരസുന്ദരി ജൂഹി ചൗള എന്നിവര് ഒന്നിച്ച ചിത്രത്തില് ബോളിവുഡില് നിന്ന് മറ്റൊരു താരവും അഭിനയിച്ചിരുന്നു. മറ്റാരുമല്ല കിംങ് ഖാന് തന്നെയായിരുന്നു അത്. എന്നാല് ചിത്രത്തില് ഒരിടത്തും ഷാരൂഖ് ഖാനെ കാണാന് സാധിച്ചില്ല.
ഷാരൂഖ് ഖാന് അഭിനയിച്ചിട്ടും താരത്തെ സിനിമയില് കാണാത്തതിനെ കുറിച്ച് തുറന്നു പറയുകയാണ് ഫാസിലിപ്പോള്. '' ഹരികൃഷ്ണന്സിന്റെ ഷൂട്ടിംഗ് ഊട്ടിയിലായിരുന്നു നടന്നത്. അതെ സമയം തന്നെ ഹിന്ദി ചിത്രത്തിന്റെ ഷൂട്ടിങ്ങുമായി ബന്ധപെട്ട് ഷാരൂഖ് ഖാനും അവിടെ ഉണ്ടായിരുന്നു. തന്റെ വളരെ അടുത്ത സുഹൃത്തായ ജൂഹിയില് നിന്നു മലയാള സിനിമയുടെ സെറ്റിലെ ഹോംലി ആയ അന്തരീക്ഷത്തെ കുറിച്ച് കേട്ടറിഞ്ഞ ഷാരൂഖ് ഖാന് തനിക്കു ഇതില് ഒരു ഷോട്ട് എങ്കിലും വേണമെന്ന ആവശ്യവുമായി എത്തുകയായിരുന്നു.
എന്നാല് ഷാരൂഖിനെ എങ്ങനെ ഉള്പ്പെടുത്തുമെന്ന് യാതൊരു പിടിയുമില്ലായിരുന്നു അവസാനം ജൂഹിയുടെ നായികാ കഥാപാത്രത്തെ മോഹന്ലാലിന് ആണോ മമ്മൂട്ടിക്ക് ആണോ കിട്ടുക എന്ന കണ്ഫ്യൂഷനില് നില്ക്കുമ്പോള് ഷാരൂഖ് വന്നു ജൂഹിയുടെ കൈ പിടിച്ചു പോകുന്ന ഒരു ഷോട്ട് പ്ലാന് ചെയ്തു. എങ്കിലും കൃത്രിമത്വം തോന്നാതിരിക്കാന് അത് വേണ്ടെന്നു വെക്കുകയായിരുന്നു'' - ഫാസില് പറഞ്ഞു.
ഹരികൃഷ്ണന്സിനായി മൂന്ന് ക്ലൈമാക്സുകള് ഒരുക്കേണ്ടി വന്നതിനെ കുറിച്ചും ഫാസില് തുറന്നു പറഞ്ഞു. '' മോഹന്ലാലും മമ്മൂട്ടിയും തുല്യരായി നില്ക്കുന്ന സമയത്തു അവരെ ഒരുമിപ്പിച്ചു സിനിമയെടുക്കണം എന്ന ആഗ്രഹത്താല്, അവരോടു വളരെ സൗഹൃദം പുലര്ത്തുന്ന ആളെന്ന നിലയിലാണ് ഹരികൃഷ്ണന്സ് ഒരുക്കിയത്. എന്നാല് അത്തരമൊരു സിനിമയെടുക്കുമ്പോള് അവരില് ഒരാളെ ഞാന് കൂടുതലായി പരിഗണിച്ചു എന്നൊരു ആക്ഷേപം ഉണ്ടാകാതെയിരിക്കണം എന്നുള്ളതായിരുന്നു പ്രധാന പ്രശ്നം.
ജൂഹി ചൗള ചെയ്ത നായികാ കഥാപാത്രത്തെ അതിലെ ഏതു നായകന് കിട്ടണം. മോഹന്ലാല്, മമ്മൂട്ടീ എന്നിവരുടെ ആരാധകരെ നിരാശരാക്കുന്ന തരത്തില് അതൊരുക്കാന് സാധിക്കില്ലായിരുന്നു അപ്പോള് തോന്നിയ ഒരു കൗതുകവും കുസൃതിയും ആയിരുന്നു രണ്ടു പേര്ക്കും കിട്ടുന്നതും ആര്ക്കും കിട്ടുന്നത് കാണിക്കാത്തതുമായ ക്ലൈമാക്സുകള് ഒരുക്കിയത്. മൊത്തം മുപ്പത്തിരണ്ട് പ്രിന്റ് ഉള്ളത് കൊണ്ട് പതിനാറു പ്രിന്റില് മോഹന്ലാലിന് കിട്ടുന്നതായും പതിനാറു പ്രിന്റില് മമ്മൂട്ടിക്ക് കിട്ടുന്നതായും വെച്ചാണ് റിലീസ് ചെയ്തത്. അതൊരു കൗതുകം മാത്രമായിരുന്നു'' - ഫാസില് പറയുന്നു.
