വാഷിംഗ്ടണ് ഡിസി: കൊറോണ വൈറസിനെ പ്രതിരോധിക്കാനുള്ള വാക്സിന് കണ്ടെത്താനുള്ള നെട്ടോട്ടത്തിലാണ് അമേരിക്കന് ഗവേഷകര്. കൊറോണ സുഖപ്പെട്ടവരുടെ രക്തത്തില് നിന്ന് ആന്റിബോഡികള്, അഥവാ പ്രതിരോധാണുക്കള് ശേഖരിച്ച്, അത് രോഗികള്ക്ക് നല്കിയുള്ള പരീക്ഷണത്തിലാണ് അമേരിക്ക ഇപ്പോള്.
ഈ രീതിയിലൂടെ ചൈനയില് നിരവധി രോഗികളുടെ അസുഖലക്ഷണങ്ങള് ഭേദപ്പെട്ടെന്ന റിപ്പോര്ട്ടുകളുടെ അടിസ്ഥാനത്തിലാണ് ഒരു പ്രതിരോധവാക്സിന് കണ്ടെത്താന് ഊര്ജിതമായ ശ്രമം നടക്കുന്നത്.
ശ്രമം വിജയിക്കുകയും അത്തരത്തില് വാക്സിന് കണ്ടെത്താന് കഴിയുകയും ചെയ്താല് അത് ലോകത്തെ മുഴുവന് മുള്മുനയില് നിര്ത്തിയിരിക്കുന്ന ഒരു മഹാമാരിയ്ക്കുള്ള ഉത്തരമാകുമെന്നും അമേരിക്കയിലെ മൌണ്ട് സിനായ് ലാബ് വ്യക്തമാക്കുന്നു.
കൊറോണ വൈറസിനെ അതിജീവിച്ചവരുടെ രക്തത്തിലെ ആന്റിബോഡീസ് ഗുരുതരാസ്ഥയില് കഴിയുന്ന രോഗികള്ക്ക് 'പ്ലാസ്മാഫെറെസിസ്' എന്ന പ്രക്രിയയിലൂടെ, നല്കുന്നതാണ് ആദ്യഘട്ടം. തുടര്ന്ന് രോഗികളുടെ രോഗലക്ഷണങ്ങള് എത്രത്തോളം കുറയുന്നുവെന്ന് നിരീക്ഷിക്കും.
ചൈനയിലെ രോഗികളില് പരീക്ഷിച്ചപ്പോള് 24 മണിക്കൂറിനകം പല രോഗികളുടെയും രോഗലക്ഷണങ്ങളും ദേഹത്ത് വൈറസിന്റെ അളവും കുറഞ്ഞതായി കണ്ടെത്തിയെന്നും രക്തത്തില് ഓക്സിജന്റെ അളവ് കൂടിയെന്നും ഗവേഷകര് വ്യക്തമാക്കുന്നു.
പരീക്ഷണം വിജയിച്ചാല് ഈ ആഴ്ച മുതല്ത്തന്നെ അമേരിക്കയില് ഈ ചികിത്സാ രീതി നടപ്പാക്കിത്തുടങ്ങും. ഇതിനായി ന്യൂയോര്ക്ക് ബ്ലഡ് സെന്ററിന്റെയും മറ്റ് വിദഗ്ധ സ്ഥാപനങ്ങളുടെയും സഹായം തേടിയിരിക്കുകയാണ് മൌണ്ട് സിനായ് ലാബ്.
