നാദിര്ഷ സംവിധാനം ചെയ്ത രണ്ടാമത്തെ സിനിമ 'കട്ടപ്പനയിലെ ഋത്വിക് റോഷന്' ആണ്.
ശരാശരി വിജയം നേടിയ ഈ ചിത്രത്തെക്കുറിച്ച് തമിഴ്നാട് സിനിമാരംഗം അറിഞ്ഞതോടെ ഇതേകഥ തമിഴില് നിര്മ്മിക്കാനുള്ള ഓഫര് വന്നു. നാദിര്ഷ കൂടുതലൊന്നും ആലോചിച്ചില്ല.
ആ തമിഴ് സിനിമയുടെ സംവിധാനചുമതല ഏറ്റെടുത്തു.
തമിഴ്സിനിമയ്ക്ക് യോജ്യമായ രീതിയില് ചില മാറ്റങ്ങള് വരുത്തി പ്രസ്തുത ചിത്രം പൊള്ളാച്ചിയിലും ചെന്നൈയിലുമായി ഷൂട്ടിംഗ് നടത്തി.
ഇപ്പോള് രണ്ടുവര്ഷം കഴിഞ്ഞിരിക്കുന്നു. ചിത്രം ഇതുവരെ റിലീസ് ചെയ്തിട്ടില്ല. അതിന് കാരണം തമിഴ്നടന് അജിത്തിന്റെ ഫാന്സാണെന്നു പറഞ്ഞാല് ആരെങ്കിലും വിശ്വസിക്കുമോ?
വിശ്വസിക്കില്ല. പക്ഷേ വിശ്വസിച്ചേ മതിയാകൂ. നാദിര്ഷ ഈ ചിത്രത്തിന് 'അജിത്ത് ഫ്രം അറപ്പുകോട്ടൈ' എന്നാണ് പേരിട്ടിരുന്നത്. ആ പേര് ഇപ്പോള് കോടാലിയായി എന്നുപറഞ്ഞാല് മതിയല്ലോ.
തമിഴിലെ നായകനടന് അജിത്തിന്റെ പേരാണിതെന്നും ഈ പേരു മാറ്റണമെന്നുമാണ് അജിത്ത് ഫാന്സുകാരുടെ ആവശ്യം.
നാട്ടില് ഒരേപേരില് എത്ര ആളുകളുണ്ടാകാം. അജിത്ത് എന്ന പേര് തന്നെ എത്രയോ പേര്ക്കുണ്ടാകാം. ഈ ന്യായങ്ങളൊന്നും അവര്ക്ക് മുമ്പില് വിലപ്പോയില്ല.
അജിത്തിന് പകരം മറ്റൊരു പേരിടാന് നാദിര്ഷ തയാറുമല്ല.
നിശ്ചയിച്ച പേരുതന്നെ സിനിമയ്ക്ക് ഉപയോഗിക്കും എന്നുള്ള തീരുമാനത്തില് മാറ്റമില്ലെന്നാണ് നാദിര്ഷ പറയുന്നത്.
'കട്ടപ്പനയിലെ ഋത്വിക് റോഷനെ'ന്ന് മലയാളസിനിമയ്ക്ക് പേരിട്ടപ്പോള് ഹിന്ദി നടന് ഋത്വിക് റോഷനോ ഫാന്സുകാരോ എതിര്പ്പുമായി വന്നില്ല.
പിന്നല്ലേ അജിത്ത് എന്ന പിടിവാശിയിലാണ് നാദിര്ഷയെങ്കിലും സിനിമ റിലീസ് ചെയ്യാന് കഴിയാത്ത അവസ്ഥയിലാണ്.
സംഗതി കേസ്സായി.
അടുത്തുതന്നെ അജിത്തിന്റെ അഡ്വക്കേറ്റ് ഈ ചിത്രം കാണും. അജിത്തിനെ അവഹേളിച്ചിട്ടില്ലെന്നും അജിത്തിന് ഈ ചിത്രം യാതൊരു കുഴപ്പങ്ങളുമുണ്ടാക്കില്ലെന്നും അഡ്വക്കേറ്റ് ഉറപ്പുപറഞ്ഞാല് മാത്രമേ ഇനി ഈ സിനിമ റിലീസ് ചെയ്യൂ..അതുവരെ കാത്തിരിക്കുക.
പക്ഷെ ഒരു കാര്യമുണ്ട്. അജിത്ത് എന്നൊരു പേര് സിനിമയ്ക്കിട്ടെന്ന് കരുതി നടന് അജിത്ത് പ്രകോപിക്കേണ്ട കാര്യമുണ്ടോ? ഇങ്ങനെയൊരു പേര് സിനിമയ്ക്കിടുന്നതിന് നാദിര്ഷയ്ക്ക് അവകാശമില്ലേ?
ഒരേപേരില് എത്രയോ പേരുണ്ട്. ചെന്നൈയില് തന്നെ എത്രയോ അജിത്ത്മാരുണ്ടാകും. 'മേരാനാം ഷാജി'യിലൂടെ മൂന്ന് ഷാജിമാരുടെ കഥ പറഞ്ഞ സംവിധായകനാണ് നാദിര്ഷയെന്ന കാര്യവും ഓര്ക്കുക.
'മോഹന്ലാല്' എന്നൊരു സിനിമയും റിലീസായിരുന്നല്ലോ. നടന് മോഹന്ലാല് പ്രതിഷേധിച്ചതായി അറിവില്ല.
'പ്രേംനസീറിനെ കാണ്മാനില്ല', 'ലാല് അമേരിക്കയില്', 'സി.ഐ.ഡി.നസീര്', 'നന്മ നിറഞ്ഞവന് ശ്രീനിവാസന്', 'കഥ, സംവിധാനം കുഞ്ചാക്കോ..' എന്നു തുടങ്ങി പല പ്രമുഖ സിനിമാക്കാരുടെയും പേരില് സിനിമയിറങ്ങിയിട്ടുണ്ട്.
ഇവര് ആരും തന്നെ എതിര്പ്പുമായി രംഗത്തുവന്നതായി അറിവില്ല.? പിന്നെന്തിനാണ് അജിത്തിന്റെ തലയില് മാത്രം കൊമ്പ് മുളയ്ക്കുന്നത്..?
