തകര്പ്പന് ആക്ഷന് രംഗങ്ങളിലൂടെ മലയാളികളുടെ പ്രിയതാരമായ നടനായിരുന്നു ബാബു ആന്റണി. ഒരു ഇടവേളയ്ക്ക് ശേഷം ബിഗ്ബജറ്റ് ആക്ഷന് ചിത്രമായ പവര് സ്റ്റാറിലൂടെ തിരികെ എത്തുകയാണ് അദ്ദേഹം. ഒമര് ലുലു ആണ് ചിത്രം സംവിധാനം ചെയ്യുന്നത്. ചിലമ്പിലൂടെയാണ് താരം അഭിനയ രംഗത്ത് എത്തിയത്. തുടക്കകാലത്ത് വില്ലന് വേഷങ്ങളിലൂടെ എത്തിയ അദ്ദേഹം പിന്നീട് നടനായും തിളങ്ങി. ആ കാലഘട്ടത്തിലെ ഓര്മ്മകള് പങ്കുവെച്ചുകൊണ്ടുള്ള ഒരു ഫേസ്ബുക്ക് പോസ്റ്റാണ് ഇപ്പോള് വൈറല് ആകുന്നത്. തന്റെ ഫേസ്ബുക്ക് പേജിലൂയടെ അദ്ദേഹം തന്നെ അത് ഷെയര് ചെയ്തിട്ടുമുണ്ട്.
കുറിപ്പിങ്ങനെ;
ആക്ഷന്_രാജാവ്:#ബാബു_ആന്റണി
#ഓര്മ്മകുറിപ്പ്
ലോക്ക് ഡൗണ് കാരണം മുഴുവന് സമയവും വീട്ടിലിരിക്കുന്നതിന്റെ വിരസത മാറ്റാന് ഞാന് കൂടുതലും ആശ്രയിച്ചത് പുസ്തകങ്ങളെയും ടെലിവിഷനെയുമാണ്. കഴിഞ്ഞ ദിവസം സൂര്യ ടിവിയില് ബാബു ആന്റണി നായകനായ രാജധാനി എന്ന സിനിമ കണ്ടിരുന്നു.രാജധാനി സിനിമ കണ്ടതിന് ശേഷം കുട്ടികാലത്തെ സിനിമാ ഓര്മ്മകളെ ഞാന് റീകമ്പോസ് ചെയ്യാന് ശ്രമിച്ചു.സിനിമയുടെ കലാമൂല്യത്തെ കുറിച്ചും
സിനിമയുടെ മറ്റ് തലങ്ങളെ പറ്റിയും ഒരു ധാരണയും ഇല്ലാത്ത കാലത്ത് തിയ്യേറ്ററുകളില് പോയി സിനിമ കാണാനുളള അവസരങ്ങള് ധാരാളം ഉണ്ടായിരുന്നു.അച്ഛന്റെയും അമ്മയുടെയും കൂടെ ഞാനും ഏട്ടനും തലശ്ശേരിവരെ പോയി സിനിമ കാണാറുണ്ട്. മോഹന് ലാലിന്റെ ദൗത്യവും മൂന്നാം മുറയും കണ്ടതിന് ശേഷം ആക്ഷന് സിനിമകളോട് ചെറുപ്പത്തിലെ വലിയ ആഭിമുഖ്യമുണ്ടായിരുന്നു.
സിനിമ കണ്ട് വീട്ടിലെത്തിയാല് അതിലെ കഥാപാത്രങ്ങളെ അനുകരിച്ച് ചില ആക്ഷന് രംഗങ്ങള് ഞങ്ങള് അവതരിപ്പിക്കാറുണ്ട്. ആദ്യകാലത്ത് വില്ലനായി പ്രത്യക്ഷപെട്ട നീണ്ട് കൊലുന്നനെയുളള ആ മനുഷ്യന്റെ ആരാധകന് ആയത് 1993ല് 'ഉപ്പുകണ്ടം ബ്രദേര്സ്' എന്ന സിനിമ കണ്ടതിന് ശേഷമാണ്. സിനിമയുടെ ഇടവേളക്ക് അടുപ്പിച്ച് ബാബു ആന്റണിയെ സ്ക്രീനില് കാണിച്ചപ്പോള് കൂത്തുപറമ്പ് ഷൈല ടാക്കീസില് ഉയര്ന്ന കരഘോഷം ഇന്നും ചെവിയില് മുഴങ്ങുന്നുണ്ട്. എന്റെ തൊട്ടുത്ത സീറ്റിലിരുന്ന അച്ഛന് എന്നെ നോക്കി പറഞ്ഞു 'ഇനി പേടിക്കേണ്ട ഓന് വന്നു ഇനി എല്ലാരേം ശരിയാക്കി കൊളളും'. തൊണ്ണൂറുകളില് മലയാള സിനിമയില് നിറഞ്ഞു നിന്നത് മമ്മൂട്ടി,മോഹന് ലാല്,സുരേഷ് ഗോപി എന്നിവരായിരുന്നു. 1993മുതല് യുവാക്കളുടെ ഹൃദയത്തില് ഒരു പുതിയ താരം കടന്നു കൂടിയിരിക്കുന്നു. നീളന് മുടിയുളള…മാര്ഷ്യല് ആര്ട്സില് കറുത്ത ബെല്ട്ടുളള…ആക്ഷനില് മലയാളികള്ക്ക് പുതിയ ദൃശ്യാനുഭവം പകര്ന്നു തന്ന ബാബു ആന്റണി എന്റെയും അടുത്ത ആളായി മാറി. ഞാന് ആറാം ക്ലാസില് പഠിക്കുന്ന സമയത്താണ് മരണമെന്ന ഇരുണ്ട ഗുഹാമുഖം അച്ഛനിലൂടെ അനുഭവവേദ്യമായത്. ബാബു ആന്റണിയുടെ ആരാധകനാക്കി എന്നെ മാറ്റിയത് അച്ഛനായിരുന്നു. ഞാനും ഏട്ടനും നന്മ ശ്രീജിത്തും, കല്ലാരത്തെ നിശാന്തുമൊക്കെമുടി നീട്ടി വളര്ത്തി ബാബു ആന്റണിയോടുളള ഞങ്ങളുടെ ആരാധന പരസ്യമായി പ്രഖ്യാപിച്ചു. മുതിയങ്ങ ശങ്കരവിലാസം സ്കൂളില് പഠിക്കുന്ന കാലത്ത് നന്മ ശ്രീജിത്തിന്റെ ഗ്യാങും ഫൈസലിന്റെ ഗ്യാങും തമ്മില് പലപ്പോഴും അടി ഉണ്ടാവാറുണ്ട്. അടിയുണ്ടാവുന്ന പല ഘട്ടങ്ങളിലും കമ്പോളം സിനിമയിലെ ബാബു ആന്റണിയെ അനുകരിച്ച് കാലുയര്ത്തുകയും, മുടി പുറകിലേക്ക് കെട്ടി, ഊഫ് എന്ന ശബ്ദവും
പുറപെടുവിച്ച് എതിരാളികളുടെ മേല് ഞങ്ങള് മേല്കൈ നേടാറുണ്ട്.
