ചെന്നൈ: ലോക്ഡൗണില് മക്കള് സംരക്ഷിക്കാതായതോടെ, പോലീസ് അന്ത്യകര്മം ചെയ്യണമെന്ന് കുറിപ്പെഴുതിവെച്ചശേഷം മൂന്ന് ആണ്മക്കളുള്ള ദമ്പതികള് ജീവനൊടുക്കി. ചെന്നൈ പെരമ്പൂര് മേല്പ്പട്ടി പൊന്നപ്പന് സ്ട്രീറ്റില് താമസിക്കുന്ന ഗുണശേഖരന്(62), ഭാര്യ സെല്വി(58) എന്നിവരാണ് വീട്ടില് തൂങ്ങിമരിച്ചത്.
ഇവരുടെ ഇളയമകനായ ശ്രീധറും ഇവര്ക്കൊപ്പം താമസിച്ചിരുന്നു. സ്ഥിരം മദ്യപനായ ഇയാള് ജോലിക്കു പോകാതെ പണമാവശ്യപ്പെട്ട് മാതാപിതാക്കളോട് വഴക്കുണ്ടാക്കിയിരുന്നതായി പോലീസ് പറഞ്ഞു. സുരക്ഷാ ജീവനക്കാരനായിരുന്ന ഗുണശേഖരന് ലോക്ഡൗണ് ആരംഭിച്ചതില്പ്പിന്നെ ജോലി നഷ്ടപ്പെട്ടു. വരുമാനമില്ലാതായതോടെ ദൈനംദിന ചെലവുകള്ക്കുള്പ്പെടെ കുടുംബം കഷ്ടത്തിലായിരുന്നു. താമസിക്കുന്ന വീടിന് വാടകക്കുടിശ്ശികയുണ്ടായിരുന്നു. ശ്രീധറോ മറ്റു മക്കളോ ഇവരെ സംരക്ഷിക്കാന് തയ്യാറായതുമില്ല. അതാണ് കടുത്ത തീരുമാനമെടുക്കാന് ദമ്പതിമാരെ പ്രേരിച്ചതെന്നാണുകരുതുന്നത്.
രാത്രി വൈകി വീട്ടിലെത്തിയ ശ്രീധറാണ് മാതാപിതാക്കളുടെ മൃതശരീരം കണ്ട് അയല്ക്കാരെ വിവരമറിയിച്ചത്. നാട്ടുകാര് വിവരമറിയിച്ചതിനെത്തുടര്ന്ന് സെമ്പിയം പോലീസ് സ്ഥലത്തെത്തി മൃതദേഹങ്ങള് പോസ്റ്റ്മോര്ട്ടത്തിനയച്ചു. വീട്ടില് പരിശോധിച്ചപ്പോഴാണ് ആത്മഹത്യക്കുറിപ്പ് ലഭിച്ചത്.
