മലയാളത്തില് എക്കാലത്തും ഹിറ്റായി നില്ക്കുന്ന അപൂര്വ്വം ചില ചിത്രങ്ങളിലൊന്നാണ് ഫാസില് സംവിധാനം ചെയ്ത് 1993ല് പുറത്തിറങ്ങിയ മണിച്ചിത്രത്താഴ്. ഒരു സൈക്കോളജിക്കല് ത്രില്ലറായ ചിത്രത്തിലെ കഥ തന്നെയായിരുന്നു ശ്രദ്ധേയം. മധു മുട്ടത്തിന്റെ തിരക്കഥയില് ശോഭന, തിലകന്, മോഹന്ലാല്, സുരേഷ് ഗോപി, നെടുമുടി വേണു, വിനയ പ്രസാദ്, ഇന്നസെന്റ് എന്ന് തുടങ്ങി വന് താര നിരകൊണ്ട് തന്നെ സമ്പന്നമായിരുന്നു ഈ ചിത്രം.
മികച്ച നടിക്കും മികച്ച ജനപ്രിയ ചിത്രത്തിനും ഉള്പ്പടെ രണ്ട് ദേശീയ അവാര്ഡുകള് കരസ്ഥമാക്കിയ ചിത്രം തിയേറ്ററുകളില് വന് ഹിറ്റ് സൃഷ്ടിക്കുകയും ചെയ്തു. മണിച്ചിത്രത്താഴ് സിനിമക്കിടയില് സംഭവിച്ച ഒരു രസകരമായ സംഭവം സോഷ്യല് മീഡിയയില് വീണ്ടും വൈറലാവുകയാണ്. ചിത്രത്തിലെ ഒരു കോമഡി രംഗമാണ് കെ.പി.എ.സി ലളിതയും മോഹന്ലാലും തമ്മിലുള്ള കുളിമുറി സീന്. എന്നാല് ആ രംഗം തന്റെ അറിവോടെ എടുത്തത് അല്ലെന്നു പറഞ്ഞു ഡബ്ബിംഗ് സമയത്ത് കെ.പി.എ.സി ലളിത ദേഷ്യപ്പെട്ടതിനെ കുറിച്ച് ഫാസില് തുറന്നു പറഞ്ഞിരുന്നു.
'' ഓരോ സീനും വായിച്ച് തുടക്കം മുതലേ ഡബ്ബ് ചെയ്തുവരുകയായിരുന്നു ലളിത. ആ സമയത്താണ് കുളിമുറി സീന് ശ്രദ്ധയില്പ്പെട്ടത്. ഇതേത് സീന്? എപ്പോ എടുത്തു? ഞാനറിഞ്ഞില്ലല്ലോ. ചേച്ചി പരിഭവിക്കുകയാണോ, തമാശ പറയുകയാണോയെന്ന് സഹസംവിധായകര്ക്ക് പിടികിട്ടിയില്ല. അതോടെ ഡബ്ബിംഗ് നിര്ത്തി പിണങ്ങി ഇരുന്നു. എന്നോട് പറയാതെ എന്തിനാ എന്റെ സീന് എടുത്തത്. എല്ലാവരും കൂടെ എന്നെ ഒഴിവാക്കി, ഒളിച്ചു പോയി എന്റെ സീന് എടുത്തു അല്ലേ? ഞാന് അഭിനയിച്ചിട്ടില്ലാത്ത സീന് ഞാനെന്തിന് ഡബ്ബ് ചെയ്യണം. അപ്പോ ഡബ്ബ്ചെയ്യണമെങ്കില് അതിന് വേറെ കാശ് തരണമെന്ന് ചേച്ചി ആവശ്യപ്പെട്ടു. എന്നാല് ഈ സിനിമയില് ചേച്ചീടെ കുളിസീന് ഇടാത്തത് നല്ല കാര്യമല്ലേ? എന്ന് അസോസിയേറ്റ് സംവിധായകന് ഷാജിയുടെ ചിരി കലര്ന്ന മറുപടിയാണ് ഈ പ്രശ്നം ഒത്തു തീര്പ്പാക്കിയത്'' ഫാസില് പറയുന്നു.
