ചെന്നൈ: ഒരുകൂട്ടം കുരങ്ങുകള് കാണിച്ച കുസൃതി വിധവയായ വയോധികയുടെ മുഴുവന് സമ്പാദ്യങ്ങളും കവര്ന്നു. വയോധികയുടെ കയ്യിലുണ്ടായിരുന്ന ഭാണ്ഡം തട്ടിയെടുത്ത് ഓടിയ കുരങ്ങുകള് നഷ്ടപ്പെടുത്തിയത് അവര് ഭക്ഷണത്തിന് കരുതിയ പഴങ്ങളും അരിയും മാത്രമായിരുന്നില്ല. ഇതുവരെ സ്വരൂപിച്ചുവച്ച പണവും 25,000 രൂപയുടെ സ്വര്ണാഭരണവുമായിരുന്നു.
തമിഴ്നാട്ടിലെ തിരുവായിയൂരിലാണ് ജി ശാരദാംബാള് എന്ന 70 കാരി കുരങ്ങുകളുടെ പിടിച്ചുപറിക്ക് ഇരയായത്. ഒറ്റയ്ക്ക് താമസിച്ചിരുന്ന ഇവര് തുണി കഴുകുന്നതിന് വേണ്ടി പുറത്തേക്ക് ഇറങ്ങിയതായിരുന്നു. ഈ സമയം വീടിനുള്ളില് കയറി മോഷ്ടിച്ച കള്ളന്മാര് അവര് പഴവും അരിയും സൂക്ഷിച്ചിരുന്ന ഭാണ്ഡം അടിച്ചുമാറ്റി. അരിയ്ക്കൊപ്പമായിരുന്നു അവര് പണവും ആഭരണവും സൂക്ഷിച്ചിരുന്നത്.
സഞ്ചിയുമായി വീടിനു മുകളില് ഇരിപ്പുറപ്പിച്ച കുരങ്ങുകളെ അനുനയിപ്പിച്ച് അത് തിരിച്ചുവാങ്ങാന് നാട്ടുകാര് പഠിച്ച പണി പലതും നോക്കി. പഴം മുഴുവന് അവിടെയിരുന്ന് കഴിച്ച ശേഷം കുരങ്ങുകള് പണവും ആഭരണവും സൂക്ഷിച്ചിരുന്ന സഞ്ചിയുമായി കടന്നുകളഞ്ഞു. അവയെ പിന്നീട് കണ്ടെത്താനുമായിട്ടില്ല. ജീവിതത്തില് ഒറ്റക്കായ വൃദ്ധ വാര്ദ്ധക്യകാലത്ത് അത്യാവശ്യങ്ങള്ക്കായി സൂക്ഷിച്ചിരുന്ന സമ്പാദ്യമാണ് നഷ്ടമായത്.
ഇതോടെ കുരങ്ങുകള് നാട്ടില് ഇറങ്ങുന്നത് തടയാന് നടപടി വേണമെന്ന് നാട്ടുകാര് ആവശ്യപ്പെട്ടു. ഇതാദ്യമായല്ല കുരങ്ങ് ശല്യം നാട്ടുകാര്ക്ക് ഭീഷണിയുണ്ടാക്കുന്നത്. മേയില് കുട്ടികളുടെ മിനിയേച്ചര് ബൈക്ക് ഓടിച്ചുവന്ന ഒരു കുരങ്ങ് കുട്ടിയെ തട്ടിക്കൊണ്ടുപോകാന് ശ്രമിച്ചത് ഭീതി സൃഷ്ടിച്ചിരുന്നു. ഈ വീഡിയോ സമുഹ മാധ്യമങ്ങളില് വൈറലായിരുന്നു.
