സുശാന്ത് സിങ്ങിന്റെ മരണത്തിന് പിന്നാലെ ബോളിവുഡിലെ നെപ്പട്ടിസത്തിനെതിരായ പ്രതിഷേധം ശക്തമാവുകയാണ്. പലപ്പോഴും അതിരുകടന്ന വിമര്ശനങ്ങളായി മാറാറുണ്ട് ഈ പ്രതികരണങ്ങള്. നെപ്പോട്ടിസത്തിനെതിരെ സംസാരിക്കുന്നവര് താരകുടുംബത്തില് നിന്നുമുള്ള അഭിനേതാക്കളുടെ സിനിമകള്ക്കെതിരേയും രംഗത്ത് എത്തുകയാണ്. ഈയ്യടുത്ത് റിലീസ് ആയ ഗുഞ്ജന് സക്സേനയ്ക്കെതിരേയും വിമര്ശനവും പ്രതിഷേധവും ഉയര്ന്നിരുന്നു. ശ്രീദേവിയുടേയും ബോണി കപൂറിന്റേയും മകളായ ജാന്വി കപൂറായിരുന്നു ചിത്രത്തില് പ്രധാന വേഷത്തിലെത്തിയത്. ഇതിനെതിരെയാണ് പ്രതിഷേധം ഉയര്ന്നത്.
എന്നാല് താന് ഈ വിമര്ശനങ്ങള് ഇന്നും ഇന്നലെയും കേള്ക്കാന് തുടങ്ങിയതല്ലെന്നാണ് ജാന്വി പറയുന്നത്. 2018 ല് ദഡക്കിലൂടെ അരങ്ങേറിയത് മുതല് താനിത് കേള്ക്കുന്നതാണെന്ന് ജാന്വി പറയുന്നു. ഈ വിമര്ശനങ്ങളാണ് കൂടുതല് നന്നാകാന് തനിക്കുള്ള പ്രചോദനമെന്നും ജാന്വി പറഞ്ഞു.
''ആദ്യ സിനിമ റീലിസ് ചെയ്തപ്പോള് ഇത് കാണാന് നിന്റെ അമ്മ ഇല്ലാതിരുന്നത് നന്നായി എന്നുവരെ പറഞ്ഞിട്ടുണ്ട്. ഇതൊന്നും എന്നെ ബാധിക്കാന് സമ്മതിക്കില്ല. എല്ലാം ശരിയാണെന്ന് കരുതിയൊരു കുമിളയ്ക്കുള്ളില് കഴിയാനല്ല, മറിച്ച് ഓരോ ദിവസവും സ്വയം മെച്ചപ്പെടാനുള്ള അവസരമായാണ് ഈ വിമര്ശനങ്ങളെ കാണുന്നത്'' ജാന്വി പറഞ്ഞു.
ജാന്വിയുടെ അമ്മയും നടിയുമായ ശ്രീദേവി 2018 ലായിരുന്നു മരിക്കുന്നത്. ജാന്വിയുടെ ആദ്യ സിനിമ റിലീസ് ആകുന്നതിന് മാസങ്ങള് മുമ്പായിരുന്നു ശ്രീദേവിയുടെ മരണം. ദഡക്ക് ആയിരുന്നു ജാന്വിയുടെ ആദ്യ സിനിമ. അരങ്ങേറ്റത്തില് ജാന്വി ശ്രദ്ധിക്കപ്പെട്ടിരുന്നു.
നെറ്റ്ഫ്ലിക്സിലൂടെ പ്രേക്ഷകരിലേക്കെത്തിയ ഗുഞ്ജന് സക്സേനയാണ് ജാന്വിയുടെ പുതിയ ചിത്രം. സിനിമയില് ഇന്ത്യന് വ്യോമസേനയെ മോശമായി ചിത്രീകരിക്കുന്നുവെന്ന വിമര്ശനം ശക്തമാണ്. അതേസമയം ജാന്വിയുടെ പ്രകടനം ശ്രദ്ധിക്കപ്പെട്ടിരുന്നു. പങ്കജ് ത്രിപാഠിയാണ് ചിത്രത്തിലെ മറ്റൊരു പ്രധാന വേഷത്തിലെത്തുന്നത്.
