''രക്തസാക്ഷി ചെന് സിയാന് ഗ്രോംഗഗിന്റെ ശവകുടീരം, ചൈനീസ് പീപ്പിള്സ് ലിബറേഷന് ആര്മിയുടെ 13 ാം റെജിമെന്റിലെ ദക്ഷിണ സിംഗ്ജിയാന് മിലിറ്ററി ജില്ലയില് നിന്നുള്ള 69316 ാം യൂണിറ്റിലെ സൈനികന് ഇവിടെ അന്ത്യ വിശ്രമം കൊള്ളുന്നു. ചൈനയിലെ ഫ്യുജിയാന് പ്രവിശയയിലെ പിംഗ്നാന് കൗണ്ടിയില് 2001 ഡിസംബറില് ജനിച്ച ഇദ്ദേഹം 2020 ജൂണില് അതിര്ത്തി പ്രതിരോധത്തിനിടയില് ഇന്ത്യയുമായുള്ള പോരാട്ടത്തില് ജീവന് ബലിയര്പ്പിച്ചു.''
ഗല്വാന് താഴ്വാരത്ത് എത്ര ചൈനീസ് സൈനികര് കൊല്ലപ്പെട്ടു എന്ന ഇന്ത്യാക്കാരുടെ സംശയത്തിന് മറുപടിയുമായി വെയ്ബോയില് പ്രത്യക്ഷപ്പെട്ട സൈനികന്റെ ശവകുടീരത്തിന്റെ ചിത്രത്തില് മന്ഡാരിന് ഭാഷയില് ആലേഖനം ചെയ്യപ്പെട്ടിരിക്കുന്ന വാക്കുകളാണ് ഇത്. മാസങ്ങള്ക്ക് മുമ്പ് ലഡാക്കില് ഇന്ത്യയുടേയും ചൈനയുടേയും സൈനികര് തമ്മില് നടത്തിയ പേരാട്ടത്തില് ചൈന വായ മൂടിക്കെട്ടിയിരിക്കുകയാണെങ്കിലും അവര്ക്കും ഉണ്ടായത് വന് നഷ്ടം ആണെന്ന സൂചന നല്കുന്നതാണ് ചിത്രം. ഗല്വാന് താഴ്വാരത്ത് ഇന്ത്യന് സൈന്യവുമായുള്ള പോരാട്ടത്തില് കൊല്ലപ്പെട്ട ചെന് സിയാന് ഗ്രോംഗിന്റെ ശവകുടീരത്തിന്റെ ചില ദൃശ്യങ്ങള് സോഷ്യല് മീഡിയയില് പ്രചരിച്ചു തുടങ്ങിയിട്ടുണ്ട്.
ജൂണ് 14 നും 15 നും ഇടയിലെ രാത്രിയിലായിരുന്നു ഇന്ത്യയൂടേയും ചൈനയുടേയും സൈനികര് തമ്മില് ഏറ്റുമുട്ടിയത്. ഇതില് തങ്ങളുടെ 20 സൈനികര്ക്ക് ജീവന് നഷ്ടമായതിന്റെ വിവരം ഇന്ത്യ പുറത്തു വിട്ടിരുന്നെങ്കിലും ചൈന ഇത്തരത്തില് ഒരു കാര്യവും ഔദേ്യാഗികമായി പുറത്തുവിടാന് കൂട്ടാക്കിയിരുന്നില്ല. എതിരാളികള്ക്ക് ഉണ്ടായ നഷ്ടത്തെക്കുറിച്ച് ഇന്ത്യന് സൈന്യവും ഔദ്യോഗികമായി ഇതുവരെ പ്രതികരിച്ചിരുന്നില്ല. അതിനിടയിലാണ് ചൈനീസ് ലിബറേഷന് ആര്മിയിലെ 19 കാരന്റെ ശവകുടീരത്തിന്റെ ദൃശ്യങ്ങള് ചൈനീസ് സാമൂഹ്യ മാധ്യമമായ വെയ്ബോയിലൂടെ പുറത്തു വന്നത്.
പൂര്ണ്ണമായും ചൈനീസ് ഭാഷയായ മന്ഡാരിനിലാണ് ശവ കുടീരത്തിലെ കുറിപ്പുകള്. ഇതിലെ വാക്കുകള് ഇന്ത്യയ്ക്കൊപ്പം തന്നെ ചൈനയ്ക്കും വലിയ നഷ്ടമുണ്ടാക്കി എന്നതിന്റെ സൂചനയായിട്ടാണ് വിലയിരുത്തല്. അക്സായി ചിന് ഉള്പ്പെടുന്ന ലഡാക്കില് നിന്നുള്ള ചൈനീസ് അതിര്ത്തി നിരീക്ഷണം നടത്തുന്നത് സതേണ് സിയാന്ജിംഗ് മിലിട്ടറി ഡിസ്ട്രിക്ടാണ്. ഗല്വാന് നദിയുടെ തെക്കു ഭാഗത്ത് വെച്ചായിരുന്നു ഇരു രാജ്യത്തെയും സൈനികര് തമ്മില് ഏറ്റുമുട്ടിയത്.
രണ്ടു ഭാഗത്തും വലിയ നഷ്ടം സംഭവിച്ചെന്നായിരുന്നു ഇന്ത്യന് സൈന്യം അന്ന് പ്രതികരിച്ചത്. ഇന്ത്യയ്ക്ക് 20 സൈനികരെ നഷ്ടമാകുകയും ചെയ്തു. എന്നാല് ചൈനയുടെ ഭാഗത്ത് എത്ര മരണം ഉണ്ടായി എന്നത് സംബന്ധിച്ച ഒരു വിവരവും ഇതുവരെ പുറത്തുവന്നിട്ടില്ല. ഇക്കാര്യത്തില് ചൈനയുടെ സൈന്യമായ പീപ്പിള്സ് ലിബറേഷന് ആര്മിയും ഒരക്ഷരം മിണ്ടിയിട്ടില്ല. എന്നാല് ഫോട്ടോ പ്രചരിക്കാന് തുടങ്ങിയതോടെ എന്തുകൊണ്ടാണ് ചൈന മരണം ഔദ്യോഗികമായി റിപ്പോര്ട്ട് ചെയ്യാത്തത് എന്ന രീതിയില് വെയ്ബോയില് ചര്ച്ചയും തുടങ്ങിയിട്ടണ്ട്. ഇപ്പോള് പ്രചരിക്കുന്ന ചിത്രം മോര്ഫ് ചെയ്യപ്പെട്ടതാണ് എന്ന രീതിയിലുള്ള പ്രചരണവും നടക്കുന്നുണ്ട്.
