കോട്ടയം: കൊവിഡ് സാഹചര്യത്തില് അഭിഭാഷകര്ക്ക് അടക്കം കോടതിയില് ഹാജരാകാന് പ്രയാസമുണ്ടെന്ന കാര്യം ഉള്പ്പെടെ ചൂണ്ടക്കാട്ടി കന്യാസ്ത്രീയെ ബലാത്സംഗം ചെയ്ത കേസിലെ വിചാരണ നിര്ത്തി വയ്ക്കണമെന്ന് ആവശ്യപ്പെട്ട് ബിഷപ് ഫ്രാങ്കോ മുളയ്ക്കല് നല്കിയ ഹര്ജി ഹൈക്കോടതി ഇന്ന് പരിഗണിക്കും.
കുറുവിലങ്ങാട് മഠത്തില് വച്ച് 2014 മുതല് 2016 വരെയുള്ള കാലയളവില് ബിഷപ്പ്ഫ്രാങ്കോ മുളക്കല് കന്യാസ്ത്രീ ബലാത്സംഗം ചെയ്തെന്നാണ് കേസ്. ബലാത്സംഗം, അന്യായമായി തടവില് വയ്ക്കല്, അധികാരം ഉപയോഗിച്ച് സ്ത്രീയെ ലൈംഗികമായി പീഡിപ്പിക്കല് ഉള്പ്പടെ ആറു വകുപ്പുകളാണ് ബിഷപ്പിനെതിരെ ചുമത്തിയിരിക്കുന്നത്. ഒരു വര്ഷം മുന്പാണ് കേസില് കുറ്റപത്രം സമര്പ്പിച്ചത്. മൂന്ന് ബിഷപ്പുമാരും 11 വൈദികരും 24 കന്യാസ്ത്രീകളും ഉള്പ്പടെ 83 സാക്ഷികളാണ് കേസിലുള്ളത്.
2018 ജൂണ് 27 നാണ് കന്യാസ്ത്രീ പരാതി നല്കിയത്. തുടര്ന്ന് സെപ്റ്റംബര് 16 നാണ് കോട്ടയം അഡീഷണല് സെഷന്സ് കോടതിയില് ബലാത്സംഗക്കേസില് വിചാരണ തുടങ്ങിയത്. ഇതിന് പിന്നാലെ വൈക്കം ഡിവൈഎസ്പി ആയിരുന്ന കെ സുഭാഷിന്റെ നേതൃത്വത്തിലൂള്ള അന്വേഷണ സംഘം വിവിധ സംസ്ഥാനങ്ങളിലായി നാലു മാസത്തോളം വിശദമായ അന്വേഷണം നടത്തിയാണ് ബിഷപ്പ് ഫ്രാങ്കോയെ അറസ്റ്റ് ചെയ്തത്.
