കാസര്ഗോഡ്: ഫാഷന് ഗോള്ഡ് നിക്ഷേപ തട്ടിപ്പില് എം.സി കമറുദീന് എം.എല്.എയെ മുസ്ലീം ലീഗ് നേതൃത്വം കൈവിടുന്നു. ജ്വല്ലറിയുടെ ആസ്തി വിറ്റ് നിക്ഷേപകര്ക്ക് പണം നല്കാനാകില്ലെന്ന് വ്യക്തമായതോടെയാണ് കമറീദിനെ ലീഗ് നേതൃത്വം കൈവിടുന്നത്. ജ്വല്ലറിയുടെ കേരളത്തിലെയും കര്ണാടകയിലെ ആസ്തികളില് ഭൂരിഭാഗവും വിറ്റ് പണമാക്കി മാറ്റിയതായി അന്വേഷണ സംഘം കണ്ടെത്തി.
ഇതോടെ കമറുദീന് ഒറ്റയ്ക്ക് ഉത്തരവാദിത്തം ഏറ്റെടുക്കട്ടെ എന്ന നിലപാടിലാണ് മുസ്ലീം ലീഗ് നേതൃത്വം. ലീഗ് നിയോഗിച്ച മധ്യസ്ഥന് ഇത് സംബന്ധിച്ച് സംസ്ഥാന നേതൃത്വത്തിന് കത്ത് നല്കി. നേരത്തെ ആസ്തി വിറ്റ് നിക്ഷേപകര്ക്ക് പണം നല്കാന് ലീഗ് നേതൃത്വം കമറുദീന് ആറ് മാസത്തെ സമയം അനുവദിച്ചിരുന്നു. എന്നാല് ആസ്തികള് ഇതിനകം വിറ്റഴിച്ചതിനാല് ഇനി നിക്ഷേപകര്ക്ക് പണം ലഭിക്കാനുള്ള വഴികള് അടഞ്ഞിരിക്കുകയാണ്.
നിക്ഷേപകരില് നിന്ന് വാങ്ങിയ പത്ത് കോടി രൂപയ്ക്ക് എം.സി കമറുദീനും പൂക്കോയ തങ്ങളും ബംഗളുരുവില് ഇലക്ട്രോണിക് സിറ്റിയില് ഭൂമി വാ്ങ്ങിയതായി അന്വേഷണ സംഘം കണ്ടെത്തിയിരുന്നു. ഭൂമി വാങ്ങിയത് കമ്പനി രജിസ്റ്ററില് ഇല്ലെന്നും ഭൂമി വാങ്ങിയത് അനധികൃത സ്വത്ത് ഇടപാടാണെന്നും അന്വേഷണ സംഘം കണ്ടെത്തിയിട്ടുണ്ട്. ഇതില് ഒരു ഭാഗം വിറ്റതായും കണ്ടെത്തി.
ഇതിനിടെ നിക്ഷേപത്തട്ടിപ്പില് എം.സി കമറുദീനെതിരെ ഒരു കേസ് കൂടി രജിസ്റ്റര് ചെയ്തിട്ടുണ്ട്. ഇതോടെ ആകെ കേസുകളുടെ എണ്ണം 95 ആയി. മൂന്ന് പേരില് നിന്നായി 36 ലക്ഷം രൂപ തട്ടിയെടുത്തെന്ന പരാതിയിലാണ് പുതിയ കേസ് രജിസ്റ്റര് ചെയ്തിരിക്കുന്നത്. നിക്ഷേപത്തിന്െ്റ പേരില് നൂറ് കോടിയിലേറെ രൂപയുടെ തട്ടിപ്പാണ് നടന്നിരിക്കുന്നത്.
