കോട്ടയം: വാര്ഡുകളില് പോലും ഒരു വനിതയെ കിട്ടാനില്ല, അപ്പോള് പ്രസിഡന്റ് സ്ഥാനവും വനിതാ സംവരണമാണെങ്കിലോ?. സംവരണ പഞ്ചായത്തുകള് പ്രഖ്യാപിച്ചതോടെ വനിതകള്ക്കായി ഓട്ടം തുടങ്ങിയിരിക്കുകയാണ് മുന്നണികള്. ആകെയുള്ള 71 പഞ്ചായത്തുകളില് 36 സ്ഥലങ്ങളിലും ഇത്തവണ വനിതകള് ഭരിക്കും.
ജില്ലാ പഞ്ചായത്തും ആറു നഗരസഭകളില് അഞ്ചെണ്ണവും അടുത്ത അഞ്ചു വര്ഷം നയിക്കുക വനിതകള്. ഇതിനു പുറമേ, ജില്ലയിലെ മൂന്നു പഞ്ചായത്തുകളില് പട്ടികജാതി വിഭാഗത്തിലുള്ള പ്രസിഡന്റുമാരും ഭരണതലപ്പതെത്തും. 11 ബ്ലോക്ക് പഞ്ചായത്തുകളില് അഞ്ചിടത്ത് വനിതകള് അധ്യക്ഷരാകും. 71 ഗ്രാമപഞ്ചായത്തുകളില് 36 ഇടങ്ങളില് വനിതകള് പ്രസിഡന്റ് പദവിയിലെത്തും. ഇതില് രണ്ട് പഞ്ചായത്തുകളില് പട്ടികജാതി വനിതയും ഒരു പഞ്ചായത്തില് പട്ടികവര്ഗ വനിതയ്ക്കുമാണ് അധ്യക്ഷ പദവി.
ഭരണം ഉറപ്പെന്നു കരുതുന്ന പഞ്ചായത്തുകളില് പ്രസിഡന്റ് സ്ഥാനം വനിതയ്ക്കായതോടെയാണു പല മുന്നണികളും സ്ഥാനാര്ഥി ദാരിദ്ര്യത്താല് ബുദ്ധിമുട്ടുന്നത്. വര്ഷങ്ങളായി പ്രവര്ത്തിച്ചു പരിചയമുള്ള നിരവധി പുരുഷ മെമ്പര്മാര് ഇത്തവണയും ജയിച്ചു വരുമെങ്കിലും അവരെ നയിക്കാന് കെല്പ്പുള്ള വനിതാ സ്ഥാനാര്ഥികള് പല പഞ്ചായത്തുകളിലും ഇല്ലെന്നാണു മുന്നണികളുടെ പരാതി. തദ്ദേശസ്ഥാനപങ്ങളില് 33 ശതമാനം വനിതാ സംവരണം ഏര്പ്പെടുത്തിയതു മുതല് ആരംഭിച്ചതാണു മുന്നണികളുടെ പ്രശ്നം.
തെരഞ്ഞെടുപ്പു ഒക്ടോബറിലും ഉണ്ടാകുമെന്ന ധാരണയില് മുന്നണികള് സ്ഥാനാര്ഥികള്ക്കായി ചര്ച്ച ആരംഭിച്ചിരുന്നുവെങ്കിലും ജില്ലയില് ഭൂരിഭാഗം പഞ്ചായത്തുകളിലും വനിതകള് മത്സരിക്കുന്ന വാര്ഡുകളില് മൂന്നു മുന്നണികള്ക്കും ഇതുവരെ പാര്ട്ടികള്ക്ക് അനുയോജ്യമായ സ്ഥാനാര്ഥിയെ കണ്ടെത്താന് കഴിഞ്ഞിട്ടില്ല. സജീവ രാഷ്ട്രീയത്തിലുള്ള സ്ത്രീകള് കുറവായതിനാല്, രാഷ്ട്രീയക്കാരുടെ ഭാര്യമാരെ നിര്ബന്ധിച്ചു മത്സരിപ്പിക്കുന്ന രീതിയാണു മിക്കയിടത്തും തുടരുന്നത്. വാര്ഡ് നഷ്ടപ്പെടാതിരിക്കാന് ഒരു തവണത്തേക്കു ആരെയെങ്കിലുമൊക്കി നിര്ത്തുകയാണു പതിവ്. ഇത്തരത്തിലുണ്ടാകുന്ന ''നിര്ബന്ധിത സ്ഥാനാര്ഥികളില്'' പലരെയും കൊണ്ടു വാര്ഡിന് ഒരു പ്രയോജനവുമുണ്ടാകില്ലെന്നതാണു വസ്തുത.
രാഷ്ട്രീയക്കാരുടെ ഭാര്യമാര് കഴിഞ്ഞാല്, പൊതുപ്രവര്ത്തകര്, എല്.ഐ.സി. ഏജന്റുമാര്, അധ്യാപികമാര്, അഭിഭാഷകര് എന്നിങ്ങനെയുള്ള വനിതകള്ക്കാണു മുന്നണികള് പ്രാധാന്യം നല്കുന്നത്. ആശ, കുടുംബശ്രീ പ്രവര്ത്തകരെയും സ്ഥാനാര്ഥിയാക്കാന് നെട്ടോട്ടമോടുന്ന മുന്നണികളുമുണ്ട്. പക്ഷേ, ഭര്ത്താക്കന്മാരും മക്കളും സമ്മതിക്കില്ലെന്നതിനാല് ഇങ്ങനെയുള്ള ഓപ്പറേഷന് പല സ്ഥലങ്ങളിലും വിജയിക്കുന്നില്ല. ഇത്തരത്തില്, സ്ഥാനാര്ഥി ദൗലഭ്യം നേരിടുന്നതിനിടെയാണു ജില്ലയില് അപ്രതീക്ഷിതമായി ചില പഞ്ചായത്തുകള് പട്ടിക ജാതി വനിതാ സംവരണവും മറ്റും ആക്കിയിരിക്കുന്നത്. കഴിഞ്ഞ തവണ പ്രസിഡന്റ് വനിതാ സംവരണമായിരുന്ന ചില പഞ്ചായത്തുകളില് ഇത്തവണ പ്രസിഡന്റ് സ്ഥാനം പട്ടിക ജാതി വനിതാ സംവരണമായതോടെ പ്രസിഡന്റ് സ്ഥാനം മോഹിച്ചു പണിയെടുത്തവരെല്ലാം മൗനത്തിലാണ്.
വിജയപുരം പഞ്ചായത്തില് ഇത്തരത്തില് പ്രസിഡന്റ് സ്ഥാനം മോഹിച്ച ഒന്നിലേറെ പേരാണ് ഞെട്ടിയിരിക്കുന്നത്. തദ്ദേശ തെരഞ്ഞെടുപ്പിന്റെ ഭാഗമായു സംവരണ പഞ്ചായത്തുകളും നഗരസഭകളും പ്രഖ്യാപിച്ചതോടെ രാഷ്ട്രീയ ചിത്രം കൂടുതല് വ്യക്തമായി. ജില്ലാ പഞ്ചായത്ത് അധ്യക്ഷ സ്ഥാനം ഇത്തവണ വനിതാ സംവരണമാണ്. നഗരസഭകളില് നിലവില് വനിതാ സംവരണമായ പാലായില് മാത്രമാണ് ജനറല് വിഭാഗത്തിന് പ്രസിഡന്റ് സ്ഥാനം. കഴിഞ്ഞതവണ പട്ടികജാതി സംവരണമായിരുന്ന കോട്ടയം നഗരസഭ ഇത്തവണ വനിതയായി.
മാറിയ രാഷ്ട്രീയ സാഹചര്യത്തില് ജില്ലാ പഞ്ചായത്ത് ഭരണം പിടിച്ചെടുക്കാന് ഇരുമുന്നണികളും കഠിന പ്രയത്നത്തിലാണ്. ജില്ലാ പഞ്ചായത്ത് പ്രസിഡന്് പദം വനിതാകുമെന്ന സൂചനയുണ്ടായിരുന്നതിനാല് നേരത്തേതന്നെ ഇത് കണക്കിലെടുത്തായിരുന്നു സ്ഥാനാര്ഥി ചര്ച്ചകള് പുരോഗമിച്ചിരുന്നത്. യു.ഡി.എഫിലും എല്.ഡി.എഫിലും മുന് ജില്ലാ പഞ്ചായത്തു പ്രസിഡന്റുമാരായിരുന്ന വനിതകള് ഇത്തവണ മത്സരരംഗത്തുണ്ടാകും.
