കൊച്ചി: പുതുവത്സരാഘോഷം പൊടിപൊടിക്കാന് അതിര്ത്തിമേഖലകള് കേന്ദ്രീകരിച്ചുള്ള റിസോര്ട്ടുകളിലും ഹോംസ്റ്റേകളിലും "റേവ് പാര്ട്ടി" എന്ന ലഹരിവിരുന്നുകള്ക്ക് ഒരുക്കം തകൃതി. കഴിഞ്ഞയാഴ്ച വാഗമണിലെ ലഹരിവിരുന്ന് പിടികൂടിയതിനേത്തുടര്ന്നുള്ള അന്വേഷണത്തിലാണു ഞെട്ടിക്കുന്ന വിവരം ലഭിച്ചത്. ഇതു മുന്കൂട്ടി തടയാനുള്ള നീക്കത്തിലാണു പോലീസും എക്സൈസും.
കോവിഡ് പ്രതിസന്ധിയില് സിനിമാ-സീരിയല് മേഖലയിലെ തൊഴില്നഷ്ടം ചൂഷണം ചെയ്താണ് റേവ് പാര്ട്ടികള് ഒരുങ്ങുന്നത്. ഇത്തരക്കാരെ കാരിയര്മാരോ സംഘാടകരോ ആക്കിയാണ് ആളുകളെ ആകര്ഷിക്കുന്നത്. മോഡലുകള്, ചലച്ചിത്രമേഖലയിലെ ചില രണ്ടാംനിര ആര്ട്ടിസ്റ്റുകള്, മേക്കപ്പ് അനുബന്ധ പ്രവര്ത്തനങ്ങള് നടത്തുന്നവര് എന്നിവരാണു വിരുന്നുകള്ക്കു രൂപരേഖ നല്കുന്നത്.
വാഗമണ് ലഹരിവിരുന്നില് ഒരു യുവ സിനിമാ നടി പങ്കെടുക്കേണ്ടതായിരുന്നു. ചലച്ചിത്രമേഖലയിലുള്ള മൂന്നുപേരുടെ പിറന്നാള് ഒന്നിച്ച് ആഘോഷിക്കാനാണു വിരുന്നൊരുക്കിയത്. എന്നാല്, നര്കോട്ടിക്സ് വിഭാഗത്തിന്റെ നിരീക്ഷണം മുന്കൂട്ടിയറിഞ്ഞ നടി മുങ്ങി. പിടിയിലായ തൃപ്പൂണിത്തുറ സ്വദേശി മോഡലില്നിന്നുള്ളവിവരമനുസരിച്ച് കൊച്ചിയാണു റേവ് പാര്ട്ടികളുടെ പ്രഭവകേന്ദ്രം. ഗോവ, ബംഗളുരു എന്നിവിടങ്ങളില്നിന്നാണു ലഹരിമരുന്നുകള് എത്തുന്നത്. പരിശോധന കര്ശനമായതോടെ കൊച്ചിയിലെ റിസോര്ട്ടുകളില്നിന്നു റേവ് പാര്ട്ടികള് ഫ്ളാറ്റുകളിലേക്കു മാറി.
കോവിഡ് വ്യാപനം രൂക്ഷമായി തുടരുന്ന സാഹചര്യത്തിലും പൂവാറില് കഴിഞ്ഞദിവസം നിയമങ്ങള്ക്ക് യാതൊരു വിലയും കല്പ്പിക്കാതെ പൊഴിയൂരില് ഒരു സംഘം യുവാക്കള് ഡി.ജെ പാര്ട്ടി ഒരുക്കി ആടി തകര്ത്തു. മാസ്ക് ധരിക്കാതെ ഡാന്സ് ചെയ്തും പരസ്പരം ആശ്ലേഷിച്ചും കൂകി വിളിച്ചും തുള്ളിച്ചാടി അട്ടഹസിച്ചപ്പോള് നിയമങ്ങളൊക്കെ അടിയറവു പറഞ്ഞു എന്നതാണ് നാട്ടുകാരുടെ പരാതി. പരിമിതികളുടെ പരാധീനതയില് പൊഴിയൂര് പോലീസിന് ഇതൊക്കെ നിര്വികാരതയോടെ കണ്ടു നില്ക്കാനേ കഴിഞ്ഞുള്ളു.
