ലക്നൗ: മാധ്യമപ്രവര്ത്തകന് സിദ്ദീഖ് കാപ്പന് ഉള്പ്പെടെ അഞ്ചു പേര്ക്കെതിരേ എന്ഫോഴ്സ്മെന്റ് ഡയറക്ട്രേറ്റ് കുറ്റപത്രം. രാജ്യദ്രോഹ പ്രവര്ത്തനങ്ങള്ക്ക് അനധികൃത മാര്ഗ്ഗത്തിലൂടെ പണ സമാഹരണം നടത്തിയെന്ന് ആരോപിച്ചാണ് കേസ്. ലക്നൗ പ്രത്യേക കോടതിയില് ആദ്യ കുറ്റപത്രം സമര്പ്പിച്ചു. പോപ്പുലര്ഫ്രണ്ടിനും അവരുടെ വിദ്യാര്ത്ഥി വിഭാഗമായ കാമ്പസ് ഫ്രണ്ടിനെതിരേയും കേസെടുത്തിട്ടുണ്ട്. വിദേശരാജ്യങ്ങളില് നിന്നുള്ള കള്ളപ്പണം വെളുപ്പിക്കുന്നതിനായി സംഘടന ശ്രമിച്ചെന്നും പറയുന്നു.
കാമ്പസ് ഫ്രണ്ട് ദേശീയ ജനറല് സെക്രട്ടറി കെ.എ. റൗഫ് ശരീഫ്, ട്രഷറര് അതീഖുറഹ്മാന്, ഡല്ഹി കാമ്പസ് ഫ്രണ്ട് ജനറല് സെക്രട്ടറി മസൂദ് അഹ്മദ്, മുഹമ്മദ് ആലം, എന്നിവരുടെ പേരാണ് കാപ്പനൊപ്പം കുറ്റപത്രത്തിലുള്ളത്. മാര്ച്ച് 18ന് ഹാജരാകണമെന്ന് കാണിച്ച് കോടതി സമന്സ് അയച്ചു. കഴിഞ്ഞ വര്ഷം ഉണ്ടായ ഹത്രാസ കൂട്ടബലാത്സംഗക്കേസില് കലാപം സൃഷ്ടിക്കാനായി പോകുമ്പോഴാണ് അഞ്ചു പേരില് നാലു പേരും അറസ്റ്റിലായതെന്നും കാമ്പസ് ഫ്രണ്ട് ദേശീയ ജനറല് സെക്രട്ടറി കെ.എ. റൗഫ് ധനസമാഹരണം നടത്തിയെന്നുമാണ് കുറ്റപത്രത്തില് പറഞ്ഞിരിക്കുന്നത്. കഴിഞ്ഞ വര്ഷം ഡല്ഹിയില് നടന്ന പൗരത്വഭേദഗതി നിയമത്തിനെതിരേ നടന്ന സമരത്തിനായി ധനസമാഹരണം നടത്തിയെന്ന ആരോപണത്തില് പോപ്പുലര് ഫ്രണ്ടിന്റെ പങ്ക് ഇ ഡി അന്വേഷിക്കുന്നുണ്ട്.
ഇതുവരെ പോപ്പുലര് ഫ്രണ്ടിന്റെ അക്കൗണ്ടിലേക്ക് വിദേശത്ത് നിന്നും 100 കോടി രൂപയെങ്കിലും എത്തിയിട്ടുണ്ടെന്നും ഇതില് നിന്നുള്ള പണം കൊണ്ടാണ് ഹത്രാസിലും കലാപത്തിന് ശ്രമം നടത്തിയതെന്നും ആരോപണത്തില് പറയുന്നു. പണവുമായി ബന്ധപ്പെട്ട അന്വേഷണം നടക്കുകയാണെന്നും എല്ലാറ്റിനും വ്യക്തമായ തെളിവുകള് ഉണ്ടെന്നും കുറ്റപത്രം പറയുന്നു. ഹവാല, മറ്റ് നിയമവിരുദ്ധ പ്രവര്ത്തനങ്ങള് പോപ്പുലര് ഫ്രണ്ടുമായി ബന്ധപ്പെട്ട സംഘടനകളുടെ ബാങ്ക് അക്കൗണ്ടുകള് എന്നിവ വഴിയാണ് രാജ്യത്തേക്ക പണം എത്തുന്നതെന്നും കുറ്റപത്രത്തില് പറയുന്നു.
കുടുംബാംഗങ്ങളുടെ ബാങ്ക് അക്കൗണ്ടുകള് അവരറിയാതെ ഉപയോഗിച്ച് കള്ളപ്പണം വെളുപ്പിക്കല് സംഘടന നടത്തി എന്നാണ് കുറ്റപത്രത്തിലെ ആരോപണം. പ്രവര്ത്തകര് വിവിധയിടങ്ങളില് ഭൂമി വാങ്ങിയിട്ടുള്ളത് പോലും കള്ളപ്പണം വെളുപ്പിക്കലിന്റെ ഭാഗമാണെന്നാണ് കുറ്റപത്രത്തില് ആരോപിച്ചിരിക്കുന്നത്. വ്യാപാര ആവശ്യങ്ങള്ക്കെന്ന വ്യാജേനയാണ് ഗള്ഫില് നിന്നും കള്ളപ്പണം എത്തിച്ചത് എന്നാണ് ഇഡിയുടെ വാദം.
