തിരുവനന്തപുരം: സംസ്ഥാനത്ത് കോവിഡ്-19 വാക്സിനേഷന് അവസരം നുഷ്ടപ്പെട്ട ആരോഗ്യപ്രവര്ത്തകര്ക്ക് വീണ്ടും വാക്സിന് ലഭ്യമാക്കണമെന്ന് ആരോഗ്യമന്ത്രി കെ.കെ. ഷൈലജ. ഇക്കാര്യം ആവശ്യപ്പെട്ട് കേന്ദ്ര ആരോഗ്യ വകുപ്പ് മന്ത്രി ഡോ. ഹര്ഷവര്ധന് കത്തു നല്കിയിരിക്കുകയാണ്. അവസരം നഷ്ടപ്പെട്ട ആരോഗ്യ പ്രവര്ത്തകര്ക്ക് രജിസ്റ്റര് ചെയ്യാന് വീണ്ടും അവസരം നല്കുക, മൂന്നാമത്തെ മുന്ഗണനാ ഗ്രൂപ്പിന്റെ വാക്സിനേഷനായി കൂടുതല് കോവിഡ് വാക്സിന് അനുവദിക്കുക എന്നീ ആവശ്യങ്ങളാണ് പ്രധാനമായും കത്തില് ഉന്നയിച്ചിരിക്കുന്നത്.
സംസ്ഥാനത്തെ ഭൂരിഭാഗം ആരോഗ്യ പ്രവര്ത്തകരും രജിസ്റ്റര് ചെയ്തെങ്കിലും കുറച്ച് ആരോഗ്യ പ്രവര്ത്തകര്ക്ക് രജിസ്റ്റര് ചെയ്യാനുള്ള ടൈം ലൈന് നഷ്ടമായിരുന്നു. അവര്ക്ക് വീണ്ടും രജിസ്ട്രേഷന് ചെയ്യാനുള്ള അവസരം നല്കുന്നതിനോടൊപ്പം കൂടുതല് പേരിലേക്ക് വാക്സിന് എത്തിക്കുന്നതിനായാണ് ശ്രമമെന്നും മന്ത്രി വ്യക്തമാക്കുന്നു.
മൂന്നമത്തെ മുന്ഗണനാ വിഭാഗം 50 വയസ്സിന് മുകളില് പ്രായമായവരാണ്. ഈ വിഭാഗത്തില്പ്പെട്ടവര് ഏറ്റവും കൂടുതലുള്ളതും കേരളത്തിലാണ്. അതിനാല് പ്രായമുള്ളവരുടെ രജിസ്ട്രേഷനും വാക്സിനേഷനും സംബന്ധിച്ച് ആരോഗ്യ മന്ത്രാലയം എത്രയും വേഗം മാര്ഗനിര്ദേശം നല്കുകയും ഇവര്ക്ക് ആവശ്യമായ വാക്സിന് അധികമായി നല്കുകയും ചെയ്യണമെന്നും മന്ത്രി അഭ്യര്ത്ഥിച്ചു. എന്നാല് ആദ്യഘട്ടത്തില് ആരോഗ്യപ്രവര്ത്തകര്ക്കും രണ്ടാം ഘട്ടത്തില് പോലീൂസുകാര്ക്കും വാക്സിന് എത്തിക്കുമെന്നാണ് കേന്ദ്രം വ്യക്തമാക്കിയിരുന്നത്.
സംസ്ഥാനത്ത് ഇതുവരെ 3,36,327 ആരോഗ്യ പ്രവര്ത്തകരും (94%), 57,678 മുന്നണി പോരാളികളും (38%) ആണ് ആദ്യ ഘട്ടത്തിലെ ആദ്യ ഡോസ് വാക്സിന് സ്വീകരിച്ചത്. ഇതിനു പുറമെ 23,707 ആരോഗ്യ പ്രവര്ത്തകര് രണ്ടാം ഡോസ് വാക്സിന് എടുത്തിട്ടുണ്ട്. അതിനാല്തന്നെ മികച്ച പ്രതിരോധ പ്രവര്ത്തനമാണ് കേരളത്തില് നടത്താന് സാധിച്ചതെന്നും ആരോഗ്യമന്ത്രി കത്തില് വ്യക്തമാക്കുന്നു.
