ദക്ഷിണ കൊറിയൻ ടെക് ഭീമന്മാരായ എൽജി ഇന്ത്യയിൽ പുതിയ സ്മാർട്ട്ഫോൺ ശ്രേണി അവതരിപ്പിച്ചു. മിഡ്റേഞ്ച് സ്മാർട്ട്ഫോൺ ശ്രേണിയിൽ W41, W41+, W41 പ്രോ എന്നിങ്ങനെ 3 ഫോണുകളാണ് എൽജി അവതരിപ്പിച്ചിരിക്കുന്നത്. എൽജി W41 സീരീസ് ഫോണുകൾ തമ്മിൽ റാം കപ്പാസിറ്റിയിലാണ് വ്യത്യാസം.
ലേസർ ബ്ലൂ, മാജിക് ബ്ലൂ എന്നീ നിറങ്ങളിൽ എത്തിയിരിക്കുന്ന എൽജി W41 സീരീസ് ഫോണുകൾ എല്ലാ പ്രമുഖ സ്റ്റോറുകളിലും ലഭ്യമാണ്. 13,490 രൂപയാണ് 4 ജിബി റാമും + 64 ജിബി സ്റ്റോറേജുമുള്ള എൽജി W41-ന്റെ വില. 4 ജിബി റാം + 128 ജിബി സ്റ്റോറേജുള്ള എൽജി W41+ന് 14,490 രൂപയും 6 ജിബി റാം + 128 ജിബി സ്റ്റോറേജ് മോഡലായ W41 പ്രോയ്ക്ക് 15,490 രൂപയുമാണ് വില. എൽജി W41 സീരീസിൽ ഡ്യുവൽ സിം (നാനോ) ഫോണുകളാണ് ഉള്ളത്. 6.5 ഇഞ്ച് എച്ച്ഡി+ (720x1,600 പിക്സൽ) എച്ച്ഐഡി ഫുൾ വിഷൻ ഡിസ്പ്ലേയ്ക്ക് 20:9 ആണ് വീക്ഷണനുപാതം.
2.3GHz ഒക്ടാകോർ മീഡിയടെക് ഹീലിയോ G35 SoC പ്രോസസ്സർ ആണ് ഫോണുകൾക്ക്. സ്റ്റോക്ക് ആൻഡ്രോയിഡ് 10 ആണ് ഓപ്പറേറ്റിംഗ് സിസ്റ്റം. 5,000 എംഎഎച്ച് ബാറ്ററിയുള്ള ഫോണിന് റിയർ മൗണ്ടഡ് ഫിംഗർ പ്രിന്റ് സ്കാനറും നൽകിയിരിക്കുന്നു. 48 മെഗാപിക്സൽ പ്രൈമറി സെൻസറും, അൾട്രാ വൈഡ് ആംഗിൾ ലെൻസുള്ള 8 മെഗാപിക്സൽ സെക്കൻഡറി സെൻസറും ഉൾക്കൊള്ളുന്ന ക്വാഡ് റിയർ ക്യാമറ സംവിധാനമാണ് എൽജി W41 സീരീസിൽ ഒരുങ്ങുന്നത്. 2 മെഗാപിക്സൽ ഡെപ്ത് സെൻസറും 5 മെഗാപിക്സൽ മാക്രോ ഷൂട്ടറും ആണ് മറ്റുള്ള സെൻസറുകൾ. മൂന്ന് പതിപ്പുകൾക്കും 8 മെഗാപിക്സൽ സെൽഫി ക്യാമറയാണ് ലഭിക്കുന്നത്.
