ഉയര്ന്ന ഊര്ജശേഷിയുള്ള എക്സ്റേകള് ഉപയോഗിച്ച് അര്ബുദത്തിനെതിരെ നട ത്തുന്ന ചികിത്സാരീതിയാണ് റേഡിയേഷന് ചികിത്സ. സ്തനാര്ബുദ ചികിത്സയിലും ഇത് പ്രധാനഘടകമാണ്. ശസ്ത്രക്രിയ, കീമോതെറാപ്പി, ഹോര്മോണല് ചികിത്സകള്ക്കൊപ്പമാണ് റേഡിയേഷന് ചികിത്സയും നടത്തുന്നത്.
അര്ബുദം ഏത് ഘട്ടത്തിലാണ്, ഏതുതരം ശസ്ത്രക്രിയയാണ് നടത്തിയത്, രോഗിയുടെ പ്രായം എന്നതൊക്കെ കണക്കിലെടുത്താണ് അര്ബുദ ചികിത്സയില് റേഡിയേഷന് തെറാപ്പി ഉള്പ്പെടുത്തുന്നത്.
റേഡിയേഷന് ചികിത്സ ഉപയോഗിക്കുന്നത് എപ്പോള്
1. ശസ്ത്രക്രിയയിലൂടെ സ്തനങ്ങള് പൂര്ണമായും മുറിച്ചുനീക്കാതെ നടത്തുന്ന ചികിത്സാരീതിയില് മാസ്റ്റക്ടമിയിലൂടെ പൂര്ണമായും സ്തനങ്ങള് നീക്കം ചെയ്യുകയാണെങ്കില് പോലും മുഴയുടെ വലിപ്പം 5 സെന്റീമീറ്ററില് കൂടുതലായിരിക്കുകയും ഒന്നിലധികം നോഡുകള് കാണുകയും മറ്റ് അനുകൂലമല്ലാത്ത കാര്യങ്ങള് കാണുകയും ചെയ്യുകയാണെങ്കില്.
2. തലച്ചോറിലേക്കും അസ്ഥികളിലേക്കും മറ്റ് അവയവങ്ങളിലേക്കും അര്ബുദം പടര്ന്നിട്ടുണ്ടെങ്കില് ഇന്റേണല് റേഡിയേഷന് (ബ്രാക്കി തെറാപ്പി), എക്സ്റ്റേണല് ബീംറേഡിയേഷന് എന്നിങ്ങനെ രണ്ട് തരം റേഡിയേഷന് ചികിത്സയാണ് സ്തനാര്ബുദത്തിനായി ഉപയോഗിക്കുന്നത്. വളരെ കുറച്ച് സമയത്തേക്ക് സ്തനത്തിനുള്ളില് റേഡിയോ ആക്ടീവ് സ്രോതസുകള് കടത്തിയാണ് ബ്രാക്കി തെറാപ്പി നടത്തുന്നത്. പുറമെ നിന്നുള്ള ഉപകരണത്തില്നിന്ന് റേഡിയോവികിരണം കടത്തിവിട്ടാണ് എക്സ്റ്റേണല് ബീം റേഡിയേഷന് നടത്തുന്നത്.
വളരെ നേരത്തെ രോഗം കണ്ടെത്തുമ്പോഴാണ് ബ്രാക്കി തെറാപ്പി ഉപയോഗിക്കുന്നത്. ദിവസം രണ്ട് നേരം വീതം ഒരാഴ്ചയോ മറ്റോ ആയിരിക്കും ഈ ചികിത്സ സാധാരണ നല് കുന്നത്.
സാധാരണയായി ഉപയോഗിക്കുന്നത് പുറമെ നിന്നുള്ള റേഡിയേഷനാണ്്. ഇതിനായുള്ള ലീനിയര് ആക്സിലറേറ്ററുകള് ഇപ്പോള് കൂടുതലായി ലഭ്യമാണെങ്കിലും ഇപ്പോഴും ഇന്ത്യയില് മിക്കയിടത്തും കൊബാള്ട്ട് മെഷീനുകളാണ് ഉപയോഗിക്കുന്നത്.
ശസ്ത്രക്രിയയ്ക്ക് ശേഷമോ കീമോതെറാപ്പി നിര്ദേശിച്ചിട്ടുണ്ടെ ങ്കില് അത് പൂര്ത്തിയാക്കി ഏതാനും ആഴ്ചകള്ക്ക് ശേഷമോ ആയിരിക്കും റേഡിയേഷന് ചികിത്സ നടത്തുക. ചികിത്സ തുടങ്ങുന്നതിന് മുമ്പായി ഒരു സ്കാനിംഗ്, സിടി സ്കാന് എടുക്കും. ഏതൊക്കെ കോണുകളില്നിന്നാണ് രോഗിയുടെ ശരീരത്തിലേക്ക് റേഡിയേഷന് രശ്മികള് നല്കാന് കഴിയുന്നത്, എത്ര അളവില് നല്കണം എന്നതൊക്കെ മനസിലാക്കുന്നതിനാണ് ഇത്. ഇടത് വശത്തെ സ്തനത്തിലെ ചികിത്സയ്ക്ക് ബ്രത്ഹോള്ഡ് ടെക്നിക് ആണ് ഉപയോഗിക്കുന്നത്.
