തൃശൂര്: മൂന്നു ടേം പൂര്ത്തിയാക്കിയ മന്ത്രി വി.എസ്. സുനില്കുമാര് പാര്ലമെന്ററി രംഗത്തുനിന്ന് മാറിയതോടെ സംഘടനാ തലപ്പത്തേക്കെത്താന് സാധ്യത തെളിഞ്ഞു. ജില്ലാ സെക്രട്ടറി കെ.കെ. വത്സരാജ് കയ്പമംഗലത്ത് സ്ഥാനാര്ഥിയാകുന്നതോടെ സംഘടനാ ചുമതലയില്നിന്ന് ഒഴിയേണ്ടിവരും. പകരം അസി. സെക്രട്ടറി ടി.ആര്. രമേശ്കുമാറിന് ചുമതല നല്കാനാണ് സാധ്യത. തുടര്ന്ന് വി.എസ്. സുനില്കുമാര് നേതൃത്വം ഏറ്റെടുത്തേക്കും.
സി.പി.ഐയ്ക്ക് സ്വാധീനമുള്ള ജില്ലകളിലൊന്നായ തൃശൂരില് പാര്ട്ടി സംവിധാനത്തെ കെട്ടുറപ്പോടെ നിലനിര്ത്താന് പ്രാപ്തിയുള്ള നേതൃത്വം വേണമെന്ന അഭിപ്രായം ശക്തമാണ്. പാര്ട്ടിയുടെ ജനകീയമുഖമായ വി.എസ്. സുനില്കുമാറിന് ജില്ലാ തലപ്പത്തേക്ക് വഴിയൊരുക്കുന്ന പ്രധാനഘടകവും ഇതുതന്നെ. യുവജന- വിദ്യാര്ഥി സംഘടനകളുടെ സംസ്ഥാന സെക്രട്ടറി പദവി വഹിച്ച സുനില്കുമാര് മന്ത്രിയെന്ന നിലയിലും മികച്ച പ്രവര്ത്തനമാണ് കാഴ്ചവച്ചത്.
മൂന്ന് ടേം പൂര്ത്തിയാക്കിയ മന്ത്രി വി.എസ്. സുനില്കുമാറിന് വീണ്ടും അവസരം നല്കേണ്ടതില്ലെന്ന് സി.പി.ഐ. തൃശൂര് ജില്ലാ എക്സിക്യൂട്ടീവ് തീരുമാനിച്ചു. പകരം കയ്പമംഗലം എം.എല്.എ. ഇ.ടി. െടെസണെ തൃശൂരില് സ്ഥാനാര്ഥിയാക്കാനാണ് തീരുമാനം. സി.പി.ഐ. ജില്ലാ സെക്രട്ടറി കെ.കെ. വത്സരാജ് കയ്പമംഗലത്ത് സ്ഥാനാര്ഥിയാകും. അഞ്ചു മണ്ഡലങ്ങളിലാണ് മുന്നണി ധാരണപ്രകാരം സി.പി.ഐ. ജില്ലയില് മത്സരിക്കുന്നത്.
മറ്റിടങ്ങളില് സിറ്റിങ് എല്.എല്.എമാരെ നിലനിര്ത്തിയാണ് സാധ്യതാ പട്ടികയ്ക്ക് ജില്ലാ എക്സിക്യൂട്ടീവ് അംഗീകാരം നല്കിയത്. സംസ്ഥാന കമ്മിറ്റി പട്ടിക പരിശോധിച്ചശേഷം ഔദ്യോഗിക പ്രഖ്യാപനമുണ്ടാകും.ഒല്ലൂര് മണ്ഡലത്തില് ഗവ. ചീഫ് വിപ്പ് കെ. രാജന് വീണ്ടും മത്സരിക്കും. വി.ആര്. സുനില്കുമാര് (കൊടുങ്ങല്ലൂര്), ഗീതാ ഗോപി (നാട്ടിക) എന്നീ സിറ്റിങ് എല്.എല്.എമാര്ക്കും മാറ്റമുണ്ടാകില്ല. മെട്രോമാന് ഇ. ശ്രീധരന് അടക്കമുള്ളവരുടെ പേരുകളാണ് ബി.ജെ.പി. പരിഗണിക്കുന്നത്.
ഇക്കാര്യവും സംസ്ഥാന കമ്മിറ്റി പരിശോധിക്കും. അങ്ങനെയെങ്കില് സാധ്യതാ പട്ടികയില് ഉള്പ്പെട്ട പി. ബാലചന്ദ്രന് നറുക്ക് വീണേക്കും. കോണ്ഗ്രസ് സ്ഥാനാര്ഥിയായി കെ.പി.സി.സി. വൈസ് പ്രസിഡന്റ് പത്മജ വേണുഗോപാല് വന്നേക്കുമെന്നതിനാല് സാധ്യതാ പട്ടികയില് ഷീലാ വിജയകുമാറിനെയും ഉള്പ്പെടുത്തിയിട്ടുണ്ട്. കോണ്ഗ്രസിന്റെ കുത്തക മണ്ഡലമായ തൃശൂര് കഴിഞ്ഞ വര്ഷമാണ് വി.എസ്. സുനില്കുമാറിലൂടെ എല്.ഡി.എഫ്. പിടിച്ചെടുത്തത്. തദ്ദേശ തെരഞ്ഞെടുപ്പില് കോണ്ഗ്രസാണ് മണ്ഡലത്തില് മുന്നിലെത്തിയത്.
വത്സരാജിനെ തൃശൂരില് മത്സരിപ്പിക്കാനായിരുന്നു നേരത്തെ തീരുമാനിച്ചതെങ്കിലും സുരക്ഷിതമണ്ഡലമെന്ന നിലയില് കയ്പമംഗലത്തേക്ക് മാറ്റുകയായിരുന്നു. ജില്ലാ പഞ്ചായത്ത് അംഗമായിരിക്കെയാണ് ടൈസണ് കഴിഞ്ഞ തവണ നിയമസഭയിലേക്ക് മത്സരിച്ച് ജയിച്ചത്. സി.പി.എം. മത്സരിക്കുന്ന ഏഴ് സീറ്റിലേക്കും സ്ഥാനാര്ഥി നിര്ണയം പൂര്ത്തിയായിട്ടുണ്ട്.
