സ്ത്രീകളില് ഹൃദ്രോഗത്തിന്റെ തോത് വര്ധിച്ചുവരികയാണ്. ഇതിനു കാരണങ്ങള് പലതാണ്. എങ്കിലും ഭക്ഷണത്തിലും വ്യായാമത്തിലും ശ്രദ്ധിച്ചാല് ഹൃദ്രോഗത്തില് നിന്നും ഒരുപരിധിവരെ രക്ഷനേടാം.
മാനസികപിരിമുറുക്കം ഒഴിവാക്കുക
സ്ത്രീകള് വൈകാരിക പിരിമുറുക്കത്തില് വീണിരിക്കുന്ന കാലമാണിത്. ഓഫീസിലായാലും വീട്ടിലായാലും യാത്രാവേളകളിലായാലും സ്ത്രീകളുടെ പിരിമുറുക്കങ്ങള്ക്ക് യാതൊരു അയവുമില്ല. പുരുഷന്മാരേക്കാള് ഏതു കാര്യത്തിലും ഉത്ക്കണ്ഠാകുലരുമാണ് സ്ത്രീകള്. ദേഷ്യം, ഭയം, നിരാശ തുടങ്ങിയ വികാരങ്ങളിലേക്ക് പെട്ടെന്ന് വഴുതി വീഴുന്നതും വേദനിക്കുന്നതുമെല്ലാം സ്ത്രീകളാണ്. ഇങ്ങനെ വിവിധ പിരിമുറുക്കങ്ങളില്പെട്ടു പോകുമ്പോള് ശരീരത്തില് ജൈവപരമായ പല രാസപരിണാമങ്ങളും സംഭവിക്കുന്നു. വൈകാരികമായ പിരിമുറുക്കങ്ങളിലേക്കു പെട്ടെന്നു വീണുപോകുന്നവരാണു സ്ത്രീകള്. തുടര്ച്ചയായി പിരിമുറുക്കങ്ങള്ക്കും വൈകാരികക്ഷോഭങ്ങള്ക്കും അടിപ്പെടുന്ന സ്ത്രീകള് അവരുടെ ഹൃദയത്തെ ക്ഷീണിപ്പിക്കുകയും തകരാറിലാക്കുകയുമാണെന്ന കാര്യം ഓര്ക്കുക.
പിടിയിലൊതുക്കാം പിരിമുറുക്കം
പിരിമുറുക്കമുണ്ടാകുന്ന അവസരത്തില് ശരീരത്തിലെ എന്സോക്രൈന് ഗ്രന്ഥികള് കൂടുതല് ഹോര്മോണ് പുറപ്പെടുവിക്കുന്നു. ഇതിന്റെ ഫലമായി അഡ്രിനാലിന്, നോറഡ്രിനാലിന്, ഹിസ്റ്റമിന്, സിറോട്ടോണിന് തുടങ്ങിയ സുപ്രധാന ഹോര്മ്മോണുകള് അമിതമായി ശരീരത്തിലേക്ക് പ്രവഹിക്കുന്നു. ഇത് രക്തധമനികള് സങ്കോചിക്കാനിടയാക്കുകയും രക്തസമ്മര്ദ്ദം വര്ധിപ്പിക്കുകയും ചെയ്യും. ഹൃദയപേശികളിലേക്കുള്ള രക്തപ്രവാഹം കുറയുമ്പോള് നെഞ്ചു വേദനയോ ഹൃദയാഘാതമോ ഉണ്ടാകാനിടയാകുന്നു. പിരിമുറുക്കമുണ്ടാകുന്ന സന്ദര്ഭങ്ങളില് റിലാക്സേഷന് രീതികള് സ്വീകരിക്കാം. ഒന്നുമുതല് പത്തുവരെ എണ്ണുക, കണ്ണടച്ച് ശ്വാസോച്ഛ്വാസത്തില് ശ്രദ്ധ കേന്ദ്രീകരിക്കുക, പാട്ടു കേള്ക്കുക എന്നിവയൊക്കെ ഫലം ചെയ്യും. യോഗ, ധ്യാനം എന്നിവ പരിശീലിക്കുന്നതും പിരിമുറുക്കങ്ങളില്നിന്നും ആശ്വാസം ലഭിക്കാന് നല്ലതാണ്.
ഹൃദയത്തെ അറിഞ്ഞ് ഭക്ഷണം
പണ്ടൊക്കെ മാംസഭക്ഷണവും വിശിഷ്ടവിഭവങ്ങളും വല്ലപ്പോഴുമൊക്കെയുള്ള സന്തോഷങ്ങളായിരുന്നു, പ്രത്യേകിച്ച് സ്ത്രീകള്ക്ക്. പച്ചക്കറി വിഭവങ്ങളായിരുന്നു വീടുകളില് ഏറെയും ഉപയോഗിച്ചിരുന്നത്. പെട്ടെന്നാണ് ആരോഗ്യകരമായ ആ ഭക്ഷണക്രമം മാറിയത്. ചൈനീസ് വിഭവങ്ങളും ബര്ഗറും പിസയുമെല്ലാം നമ്മുടെ രുചിമുകുളങ്ങളെ കീഴടക്കിയത്. ജോലിക്കാരായ സ്ത്രീകള് ഏറെയും ഇങ്ങനെയുള്ള ഭക്ഷണങ്ങളെ ആശ്രയിച്ചു തുടങ്ങിയതും മാംസഭക്ഷണത്തിന്േറയും എണ്ണയില് വറുത്തെടുത്ത വിഭവങ്ങളുടെയും ഉപയോഗം കൂടുതലും ഗുരുതരമായ ആരോഗ്യപ്രശ്നങ്ങളാണ് ഉണ്ടാക്കുന്നത്.
ഹോട്ടല് വിഭവങ്ങള് പലതും എണ്ണയില് ആവര്ത്തിച്ചു പാകം ചെയ്യുന്നവയും സ്വാദിനായി കൃത്രിമ പദാര്ഥങ്ങള് ചേര്ത്തതുമായിരിക്കും. വ്യായാമം ഒട്ടുമില്ലാത്ത ജീവിതവും ഈ ഭക്ഷണരീതികളും സ്ത്രീകളുടെ ഹൃദ്രോരോഗികളുടെ എണ്ണം ഉയരുന്നതിന് കാരണമാകുന്നുവെന്ന് ഡോക്ടര്മാര് പറയുന്നു.
കൊളസ്ട്രോള് മുഖ്യ ശത്രു
കൊളസ്ട്രോളാണ് മുഖ്യമായും ഒരാളെ ഹൃദ്രോഗത്തിലേക്ക് നയിക്കുന്നത്. ആര്ത്തവവിരാമം വരെ സ്ത്രീകളുടെ ഹൃദയത്തെ ഈസ്ട്രജന് സംരക്ഷിച്ചു നിര്ത്തുന്നതിനാല് പുരുഷന്മാരേക്കാള് അപകടസാധ്യത കുറവാണെങ്കിലും ഈസ്ട്രജന്റെ ഉല്പാദനം കുറയുന്നതിനനുസരിച്ച് ഹൃദ്രോഗസാധ്യതയും വര്ധിക്കാം. അതിനാല് ഭക്ഷണനിയന്ത്രണവും മറ്റു കാര്യങ്ങളും അല്പം നേരത്തെയാക്കുന്നത് എന്തുകൊണ്ടും നന്നാണ്. അങ്ങനെയുള്ള ഭക്ഷണനിയന്ത്രണത്തിലൂടെ കൊളസ്ട്രോള് തടയുക മാത്രമല്ല, രക്തസമ്മര്ദ്ദം, പ്രമേഹം തുടങ്ങിയ അസുഖങ്ങളെ തടഞ്ഞുനിര്ത്തുന്നതിനും കഴിയും.
പൂരിത കൊഴുപ്പാണ് (എല്.ഡി.എല്) ഹൃദ്രോഗത്തിന് മുഖ്യകാരണം. അതിനാല് എല്.ഡി.എല് താരതമ്യേന കുറഞ്ഞ ഭക്ഷണവിഭവങ്ങള് തെരഞ്ഞെടുക്കാന് ഒരു പ്രത്യേക ശ്രദ്ധകൊടുക്കുന്നതു നന്നാണ്. ഇറച്ചി, മുട്ട, പാല് എന്നിവയില് ധാരാളം പ്രോട്ടീന് അടങ്ങിയിട്ടുണ്ടെങ്കിലും അതില് ധാരാളമായി കൊളസ്ട്രോള് അടങ്ങിയിട്ടുണ്ട്. ഇവ സ്ഥിരം കഴിക്കുന്നത് നല്ലതല്ല. കഴിക്കുമ്പോള് പാല്പ്പാട മാറ്റിയും ഇറച്ചി തൊലി കളഞ്ഞും എടുക്കാന് ശ്രദ്ധിക്കണം.
