റിയൽമി തങ്ങളുടെ സ്മാർട്ഫോണിന്റെ വില കുറച്ചു. ചൈനീസ് ടെക് കമ്പനിയായ ഷഓമി റെഡ്മി നോട്ട് 10S അവതരിപ്പിച്ചതിന് തൊട്ടുപിന്നാലെയാണ് റിയൽമിയുടെ ഈ നടപടി. എന്നാൽ, അല്പകാലത്തേക്കാണ് മാർച്ചിൽ വിപണിയിലെത്തിയ റിയൽമി 8ന്റെ വില 500 രൂപ കുറച്ചത്. വില കുറയ്ക്കുക വഴി റിയൽമി 8ന്റെ സ്വീകാര്യത റെഡ്മി നോട്ട് 10S-ന്റെ വരവിനു ശേഷവും നില നിർത്തുക എന്നതാണ് റിയൽമി ഉദ്ദേശിക്കുന്നത്. വില കുറച്ചതോടെ റിയൽമി 8-ന്റെ 4 ജിബി റാം + 128 ജിബി സ്റ്റോറേജ് പതിപ്പിന് 14,499 രൂപയായും, 6 ജിബി റാം + 128 ജിബി സ്റ്റോറേജ് മോഡലിന് 15,499 രൂപയായും ഏറ്റവും പ്രീമിയം പതിപ്പ് 8 ജിബി റാം + 128 ജിബി സ്റ്റോറേജ് മോഡലിന് 16,499 രൂപയായും കുറഞ്ഞു. അതെ സമയം റെഡ്മി നോട്ട് 10S-ന്റെ വില ആരംഭിക്കുന്നത് 14,999 രൂപ മുതലാണ്.
90.8 ശതമാനം സ്ക്രീൻ ടു ബോഡി റേഷ്യോ, 1,000 നിറ്റ്സ് പീക്ക് ബ്രൈറ്റ്നസ്, 180 ഹെർട്സ് ടച്ച് സാമ്പിൾ റേറ്റ് എന്നിവയുള്ള 6.4 ഇഞ്ച് ഫുൾ എച്ച്ഡി + (1,080x2,400 പിക്സൽ) സൂപ്പർ അമോലെഡ് ഡിസ്പ്ലേയാണ് റിയൽമി 8-ന്. സൈബർ ബ്ലാക്ക്, സൈബർ സിൽവർ എന്നിങ്ങനെ രണ്ട് നിറങ്ങളിൽ റിയൽമി 8 വാങ്ങാം. 8 ജിബി വരെ എൽപിഡിഡിആർ 4 എക്സ് റാമും 128 ജിബി വരെ യുഎഫ്എസ് 2.1 സ്റ്റോറേജും ഫോണിനുണ്ട്. ഓൺബോർഡ് മെമ്മറി മൈക്രോ എസ്ഡി കാർഡ് സ്ലോട്ട് വഴി വർദ്ധിപ്പിക്കാം. മാലി-ജി 76 എംസി 4 ജിപിയുവുമായി ചേർന്ന് പ്രവർത്തിക്കുന്ന ഒക്ടാകോർ മീഡിയടെക് ഹെലിയോ ജി95 SoC പ്രോസസ്സർ ആണ് സ്മാർട്ട്ഫോണിന്റെ കരുത്ത്.
30W ഡാർട്ട് ചാർജ് ഫാസ്റ്റ് ചാർജിങ് സപ്പോർട്ടുള്ള 5,000 എംഎഎച്ച് ബാറ്ററിയാണ് റിയൽമി 8ന്. 64 മെഗാപിക്സൽ പ്രൈമറി സെൻസർ (എഫ് / 1.79 ലെൻസ്), 19-ഡിഗ്രി ഫീൽഡ്-ഓഫ്-വ്യൂ ഉള്ള 8 മെഗാപിക്സൽ സെൻസറും അൾട്രാ വൈഡ് ആംഗിൾ എഫ് / 2.25 ലെൻസും, എഫ് / 2.4 അപ്പേർച്ചറുള്ള 2 മെഗാപിക്സൽ മാക്രോ ഷൂട്ടർ, എഫ് / 2.4 അപ്പേർച്ചറുള്ള 2 മെഗാപിക്സൽ ബ്ലാക്ക് ആൻഡ് വൈറ്റ് സെൻസർ എന്നിവ ചേർന്ന ക്വാഡ് ക്യാമെറായാണ് റിയൽമി 8ൽ നൽകിയിരിക്കുന്നത്. സെൽഫി, വീഡിയോ കോളിങ് എന്നിവയ്ക്കായി 16 മെഗാപിക്സൽ സോണി ഐഎംഎക്സ് 471 (എഫ് / 2.45 അപ്പേർച്ചർ) ലെൻസാണ് ഉള്ളത്. ഡ്യുവൽ-ബാൻഡ് വൈ-ഫൈ, 4 ജി, ബ്ലൂടൂത്ത് വി 5.0, ജിപിഎസ്, 3.5 എംഎം ഹെഡ്ഫോൺ ജാക്ക്, യുഎസ്ബി ടൈപ്പ്-സി പോർട്ട് എന്നിവയാണ് കണക്ടിവ്റ്റി ഓപ്ഷനുകൾ.
