പ്രമുഖ സ്മാർട്ട്ഫോൺ നിർമ്മാതാക്കളായ ഷഓമി തങ്ങളുടെ റെഡ്മി നോട്ട് 10 പ്രോ പതിപ്പിന്റെ വില വർദ്ധിപ്പിച്ചിരിക്കുന്നു. മിഡ് വേരിയന്റായ 6 ജിബി റാം + 128 ജിബി സ്റ്റോറേജ് പതിപ്പിന്റെ വില മാത്രമേ കൂട്ടിയിട്ടുള്ളൂ എന്നാണ് റിപ്പോർട്ട്. ഈ പതിപ്പിന്റെ ലോഞ്ച് വില 16,999 രൂപയായിരുന്നു. 500 രൂപ കൂടി 17,499 രൂപയാണ് പുതിയ വില.
6 ജിബി റാം + 64 ജിബി സ്റ്റോറേജ് പതിപ്പിന്റെ വില 15,999 രൂപയായും, 8 ജിബി റാം + 128 ജിബി സ്റ്റോറേജ് പതിപ്പിന്റെ വില 18,999 രൂപയായും മാറ്റമില്ലാതെ തുടരുന്നുണ്ടെന്നാണ് സൂചന. ഡാർക്ക് നൈറ്റ്, ഗ്ലേഷ്യൽ ബ്ലൂ, വിന്റേജ് ബ്രോൺസ് എന്നിങ്ങനെ മൂന്ന് നിറങ്ങളിൽ റെഡ്മി നോട്ട് 10 പ്രോ ലഭ്യമാണ്. 6.67 ഇഞ്ച് ഫുൾ എച്ച്ഡി + സൂപ്പർ അമോലെഡ് ഡിസ്പ്ലേയാണ് പ്രോ പതിപ്പിന്. 100 ശതമാനം ഡിസിഐ-പി 3 വൈഡ് കളർ ഗാമറ്റ്, എച്ച്ഡിആർ -10 സപ്പോർട്ട്, ടിവി റൈൻലാൻഡ് ലോ ബ്ലൂ ലൈറ്റ് സർട്ടിഫിക്കേഷൻ എന്നിവ ഡിസ്പ്ലേയ്ക്കുണ്ട്. 1200 നിറ്റ് പീക്ക് ബ്രൈറ്റിനെസ്സുള്ള ഡിസ്പ്ലേയ്ക്ക് കോർണിംഗ് ഗോറില്ല ഗ്ലാസ് 5 പരിരക്ഷണമുണ്ട്.
ആൻഡ്രോയിഡ് 11 അടിസ്ഥാനമായ MIUI 12 ഓപ്പറെറ്റിംഗ് സിസ്റ്റത്തിലാണ് റെഡ്മി നോട്ട് 10 പ്രോ പ്രവർത്തിക്കുന്നത്. 64 മെഗാപിക്സൽ പ്രൈമറി സാംസങ് ഐസോസെൽ ജിഡബ്ല്യു 3 സെൻസർ, 5 മെഗാപിക്സൽ സൂപ്പർ മാക്രോ ഷൂട്ടറും (2x സൂം), 8 മെഗാപിക്സൽ അൾട്രാ-വൈഡ്- ആംഗിൾ ഷൂട്ടർ, 2 മെഗാപിക്സൽ ഡെപ്ത് സെൻസർ എന്നിവ ചേർന്ന ക്വാഡ് കാമറ സെറ്റപ്പാണ് ലഭിക്കുന്നത്. മുൻവശത്ത് 16 മെഗാപിക്സൽ സെൽഫി ക്യാമറയുമുണ്ട്. 33W ഫാസ്റ്റ് ചാർജിംഗ് പിന്തുണയുള്ള 5,020mAh ബാറ്ററിയുണ്ട്. 4ജി വോൾട്ട്, വൈ-ഫൈ, ബ്ലൂടൂത്ത്, ജിപിഎസ്/എ-ജിപിഎസ്, ഇൻഫ്രാറെഡ് (ഐആർ), യുഎസ്ബി ടൈപ്പ്-സി, 3.5 എംഎം ഹെഡ്ഫോൺ ജാക്ക് എന്നിവയാണ് കണക്ടിവിറ്റി ഓപ്ഷനുകൾ. മൈക്രോ എസ്ഡി കാർഡ് വഴി 512 ജിബി വരെ വർദ്ധിപ്പിക്കാവുന്ന 128 ജിബി വരെ യുഎഫ്എസ് 2.2 സ്റ്റോറേജ് ആണ് ഫോണിന്.
