കണ്ണൂര്: പാര്ട്ടിക്കായി സ്വന്തം വീടും സ്ഥലവും ദാനം ചെയ്യാന് തീരുമാനിച്ചെന്ന് മുഖ്യമന്ത്രിയുടെ വാക്സിന് ചലഞ്ചിലേക്ക് രണ്ട് ലക്ഷം രൂപ നല്കിയ കണ്ണൂരിലെ ബീഡിത്തൊഴിലാളി ജനാര്ദനന്.
20 ലക്ഷം രൂപ മക്കള്ക്ക് നല്കണം, ബാക്കി തുക മുഴുവന് ജനോപകരമായ കാര്യങ്ങള്ക്ക് വേണ്ടി പാര്ട്ടിക്ക് ഉപയോഗിക്കാം. വാക്സിന് ചലഞ്ചിലൂടെ കിട്ടിയ തുക കോവിഡ് പ്രതിരോധത്തിന് കരുതല് ധനമായി മാറ്റിവയ്ക്കണമെന്നും ജനാര്ദ്ദനന് മാധ്യമങ്ങളോട് പറഞ്ഞു. വാക്സിന് ചലഞ്ചിലേക്ക് രണ്ട് ലക്ഷം രൂപ നല്കിയ ജനാര്ദ്ദനനെ സത്യപ്രതിജ്ഞാ ചടങ്ങിലേക്ക് ക്ഷണിച്ചിരുന്നു. ദുരിതാശ്വാസ നിധിയിലേക്ക് ആകെയുള്ള സമ്പാദ്യമായിരുന്ന രണ്ട് ലക്ഷം രൂപയും സംഭാവന ചെയ്ത ജനാര്ദ്ദനെ മുഖ്യമന്ത്രിയാണ് സത്യപ്രതിജ്ഞാ ചടങ്ങിലേക്ക് ക്ഷണിച്ചത്.
പേരുപോലും പുറത്ത് അറിയിക്കാതെയായിരുന്നു വാക്സിന് ചലഞ്ചിനായി ജനാര്ദ്ദനന് പണം നല്കിയത്. അഞ്ച് പതിറ്റാണ്ട് കാലത്തെ അദ്ദേഹത്തിന്റെ അധ്വാനത്തില് മിച്ചം വന്നതായിരുന്നു 2,00,850 രൂപ. ഏപ്രില് അവസാനവാരം കണ്ണൂര് ടൗണിലെ ഒരു ബാങ്ക് ജീവനക്കാരന് ഫെയ്സ്ബുക്കിലെഴുതിയ കുറിപ്പിലൂടെയാണ് ജനാര്ദനന്റെ കഥ പുറംലോകമറിഞ്ഞത്. 35 വര്ഷത്തോളമായി ദിനേശിലെ തൊഴിലാളിയാണ് ജനാര്ദ്ദനന്. ആകെയുള്ള സമ്പാദ്യവും ഭാര്യയുടെയും തന്റെയും ഗ്രാറ്റുവിറ്റിയും ചേര്ന്ന തുകയായിരുന്നു അദ്ദേഹത്തിന്റെ അക്കൗണ്ടിലുണ്ടായിരുന്നത്. അതില്നിന്നാണ് രണ്ടുലക്ഷം രൂപ അദ്ദേഹം വാക്സിന് ചലഞ്ചിലേക്ക് സംഭാവന നല്കിയത്.
മുഖ്യമന്ത്രിക്ക് ശക്തമായ പിന്തുണ കൊടുക്കാനുള്ള നീക്കത്തിന്റെ ഭാഗമായിട്ടാണ് ഞാന് ഈ കാര്യം ചെയ്തത്. എനിക്ക് ജീവിക്കാന് ഇപ്പോള് യാതൊരു ബുദ്ധിമുട്ടും ഇല്ല. വികലാംഗ പെന്ഷന് കിട്ടുന്നുണ്ട്. കൂടാതെ ബീഡി തെറുപ്പും ഉണ്ട്. അതിനു ആഴ്ചയില് 1000 രൂപ വരെ കിട്ടാറുണ്ട്. എനിക്ക് ജീവിക്കാന് ഇതുതന്നെ ധാരാളം- അന്ന് ജനാര്ദനന്റെ വാക്കുകളാണിത്.
