മാഡ്രിഡ്: യൂറോപ്പിലെ മറ്റു കരുത്തന്മാരെല്ലാം വിജയവുമായി കുതിച്ചപ്പോള് ആദ്യ മത്സരത്തില് കരുത്തരായ സ്പെയിന് ഗോള്രഹിത സമനില. സ്പെയിന്റെ അറ്റാക്കിംഗ് ഫുട്ബോളിന് മികച്ച പ്രതിരോധ ഫുട്ബോളിന്റെ പാഠം പകര്ന്നു കൊടുത്ത് അവരെ സ്വീഡന് സമനിലയില് പിടിച്ചുകെട്ടി. കളിയില് ഉടനീളം അനേകം ചാന്സുകള് ഉണ്ടാക്കിയെടുത്തെങ്കിലും ഒരു തവണ പോലും സ്പെയിന് എതിരാളികളുടെ വല ചലിപ്പിക്കാനായില്ല.
കോവിഡ് പ്രതിസന്ധിയെ തുടര്ന്ന് 23 കളിക്കാരുമായാണ് സ്പെയിന് മത്സരത്തിനെത്തിയത്. സ്പെയിന്റെ ആക്രമണ ഫുട്ബോളിനെ പ്രതിരോധ ഫുട്ബോളിലൂടെയാണ് സ്വീഡന് പിടിച്ചു നിര്ത്തിയത്. 85 ശതമാനമായിരുന്നു സ്പെയിന്റെ ബോള് പൊസഷന്. 917 പാസ്സുകള് അവര് കളിയില് പൂര്ത്തിയാക്കി. ആദ്യ പകുതിയില് തന്നെ സ്പെയിന് 419 പാസുകള് ചെയ്തു. ആദ്യത്തെ പത്തു മിനിറ്റില് സ്വീഡിഷ് താരങ്ങള്ക്ക് പന്ത് കണി കാണാന് പോലും കിട്ടിയില്ല. തുടരെത്തുടരെ പാസുകള് സൃഷ്ടിച്ച് സ്പെയിന് സ്വീഡിഷ് ഗോള് മുഖത്ത് റെയ്ഡ് ചെയ്തപ്പോള് പുറകേ പുറകേ അലകളായെത്തി.
സ്പെയിന് ആക്രമണം നെയ്തെടുക്കുന്നതിനിടയില് കിട്ടിയ അവസരങ്ങളില് സ്വീഡന് ഉജ്വല മുന്നേറ്റങ്ങള് നടത്തിയപ്പോള് തടഞ്ഞുനിര്ത്തുക അവസരം കിട്ടുമ്പോള് കയറിയടിക്കുകയും ചെയ്യുക എന്ന സ്വീഡന്റെ തന്ത്രം ഫലം കണ്ടു. പലപ്പോഴും സ്വീഡന്റെ ഗോള്കീപ്പറുടെ ടൈമിംഗായിരുന്നു സ്കോര് ചെയ്യുന്നതില് നിന്നും സ്പെയിനെ തടഞ്ഞത്. 15 ശ്രമമാണ് സ്പെയിന് സ്വീഡിഷ് ഗോളിലേക്ക് തൊടുത്തത്. സ്വീഡന് നാലു തവണയും. അനേകം അവസരങ്ങള് മൊറാട്ട തുലച്ചപ്പോള് സ്വീഡന്റെ ഇസഹാക്കായിരുന്നു അവസരം തുലയ്ക്കാന് അവരുടെ ഭാഗത്ത് ഉണ്ടായിരുന്നത്. ഇരുവര്ക്കും പകരക്കാര് വന്നിട്ടും ഗോള്മുഖം തുറക്കാനായില്ല.
ഇന്നലെ നടന്ന മറ്റൊരു മത്സരത്തില് സ്ളോവാക്യ ഒന്നിനെതിരേ രണ്ടു ഗോളുകള്ക്ക് പോളണ്ടിനെ വീഴ്ത്തി വിജയം കുറിച്ചിരുന്നു. പോളണ്ട് ഗോളി സെന്സിനിയുടെ പിഴവില് നിന്നും കിട്ടിയ ഒന്നാം പകുതി ഗോളും സ്ക്രീനിയര് നേടിയ രണ്ടാം പകുതി ഗോളുമാണ് സ്ളോവാക്യയെ വിജയത്തിലേക്ക് നയിച്ചത്. ലിനേറ്റിയിലൂടെ പോളണ്ട് ആദ്യതവണ ഒപ്പമെത്തിയെങ്കിലും ക്രിചോവിയാക്ക് ചുവപ്പ് കാര്ഡ് കണ്ടു പുറത്തായത് പോളണ്ടിന് തിരിച്ചടിയായി. 62 ാം മിനിറ്റിലായിരുന്നു ക്രിചോവിയാക്ക് ചുവപ്പ് കാര്ഡ് വാങ്ങിയത്.
