ചൈനീസ് പ്രീമിയം സ്മാർട്ട്ഫോൺ നിർമ്മാതാക്കളായ ഷഓമി തങ്ങളുടെ പ്രീമിയം ശ്രേണിയായ എംഐ 11ൽ പുതിയ എംഐ 11 ലൈറ്റ് സ്മാർട്ട്ഫോൺ അവതരിപ്പിച്ചു. എംഐ 11 ലൈറ്റ് തത്കാലം 4ജി പതിപ്പിൽ മാത്രമേ ഇന്ത്യയിൽ ലഭ്യമാവൂ. അധികം താമസമില്ലാതെ എംഐ 11 ലൈറ്റ് 5ജി ഇന്ത്യയിലെത്തിക്കും എന്ന് ഷഓമി ഇന്ത്യ മേധാവി മനു കുമാർ ജെയിൻ വ്യക്തമാക്കി.
ഈ മാസം 25ന് പ്രീ ബുക്കിങ് ആരംഭിച്ച് 28 മുതലാണ് എംഐ 11 ലൈറ്റിന്റെ വില്പന ആരംഭിക്കുക.6 ജിബി റാം + 128 ജിബി സ്റ്റോറേജ് വേരിയന്റിന് 21,999 രൂപ, 8 ജിബി റാം + 128 ജിബി സ്റ്റോറേജ് പതിപ്പിന് 23,999 രൂപ എന്നിങ്ങനെയാണ് വില. റിപ്പോർട്ട് പ്രകാരം പ്രീ ഓർഡർ ചെയ്യുന്നവർക്ക് 1,500 രൂപ ഡിസ്കൗണ്ടിൽ എംഐ 11 ലൈറ്റ് വാങ്ങാം. കൂടാതെ, എച്ഡിഎഫ്സി ബാങ്ക് ക്രെഡിറ്റ് കാർഡ് ഉപയോഗിച്ച് എംഐ 11 ലൈറ്റ് വാങ്ങുമ്പോൾ 1,500 രൂപ ക്യാഷ്ബാക്ക് ഉണ്ട്. ഈ രണ്ട് ഓഫറുകളും ചേർത്ത് ഫോൺ വാങ്ങുമ്പോൾ 6 ജിബി റാം പതിപ്പ്18,999 രൂപയ്ക്കും 8 ജിബി റാം പതിപ്പ് 20,999 രൂപയ്ക്കും ലഭിക്കും.
ജാസ് ബ്ലൂ, ടസ്കാനി കോറൽ, വിനൈൽ ബ്ലാക്ക് എന്നിങ്ങനെ മൂന്ന് നിറങ്ങളിൽ ലഭ്യമാണ്. ഈ വർഷം ഇതുവരെ വില്പനക്കെത്തിയ എല്ലാ സ്മാർട്ട്ഫോണുകളെക്കാളും ഭാരവും എംഐ 11 ലൈറ്റിന് കുറവാണ്, 157 ഗ്രാം ഭാരം. എംഐ 11 ലൈറ്റിന്റെ പ്രത്യേകത ലോകത്തിലെ ഏറ്റവും കനം കുറഞ്ഞ 6.8 മില്ലിമീറ്ററാണ് വീതി എന്നാണ് ഷഓമിയുടെ വാദം. 6.55 ഇഞ്ച് ഫുൾ എച്ച്ഡി + (1,080x2,400 പിക്സൽ) അമോലെഡ് 10-ബിറ്റ് ഡിസ്പ്ലേ ആണ് ഫോണിന്. 20:9 ആസ്പെക്ട് റേഷ്യോയും 90Hz വരെ റിഫ്രഷ് റേറ്റുമുണ്ട് ഈ ഡിസ്പ്ലേയ്ക്ക്. 240Hz ടച്ച് സാംപ്ലിങ് റേറ്റ്, കോർണിങ് ഗൊറില്ല ഗ്ലാസ് 5 സംരക്ഷണം എന്നിവയാണ് മറ്റുള്ള ഫീച്ചറുകൾ.
ആൻഡ്രോയിഡ് 11 അടിസ്ഥാനമായ MIUI 12 ഓപ്പറേറ്റിംഗ് സിസ്റ്റം ആണ്. അഡ്രിനോ 618 ജിപിയു, 8 ജിബി വരെ എൽപിഡിഡിആർ 4 എക്സ് റാം എന്നിവയുമായി ചേർന്ന് പ്രവർത്തിക്കുന്ന ഒക്ടാകോർ ക്വാൽകോം സ്നാപ്ഡ്രാഗൺ 732 ജി SoC ആണ് ഫോണിന്റെ പ്രോസസ്സർ. എഫ് / 1.79 ലെൻസുള്ള 64 മെഗാപിക്സൽ പ്രൈമറി സെൻസർ, അൾട്രാ വൈഡ് ആംഗിൾ എഫ് / 2.2 ലെൻസുള്ള 8 മെഗാപിക്സൽ സെൻസർ (19 ഡിഗ്രി ഫീൽഡ് ഓഫ് വ്യൂ), 5 മെഗാപിക്സൽ ടെലെഫോട്ടോ ലെൻസ് എന്നിവയുള്ള ട്രിപ്പിൾ റിയർ ക്യാമറ സജ്ജീകരണമാണ് മി 11 ലൈറ്റിന്. സെൽഫികൾക്കും വീഡിയോ ചാറ്റുകൾക്കുമായി, എംഐ 11 ലൈറ്റിന്റെ മുൻവശത്ത് 16 മെഗാപിക്സൽ സെൽഫി ക്യാമറയാണ്. 33W ഫാസ്റ്റ് ചാർജിംഗിനെ പിന്തുണയ്ക്കുന്ന 4,250mAh ബാറ്ററി നൽകി.
