മ്യൂണിക്ക്: യൂറോയില് മരണഗ്രൂപ്പില് നടന്ന അവസാന മത്സരത്തില് ജര്മ്മനിക്കും പോര്ച്ചുഗലിനും സമനില. പോര്ച്ചുഗല് ഫ്രാന്സുമായി സമനില പിടിച്ചപ്പോള് കരുത്തരായ ജര്മ്മനിയെ ഹംഗറിയും സമനിലയില് കുരുക്കി. ഇതോടെ ലോകഫുട്ബോളിലെ കരുത്തരായ നാലു ടീമുകള് ഏറ്റുമുട്ടിയ ഗ്രൂപ്പ് എഫില് ഹംഗറി ക്വര്ട്ടര് കാണാതെ പുറത്തായി. രണ്ടു സമനിലയില് ഒരു ജയവുമായി ഫ്രാന്സാണ് ഗ്രൂപ്പില് ഒന്നാമന്മാരായത്.
ഏറ്റവും ശ്രദ്ധേയമായ മത്സരം ഫ്രാന്സും പോര്ച്ചുഗലും തമ്മിലുള്ളതായിരുന്നു. അന്താരാഷ്ട്ര ഫുട്ബോളില് ഏറ്റവും കൂടുതല് ഗോളുകള് നേടിയ താരത്തിലേക്ക് ക്രിസ്ത്യനോ റൊണാള്ഡോ ഉയര്ന്ന മത്സരത്തില് ഇരു ടൂമുകളും രണ്ടു ഗോള് വീതം നേടി. പോര്ച്ചുഗലിന്റെ രണ്ടുഗോളും ക്രിസ്ത്യാനോ പെനാല്റ്റിയില് നിന്നും നേടിയപ്പോള് ഫ്രാന്സിന്റെ രണ്ടുഗോളുകളും നേടിയത് കരിം ബെന്സേമയായിരുന്നു. ഒന്നാം പകുതിയില് ക്രിസ്ത്യാനോയുടെ പെനാല്റ്റി ഗോളില് മുന്നിലെത്തിയ പോര്ച്ചുഗലിനെ ഒന്നാം പകുതിയുടെ ഇഞ്ചുറി സമയത്ത് രണ്ടുമിനിറ്റിനിടെ നേടിയ ഇരട്ടഗോളില് ഫ്രാന്സ് പിന്നിലാക്കിയിരുന്നു.
കളിയുടെ 30 ാം മിനിറ്റില് ഫ്രഞ്ച് ഗോളി ലോറിസ് ഡാനിലോയെ ബോക്സില് ഫൗള് ചെയ്തതിന് കിട്ടിയ ആദ്യ പെനാല്റ്റി മുതലാക്കി ക്രിസ്ത്യാനോ പറങ്കികളെ മുന്നില് എത്തിച്ചു. കരിയറില് 108 ാം ഗോളായിരുന്നു ക്രിസ്ത്യാനോ നേടിയത്. എന്നാല് മറുവശത്ത് നെല്സണ് സെമഡോ കിലിയന് എംബാപ്പേയെ ബോക്സില് വീഴ്ത്തിയതിന് കിട്ടിയ പെനാല്റ്റി ഒന്നാം പകുതിയുടെ ഇഞ്ചുറിയില് ബെന്സേമ വലിയിലാക്കി. ഇടവേളയ്ക്ക് പോയി മടങ്ങി വന്ന ഫ്രഞ്ചുപട തൊട്ടു പിന്നാലെ രണ്ടാം ഗോളും നേടി. പോള് പോഗ്ബ നല്കിയ പാസ് ഗോളിലേക്ക് തിരിച്ചുവിട്ട് കരീം ബെന്സേമ തന്റെയും ടീമിന്റെയും രണ്ടാം ഗോളും നേടി.
ലീഡ് കൈവിട്ട് 13 മിനിറ്റിനകം ക്രിസ്ത്യാനോ വീണ്ടും പെനാല്റ്റിയിലൂടെ ഗോള് നേടി. ഇതോടെ ലോകത്ത് ഏറ്റവും കൂടുതല് ഗോള് നേടിയ പുരുഷ താരങ്ങളില് അലിദേയിയുടെ 109 ഗോളിനൊപ്പം എത്താനും താരത്തിനായി. 178 കളികളില് നിന്നുമാണ് ക്രിസ്ത്യാനോ ഈ നേട്ടം ഉണ്ടാക്കിയത്. മത്സരം സമനിലയില് ആയതോടെ ഗ്രൂപ്പില് ഒന്നാം സ്ഥാനക്കാരായി ഫ്രാന്സ് ആദ്യ 16 ല് എത്തിയപ്പോള് ജര്മ്മനി രണ്ടാം സ്ഥാനക്കാരായും പോര്ച്ചുഗല് മികച്ച മൂന്നാം സ്ഥാനക്കാരായും പ്രീക്വാര്ട്ടറിലേക്ക് കടന്നു.
ഹംഗറിക്കെതിരെ മികച്ച താരങ്ങള്ക്ക് വിശ്രമം നല്കി ഇറങ്ങിയ ജര്മ്മനി ഹംഗറിയോടാണ് സമനിലയില് കുടുങ്ങിയത്. ആദ്യം രണ്ടു തവണയും ഗോള് നേടിയത് ഹംഗറിയായിരുന്നു. 11 ാം മിനിറ്റില് സലായിലൂടെ മുന്നിലെത്തിയ ഹംഗറിയെ ഹാവെര്ട്സിന്റെ ഗോളിലാണ് ജര്മ്മനി ഒപ്പം പിടിച്ചത്. എന്നാല് 68 ാം മിനിറ്റി ഷഫറിലൂടെ ഹംഗറി വീണ്ടും മുന്നിലെത്തി. ഗോരേട്സ്ക്ക 84 ാം മിനിറ്റില് നേടിയ ഗോളില് വീണ്ടും ജര്മ്മനി ഒപ്പമെത്തി.
ഗ്രൂപ്പ് ഇ യില് നില പരുങ്ങലിലായിരുന്ന സ്പെയിന് ഒടുവില് ഗോളടി മികവ് കണ്ടെത്തിയതോടെ സ്ളോവാക്യയെ തകര്ത്ത് പ്രീ ക്വാര്ട്ടറില് എത്തി. ആദ്യ രണ്ടു മത്സരത്തിലും സമനിലയില് കുരുങ്ങിയ സ്പെയിന് ഇന്നലെ സ്ളോവാക്യയെ അഞ്ചു ഗോളുകള്ക്കാണ് മുക്കിയത്. തുടക്കവും ഒടുക്കവും സ്ളോവാക്യ തന്നെ ഗോളുകള് അടിച്ചു നല്കിയ സ്പെയിന് വേണ്ടി ലെപ്പോര്ട്ടയും സരാബിയയും ടോറസും ഗോളുകള് കുറിച്ചു. സ്ളോവാക്യയുടെ ഡുബ്രാവ്കയുടെ സെല്ഫ് ഗോളില് ആദ്യം മുന്നിലെത്തിയ സ്പെയിന് ഒന്നാം പകുതി പൂര്ത്തിയായപ്പോള് ലെപ്പോര്ട്ടയിലൂടെ ലീഡ് നേടി. രണ്ടാം പകുതിയില് സരാബിയയും ടോറസും ഗോള് നേടി.
71 ാം മിനിറ്റില് കുക്കയുടെ സെല്ഫ് ഗോളില് സ്പെയിന് വീണ്ടും കുരുങ്ങി. മറ്റൊരു മത്സരത്തില് സ്വീഡന് പോളണ്ടിനെ 3-2 ന് മറികടന്നു. ഫോര്സ്ബെര്ഗ് സ്വീഡനായി ഇരട്ടഗോളും ക്ലീസണ് മറ്റൊരു ഗോളും നേടിയപ്പോള് പോളണ്ടിന്റെ രണ്ടുഗോളുകളും ലെവന്ഡോവ്സ്ക്കിയുടെ വകയായിരുന്നു. ഏഴു പോയിന്റുമായി സ്വീഡന് മുന്നിലെത്തിയ ഗ്രൂപ്പില് അഞ്ചു പോയിന്റുമായി സ്പെയിന് രണ്ടാമന്മാരായി 16 ല് കടന്നു.
