ഈ വർഷം മാർച്ചിലാണ് ചൈനീസ് സ്മാർട്ട്ഫോൺ നിർമ്മാതാക്കളായ ഷഓമി പുത്തൻ റെഡ്മി നോട്ട് 10 ശ്രേണിയിലുള്ള ഫോണുകൾ ഇന്ത്യയിൽ അവതരിപ്പിച്ചത്. രണ്ട് മാസം തികയുമ്പോഴേക്കും ഏപ്രിലിൽ റെഡ്മി നോട്ട് 10ന്റെ വില ഷഓമി കൂട്ടി. 4 ജിബി റാം + 64 ജിബി സ്റ്റോറേജ് പതിപ്പിന് 11,999 രൂപ, 6 ജിബി റാം + 128 ജിബി സ്റ്റോറേജ് മോഡലിന് 13,999 രൂപ എന്നിങ്ങനെയായിരുന്ന ലോഞ്ച് സമയത്തെ വില. 500 രൂപ വർദ്ധിച്ചതോടെ യഥാക്രമം 12,499 രൂപയും 14,499 രൂപയുമായി സ്മാർട്ട്ഫോണിന്റെ വില.
രണ്ട് മാസം കൂടെ തികയുമ്പോൾ വീണ്ടും റെഡ്മി നോട്ട് 10ന്റെ വില ഷഓമി കൂട്ടി. 6 ജിബി റാം + 128 ജിബി സ്റ്റോറേജ് മോഡലിന്റെ വില മാത്രമാണ് ഇത്തവണ കൂട്ടിയത്. 500 രൂപ ആണ് വർദ്ധിപ്പിച്ചിരിക്കുന്നത്. 14,999 രൂപയാണ് പുതിയ വില. 4 ജിബി റാം + 64 ജിബി സ്റ്റോറേജ് പതിപ്പിന്റെ വില മാറ്റമില്ലാതെ 12,499 രൂപയിൽ തുടരുന്നു. അടിസ്ഥാന റെഡ്മി നോട്ട് 10 അക്വാ ഗ്രീൻ, ഫ്രോസ്റ്റ് വൈറ്റ്, ഷാഡോ ബ്ലാക്ക് എന്നീ നിറങ്ങളിൽ ലഭ്യമാണ്.
അഡ്രിനോ 612 ജിപിയുവുമായി ചേർന്ന് പ്രവർത്തിക്കുന്ന ക്വാൽകോം സ്നാപ്ഡ്രാഗൺ 678 SoC പ്രോസസ്സർ ആണ് റെഡ്മി നോട്ട് 10ന്റെ ഹൃദയം. ആൻഡ്രോയിഡ് 11 അടിസ്ഥാനമായ MIUI 12 ഓപ്പറെറ്റിംഗ് സിസ്റ്റത്തിൽ ആണ് പ്രവർത്തിക്കുന്നത്. 6.43 ഇഞ്ച് ഫുൾ എച്ച്ഡി + (1,080x2,400 പിക്സൽ) സൂപ്പർ അമോലെഡ് ഡിസ്പ്ലേയാണ് റെഡ്മി നോട്ട് 10-ന്. 20:9 ആസ്പെക്ട് റേഷ്യോ, 100 ശതമാനം ഡിസിഐ-പി 3 വൈഡ് കളർ ഗാമറ്റ്, 1100 നിറ്റ്സ് ബ്രൈറ്റ്നസ് എന്നിവ ഡിസ്പ്ലേയ്ക്കുണ്ട്. കോർണിംഗ് ഗോറില്ല ഗ്ലാസ് 3 പരിരക്ഷണവും ഈ ഡിസ്പ്ലേയ്ക്കുണ്ട്. 33W ഫാസ്റ്റ് ചാർജിംഗിനെ പിന്തുണയ്ക്കുന്ന 5,000 എംഎഎച്ച് ബാറ്ററിയാണ് ഫോണിന്.
അടിസ്ഥാന റെഡ്മി നോട്ട് 10-ൽ 48 മെഗാപിക്സൽ പ്രൈമറി സോണി ഐഎംഎക്സ് 582 സെൻസറും 8 മെഗാപിക്സൽ അൾട്രാ-വൈഡ് ആംഗിൾ ഷൂട്ടർ, 2 മെഗാപിക്സൽ മാക്രോ ഷൂട്ടർ, 2 മെഗാപിക്സൽ ഡെപ്ത് സെൻസർ എന്നിവ ചേർന്ന ക്വാഡ് ക്യാമെറായാണ് ഉള്ളത്. സെൽഫികൾക്കും വീഡിയോ ചാറ്റുകൾക്കുമായി, മുൻവശത്ത് 13 മെഗാപിക്സൽ സെൽഫി ക്യാമറയുമുണ്ട്.
