കൊല്ക്കത്ത: മമതയുടെ കൈകളില് നിന്ന് ബംഗാള് പിടിക്കാനുള്ള ബിജെപിയുടെ ശ്രമത്തിനിടെ എത്തിയവര് ഓരോന്നായും കൂട്ടമായും തിരികെ ത്രിണമുല് കോണ്ഗ്രസിലേക്ക് മടങ്ങുകയാണ്. ബംഗാള് നിയമസഭാ തിരഞ്ഞെടുപ്പിന് മുന്നോടിയായാണ് ബിജെപി തരംഗം പ്രതീഷിച്ച് ത്രിണമുല് കോണ്ഗ്രസില് നിന്ന് വന് കൊഴിഞ്ഞുപോക്ക് ഉണ്ടായത്. എന്നാല് ത്രിണമുല് കോണ്ഗ്രസ് അധ്യക്ഷ മമത ബാനര്ജി വീണ്ടും അധികാര കേന്ദ്രം ആയതോടെ ബിജെപിയില് നിന്ന് തിരികെ മടങ്ങുന്നവരുടെ എണ്ണം കൂടുകയാണ്.
2019 ലോക്സഭാ തിരഞ്ഞെടുപ്പിന് മുന്നോടിയായി പാര്ട്ടി വിട്ട ഉന്നത നേതാവ് മുകുള് റോയ് തിരികെ എത്തിയപ്പോള് ലഭിച്ച സ്വീകരണം അല്ല മറ്റ് പ്രവര്ത്തകര് പാര്ട്ടിയിലേക്ക് മടങ്ങിയെത്തിയപ്പോള് ഉണ്ടാകുന്നത്. തിരികെ സ്വീകരിക്കുന്നവരെ തീവ്ര പരീക്ഷണങ്ങള്ക്ക് വിധേയമാക്കുക വരെ ചെയ്യുന്നുണ്ട്.
ഹൂഗ്ലിയില് ത്രിണമുലിലേക്ക് മടങ്ങിയെത്തിയ ആറ് ബിജെപി പ്രവര്ത്തകരുടെ തല മുണ്ഡനം ചെയ്തു. ബിര്ഹും ജില്ലയില് മടങ്ങിയെത്തിയ 150 ഓളം ബിജെപി പ്രവര്ത്തകരെ ത്രിണമുല് പതാക കൈമാറുന്നതിന് മുമ്പായി സാനിറ്റൈസര് ഉപയോഗിച്ച് ശുദ്ധികലശം നടത്തി. മുകുള് റോയ്ക്ക് പുറമെ ത്രിണമുലില്േക്ക് മടങ്ങിയെത്താന് നിരവധി നേതാക്കള് താത്പര്യം പ്രകടിപ്പിച്ചിട്ടുണ്ട്. മുകുള് റോയിയെ തിരികെ സ്വീകരിച്ച ചടങ്ങില് കൂടുതല് പേര് മടങ്ങിയെത്തുമെന്ന് മമത ബാനര്ജി വ്യക്തമാക്കിയിരുന്നു.
