ഭോപ്പാല്: കോവിഡ് 19 ഡെല്റ്റ പ്ലസ് വകഭേദം മധ്യപ്രദേശില് രണ്ടു പേരുടെ ജീവനെടുത്തു. ഇതുവരെ ഏഴ് പേര്ക്കാണ് രോഗം സ്ഥിരീകരിച്ചത്. വാക്സിന് സ്വീകരിക്കാത്തവരാണ് മരിച്ചതെന്ന് ഡോക്ടര്മാര് പറയുന്നു.
ഒരു ഡോസോ രണ്ട് ഡോസോ വാക്സിന് സ്വീകരിച്ച മൂന്ന് പേര് രോഗമുക്തരായി. ഇവര് വീടുകളില് ഐസോലേഷനിലാണ് കഴിഞ്ഞിരുന്നത്. വാക്സിന് സ്വീകരിക്കാത്ത മറ്റ് രണ്ട് പേര് ചികിത്സയിലൂടെ രോഗമുക്തരായി. ഇവര് 22 വയസ്സുള്ള യുവതിയും രണ്ട് വയസ്സുള്ള കുട്ടിയുമാണ്.
രോഗം സ്ഥിരീകരിച്ചവരില് രണ്ട് മപര് ഉജ്ജൈന് സ്വദേശികളും ഭോപ്പാലില് നിന്നുള്ള മൂന്നു പേരും റെയ്സണ്, അശോക് നഗര് ജില്ലകളില് നിന്നുള്ള ഓരോരുത്തരുമാണ്.
അതിനിടെ, കോവിഡിന്റെ രണ്ടാം തരംഗത്തില് ഓക്സിജന് ക്ഷാമം ഡല്ഹി സര്ക്കാര് പെരുപ്പിച്ചു കാണിച്ചുവെന്ന വിമര്ശനം സുപ്രീം കോടതി നിയോഗിച്ച പാനല് ഉയര്ത്തി. രണ്ടാം തരംഗം ഏറ്റവും മൂര്ധന്യത്തിലെത്തിയ ഏപ്രില് 25-മേയ് 10 വരെയുള്ള നാളുകളില് ആവശ്യമുള്ളതിനേക്കാള് നാലിരട്ടി ആവശ്യമുണ്ടെന്ന് ഊതിപ്പെരുപ്പിച്ച കണക്ക് കാണിച്ചുവെന്ന് പാനല് നടത്തിയ ഓക്സിജന് ഓഡിറ്റില് പറയുന്നു. ഡല്ഹിക്ക് അധികമായി ഓക്സിജന് നല്കിയത് കോവിഡ് ഭീഷണി അധികമായിരുന്ന മറ്റ് 12 സംസ്ഥാനങ്ങളിലേക്കുള്ള ഓക്സിജന് വിതരണത്തെ ബാധിച്ചുവെന്നും പാനല് പറയുന്നു.
പ്രതിദിനം 1,140 മെട്രിക് ടണ് ഓക്സിജന് വേണമെന്ന ഡല്ഹി സര്ക്കാരിന്റെ ആവശ്യം ബെഡ് കപാസിറ്റി അനുസരിച്ചുള്ള ഓക്സിജന് ഉപഭോഗം കണക്കിലെത്താല് നാലിരട്ടിയോളമാണ്. 289 മെട്രിക് ടണ് ഓക്സിജന് ഉപഭോഗത്തിനുള്ള ബെഡ് കപാസിറ്റിയാണ് ഡല്ഹിക്കുള്ളത്.
തലസ്ഥാന നഗരമായ ഡല്ഹിക്ക് അധിക ഓക്സിജന് വിതരണം ചെയ്തുവെന്ന് പെട്രോളിയം ആന്റ് ഓക്സിജന് സേഫ്ടി ഓര്ഗനൈസേഷന് (പെസോ) റിപ്പോര്ട്ട് ചെയ്യുന്നു. അധികമായി നല്കിയ ലിക്വിഡ് മെഡിക്കല് ഓക്സിജന് മറ്റ് സംസ്ഥാനങ്ങള്ക്കുള്ള വിതരണത്തെ ബാധിച്ചു. ഡല്ഹിഅധിക ഓക്സിജന് സൂക്ഷിച്ചത് ദേശീയ പ്രതിസന്ധിയിലേക്ക് നയിച്ചുവെന്നും റിപ്പോര്ട്ടില് പറയുന്നു.
ഓക്സിജന് ക്ഷാമത്തില് ഡല്ഹി സര്ക്കാര് മുറവിളി ഉയര്ത്തിയതോടെയാണ് ജസ്റ്റീസ് ഡി.വൈ ചന്ദ്രചൂഢിന്റെ ബെഞ്ച് ഡല്ഹിക്ക് 700 മെട്രിക് ടണ് ഓക്സിന് വിതരണം ചെയ്യാന് കേന്ദ്രത്തിന് നിര്ദേശം നല്കിയത്. 415 മെട്രിക് ടണ് ഓക്സിജന്റെ ആവശ്യമേ ഡല്ഹിക്കുള്ളുവെന്ന് കേന്ദ്രത്തിന് വേണ്ടി ഹാജരായ സോളിസിറ്റര് ജനറല് തുഷാര് മേത്ത ചൂണ്ടിക്കാട്ടിയിരുന്നു.
