ശാസ്താംകോട്ട: വിസ്മയയുടെ ദുരൂഹമരണത്തില് ഭര്ത്താവ് കിരണ് കുമാറിനെതിരെ 90 ദിവസത്തിനകം കുറ്റപത്രം സമര്പ്പിക്കാനൊരുങ്ങി പൊലീസ്. കിരണിന് ജാമ്യം ലഭിക്കാനുള്ള സാധ്യത ഇല്ലാതാക്കാനാണ് പൊലീസ് നീക്കം.
കിരണിനെ ഇന്ന് പൊലീസ് കസ്റ്റഡിയില് വാങ്ങും.
കിരണ് റിമാന്ഡില് കഴിയുമ്പോള് തന്നെ വിചാരണ നടപടികള് പൂര്ത്തിയാക്കാനാണ് പൊലീസ് ശ്രമിക്കുന്നത്. പരമാവധി തെളിവുകള് കിരണിനെതിരെ ശേഖരിച്ച് കുറ്റപത്രം സമര്പ്പിക്കും.
ജാമ്യം ലഭിക്കുന്നതിന് മുമ്പ് കുറ്റപത്രം സമര്പ്പിച്ചില്ലെങ്കില് സസ്പെന്ഷന് അവസാനിച്ച് കിരണ് ജോലിയില് പ്രവേശിക്കാന് സാധ്യതയുണ്ടെന്നും തെളിവുകള് നശിപ്പിക്കാന് സാധ്യതയുണ്ടെന്നും പൊലീസ് കരുതുന്നു. അതുകൊണ്ടാണ് 90 ദിവസത്തിനകം കുറ്റപത്രം സമര്പ്പിക്കാനുള്ള പൊലീസിന്റെ നീക്കം.
പിന്നീട് കൂടുതല് തെളിവുകള് ലഭിക്കുന്ന മുറക്ക് കുടുംബാംഗങ്ങളെക്കൂടി പ്രതിചേര്ത്ത് അനുബന്ധ കുറ്റപത്രം സമര്പ്പിക്കും.
കീഴടങ്ങുന്നതിന് മുമ്പ് തന്നെ കിരണിന് നിയമസഹായം ലഭിച്ചിട്ടുള്ളതായി പൊലീസ് സംശയിക്കുന്നുണ്ട്. സാങ്കേതികമായി പരിജ്ഞാനമുള്ള കിരണ് വിസ്മയയുടെ ഫോണിലെ ഡിജിറ്റല് തെളിവുകള് പൂര്ണ്ണമായും മായ്ച്ച് കളഞ്ഞെന്നും പൊലീസ് സംശയിക്കുന്നുണ്ട്.
