രണ്ടുമാസം മുമ്പ് ഫേസ്ബുക്കിലെ പ്രശ്നം പരിഹരിച്ചതിലൂടെ അഞ്ചരലക്ഷം രൂപ സമ്മാനമായി ലഭിച്ച വനിതാഹാക്കറിന് ഇത്തവണ മൈക്രോസോഫ്റ്റിലെ വീഴ്ത പരിഹരിച്ചതിന് കിട്ടിയത് 22 ലക്ഷം. ഡല്ഹിക്കാരിയായ അദിതി സിംഗാണ് താരം. എത്തിക്കല് ഹാക്കിങ് വിദ്യ സ്വയം പരിശീലിച്ചെടുത്താണ് യുവതി അന്താരാഷ്ട്ര തലത്തിലെ വമ്പന് പിഴവുകള് ചൂണ്ടിക്കാട്ടിയത്.
മൈക്രോസോഫ്റ്റിന്റെ ക്ളൗഡ് പ്ലാറ്റ്ഫോമായ അസൂറിലെ റിമോട്ട് കോഡ് എക്സിക്യൂഷന് ബഗിനെയാണ് അദിതി പുതിയതായി കണ്ടെത്തി പരിഹരിച്ചത്. രണ്ട് മാസം മുമ്പ്, ഫേസ്ബുക്കില് താരതമ്യപ്പെടുത്താവുന്ന ആര് സി ഇ ബഗ് കണ്ടെത്തിയ 5.5 ലക്ഷം രൂപ സമ്മാനമായി ലഭിച്ചിരുന്നു. ബഗ് ഹണ്ടിംഗിലെ താല്പര്യമാണ് അദിതിയെ എത്തിക്കല് ഹാക്കിംഗില് വേറിട്ട് നിര്ത്തുന്നത്.
അദിതി ആദ്യം കണ്ടെത്തിയത് മാപ് മൈ ഇന്ത്യ എന്ന സ്ഥാപനത്തിലെ സുരക്ഷാ വീഴ്ചയാണ്. ഇത് സ്ഥാപനത്തിന്റെ ശ്രദ്ധയില്പെടുത്തിയ അദിതിയെ ബിരുദം ഇല്ലാതിരുന്നിട്ട് പോലും മാപ് മൈ ഇന്ത്യ ജോലിയിലേക്ക് ക്ഷണിക്കുകയായിരുന്നു. കമ്പ്യൂട്ടര് സയന്സുമായി ബന്ധപ്പെട്ട് മുന് പ്രാവീണ്യം ഇല്ലാത്ത അദിതി യൂട്യൂബിലൂടെയായിരുന്നു ജാവ സ്ക്രിപ്റ്റും മറ്റ് പ്രോഗ്രാമിംഗ് ഭാഷകളും പരിശീലിച്ചെടുത്തത്.
ഒരു വര്ഷം മുമ്പാണ് അദിതി ബഗ് ബൗണ്ടി ഹണ്ടിംഗ് ആരംഭിച്ചത്. മെഡിക്കല് പ്രവേശന പരീക്ഷയുടെ പരിശീലനത്തിനായി കോട്ടയിലെ സ്വകാര്യ സ്ഥാപനത്തിലെ പഠനമാണ് അദിതിയുടെ ജീവിതം മാറ്റിമറിച്ചത്. ഇതോടെ മെഡിക്കല് പഠനത്തില് നിന്ന് വഴി മാറി സൈബര് വിഭാഗത്തില് എത്തി. എന്നിരുന്നാലും സൈബര് സെക്യൂരിറ്റി അനലിസ്റ്റ് ആകണമെന്നല്ല തന്റെ ആഗ്രഹമെന്ന് അദിതി പറഞ്ഞു.
