'' ഗര്ഭധാരണവുമായി ബന്ധപ്പെട്ട് സ്ത്രീകള്ക്കുണ്ടാവുന്ന സംശയങ്ങള്ക്ക് മറുപടി. തെറ്റായ ധാരണകള് പലപ്പോഴും ഗര്ഭകാലം സംഘര്ഷഭരിതമാക്കാറുണ്ട്. ഈ സാഹചര്യം ഒഴിവാക്കാന് ഗര്ഭധാരണത്തെക്കുറിച്ചും പ്രസവത്തെക്കുറിച്ചുമുള്ള ശരിയായ അറിവ് സഹായിക്കും
ഗര്ഭിണി മൊബൈല് ഫോണ് ഉപയോഗിക്കാമോ?
1. 26 വയസ്. നാലു മാസം ഗര്ഭിണിയാണ്. ഗര്ഭിണികള് ടി. വി കാണുന്നതും കംപ്യൂട്ടര്, മൊബൈല് ഫോണ് ഇവ ഉപയോഗിക്കുന്നതുകൊണ്ടും കുഴപ്പമുണ്ടോ? ഇവയില് നിന്നുള്ള റേഡിയേഷന് ഏല്ക്കുന്നത് ഗര്ഭസ്ഥ ശിശുവിന് ദോഷം ചെയ്യുമോ? ഇത് ഒഴിവാക്കാന് കഴിയുമോ? ഗര്ഭിണി ചായയും കാപ്പിയും ഒഴിവാക്കണമോ?
--- ജിഷ സുദീപ് , കൊയിലാണ്ടി
ഗര്ഭിണികള് ടി.വി കാണുന്നതും കംപ്യൂട്ടര്, മൊബൈല് ഫോണ് ഇവ ഉപയോഗിക്കുന്നതുകൊണ്ടും കുഴപ്പമൊന്നുമില്ല. എന്നാല് അമിതമാകാതിരിക്കുന്നതാണ് നല്ലത്. ഇവയില്നിന്നുള്ള റേഡിയേഷന് അമ്മയേയോ കുഞ്ഞിനെയോ ബാധിക്കുന്നതായി ആധികാരിക പഠനങ്ങളൊന്നും തെളിയിച്ചിട്ടില്ല.
മാധ്യമങ്ങളില് പലപ്പോഴും ഇത്തരത്തിലുള്ള വാര്ത്തകള് കണ്ടുവരാറുണ്ട്. എന്നാല് ഇത്തരം റേഡിയേഷനെക്കുറിച്ചുള്ള സയന്റിഫിക് പഠനങ്ങളൊന്നും ഇതുവരെ നടന്നിട്ടില്ല. ഇവ ഉപയോഗിക്കുന്നതിലൂടെ ഒരു സാധാരണ സ്ത്രീക്കുണ്ടാകുന്ന പ്രശ്നങ്ങള് മാത്രമേ ഗര്ഭിണിക്കും ഉണ്ടാകുകയുള്ളൂ. ഗര്ഭിണികള് ചായയും കാപ്പിയും ഒഴിവാക്കേണ്ട കാര്യമില്ല. പക്ഷേ അമിത ഉപയോഗം വേണ്ട. കാപ്പിയില് അടങ്ങിയിരിക്കുന്ന കഫീന് കുഞ്ഞിനെയും കുഞ്ഞിന്റെ വളര്ച്ചയെയും നൂട്രീഷന്റെ പ്രവര്ത്തനങ്ങളെയും ബാധിച്ചേക്കാം. ഒരു ഗ്ലാസ് കാപ്പിയോ ചായയോ ഒരു ദിവസം കുടിക്കുന്നതുകൊണ്ട് കുഴപ്പമില്ല.
സിസേറിയനു ശേഷം
2. . എനിക്ക് 22 വയസ്. പ്രസവം കഴിഞ്ഞിട്ട് രണ്ടാഴ്ചയായി. സിസേറിയനായിരുന്നു. സിസേറിയന് കഴിഞ്ഞാല് എത്രനാള് വിശ്രമം ആവശ്യമാണ്. ഭാരം കൂടിയ ജോലികള് ചെയ്യാമോ?
--- അമ്പിളി ആര്.കെ , തൃശൂര്
സിസേറിയന് കഴിഞ്ഞ് 2-3 മാസത്തിനകം സാധാരണ ജീവിതത്തിലേക്ക് മടങ്ങിവരാം. സിസേറിയന് കഴിഞ്ഞവര്ക്ക് ഒന്നര - രണ്ട് മാസത്തിനുശേഷം ഒരു പരിശോധനകൂടി നടത്താറുണ്ട്. ഡോക്ടര് നിങ്ങളുടെ ശരീരവും ഗര്ഭപാത്രവും പരിശോധിച്ച് സാധാരണ നിലയിലായോയെന്ന് മനസിലാക്കുന്നു. അതിനുശേഷമാണ് ജോലി ചെയ്യുന്നതിനെക്കുറിച്ച് തീരുമാനിക്കുന്നത്. അതിനാല് ഈ പരിശോധനയ്ക്ക് നിര്ബന്ധമായും പോയിരിക്കണം. മൂന്നു മാസത്തിനുശേഷം ഭാരം കൂടിയ ജോലികള് ചെയ്യാവുന്നതാണ്.
ഹൃദ്രോഗവും ഗര്ഭധാരണവും
3. 19 വയസ്. ഞാന് മൂന്ന് മാസം ഗര്ഭിണിയാണ്. എനിക്ക് ഹൃദയസംബന്ധമായ പ്രശ്നമുണ്ട്. അതിനാല് സാധാരണ പ്രസവം സുരക്ഷിതമാണോ. അതോ സിസേറിയന് ആവശ്യമായി വരുമോ? കാര്ഡിയോളജിസ്റ്റിനെ വീണ്ടും കണ്ട് പരിശോധന നടത്തണമോ? മറ്റുള്ളവരെ അപേക്ഷിച്ച് കോംപ്ലിക്കേഷന്സ് കൂടുതലായിരിക്കുമോ എന്ന ഭയത്തിലാണു ഞാന്.
--- ശോഭിത നിസാര്, മലപ്പുറം
ഹൃദയത്തിന് പലതരത്തിലുള്ള അസുഖങ്ങള് ഉണ്ടാകാം. വളരെ ചെറിയ പ്രശ്നങ്ങള് മുതല് ഗുരുതരമായ പ്രശ്നങ്ങള്വരെ. ചെറിയ പ്രശ്നങ്ങള് ഒരു രീതിയിലും ഗര്ഭധാരണത്തെ ബാധിക്കുന്നില്ല. എന്നാല് ഗുരുതരമായ ഹൃദ്രോഗങ്ങള് അമ്മയുടെ ജീവനുതന്നെ ഭീക്ഷണിയാകാം. നിങ്ങളുടെ കത്തില് രോഗത്തെക്കുറിച്ച് വ്യക്തമായി പറഞ്ഞിട്ടില്ല. അതിനാല് വിശദമായ മറുപടി നല്കുക പ്രയാസമാണ്്. ഒരു കാര്ഡിയോളജിസ്റ്റിനെകണ്ട് എക്കോ ഉള്പ്പെടെയുള്ള എല്ലാ പരിശോധനകളും നടത്തി യഥാര്ഥ രോഗ കാരണം കണ്ടുപിടിക്കണം.
ചെറിയ പ്രശ്നങ്ങളെയുള്ളൂവെങ്കില് സാധാരണ പ്രസവം സാധ്യമാണ്. ഹൃദയത്തിന് ഗുരുതരമായ പ്രശ്നങ്ങള് ഉണ്ടെങ്കില് വിദഗ്ധ കാര്ഡിയോളജി സൗകര്യങ്ങളുള്ള ആശുപത്രി മാത്രം പ്രസവത്തിനായി തെരഞ്ഞെടുക്കുക. ഹൃദയസംബന്ധമായ ചില രോഗങ്ങള് അമ്മയുടെ ജീവനുതന്നെ ഭീക്ഷണിയായേക്കാം. അത്തരം സാഹചര്യത്തില് അബോര്ഷന് ഡോക്ടര്മാര് നിര്ദേശിക്കാറുണ്ട്. മറ്റു ചില ഗുരുതരമായ സാഹചര്യങ്ങളില് പ്രസവം കഴിഞ്ഞശേഷം അണുബാധ ഉണ്ടാകാതിരിക്കാനുള്ള കുത്തിവയ്പ്പുകള് അമ്മയ്ക്ക് എടുക്കാറുണ്ട്.
