പെട്രോള്- ഡീസല് വിലവര്ദ്ധന എല്ലാ ദിവസവും പ്രധാന വാര്ത്തയാണ്. ആര്ക്കും യാതൊരു നിയന്ത്രണവുമില്ലാതെ, കേന്ദ്ര- സംസ്ഥാന സര്ക്കാരുകള് പരസ്പരം പഴിചാരുന്നതിനിടയില് ഇന്ധനവില എല്ലാദിവസവും മുന്നോട്ടുതന്നെ. കോവിഡ് സൃഷ്ടിച്ച സാമ്പത്തിക ഞെരുക്കത്തില് പൊറുതിമുട്ടിയ ജനം സ്വാഭാവികമായും എവിടെയെങ്കിലും വിലക്കുറവുണ്ടെന്നറിഞ്ഞാല് അവിടേയ്ക്ക് ഓടിയെത്തും.
തമിഴ്നാട്ടില് ഡീസല് വിലയില് വലിയ വ്യത്യാസമുണ്ടെന്നൊരു തെറ്റായ പ്രചരണം സമൂഹമാധ്യമങ്ങളില് പരന്നതിനെത്തുടര്ന്നു ആളുകള് തമിഴ്നാട് അതിര്ത്തി പ്രദേശങ്ങളിലെ പമ്പുകളിലേക്കു കിലോ മീറ്ററുകളോളം വണ്ടിയുമായി ഓടിയെത്തി. എന്നാല് വാര്ത്തതെറ്റാണെന്നും വിലകളില് കാര്യമായ വ്യത്യാസമില്ലെന്നും അറിഞ്ഞ് നഷ്ടവുമായി തിരികെ മടങ്ങേണ്ടി വന്നു. എന്നാല് തമിഴ്നാട് വഴിയുളള യാത്രയില് പെട്രോള് വിലയില് നേരിയ ലാഭം ഉളളത്തിനാല് അതിര്ത്തി പമ്പുകളില് പെട്രോള് നിറയ്ക്കാന് ആളെത്തുന്നുണ്ട്.
കേരള- തമിഴ്നാട് അതിര്ത്തി പ്രദേശങ്ങളിലെ പമ്പുകളില് പെട്രോള് വിലയില് നേരിയ കുറവുണ്ട്. അതെസമയം ഡീസലിന് മാറ്റമൊന്നുമില്ല. പെട്രോളിനു വയനാട് ബത്തേരിയില് ഇന്നലെ 106.14 രൂപയും അടുത്ത അതിര്ത്തി പ്രദേശമായ തമിഴ്നാട് പന്തെല്ലൂരില് 103.84 രൂപയുമായിരുന്നു. ഡീസലിന് ഇന്നലെ ബത്തേരിയില് 99.63 രൂപയും പന്തെല്ലൂരില് 99.53 രൂപയും. പെട്രോളിനു രണ്ടര രൂപയുടെ വ്യത്യാസവൂം ഡീസലിനു പത്തു പൈസ വ്യത്യാസം മാത്രം .
സ്റ്റാലിന് അധികാരമേറ്റശേഷം നടന്ന ബജറ്റില് പെട്രോളിനും ഡീസലിനും മൂന്നുരൂപ കുറയ്കും എന്നു വാഗ്ദാനം ഉണ്ടായിരുന്നു. എന്നാല് കോവിഡ് സാഹചര്യത്തില് ഇത്തരം ഒരു സാമ്പത്തിക ബാധ്യത ഏറ്റെടുക്കാനാവില്ലെന്നാണ് തല്ക്കാലം തീരുമാനം.
