ന്യുഡല്ഹി: ഇന്ധന നികുതി ഇളവിനെ ചൊല്ലിയുള്ള തര്ക്കത്തിനിടെ കേരളമടക്കം പ്രതിപക്ഷ കക്ഷികള് ഭരിക്കുന്ന സംസ്ഥാനങ്ങളെ വെട്ടിലാക്കി കേന്ദ്ര പെട്രോളിയം മന്ത്രാലയത്തിന്റെ വിശദീകരണക്കുറിപ്പ്. സംസ്ഥാനങ്ങളും കേന്ദ്ര ഭരണ പ്രദേശങ്ങളുമടക്കം 22 സര്ക്കാരുകള് ഇന്ധന നികുതിയില് സ്വന്തം നിലയില് വാറ്റില് ഇളവ് നല്കാന് തയ്യാറായെങ്കിലും 13 സംസ്ഥാനങ്ങള് തയ്യാറായിട്ടില്ലെന്ന് കേന്ദ്രം വ്യക്തമാക്കുന്നു.
വാറ്റ് കുറയ്ക്കാന് തയ്യാറാകാത്ത മേഘാലയ അടക്കം 14 സംസ്ഥാനങ്ങളുടെ പട്ടികയാണ് കേന്ദ്രം പുറത്തുവിട്ടതെങ്കിലും തൊട്ടുപിന്നാലെ വാറ്റ് കുറയ്ക്കുമെന്ന് മേഘാലയ മുഖ്യമന്ത്രി വ്യക്തമാക്കി. അവശേഷിക്കുന്ന 13 സംസ്ഥാനങ്ങളല് മഹാരാഷ്ട്ര, ഡല്ഹി, പശ്ചിമ ബംഗാള്, തമിഴ്നാട്, കേരളം എന്നിവയാണ് വാറ്റ് കുറയ്ക്കാന് തയ്യാറാകാത്ത പ്രധാന സംസ്ഥാനങ്ങള്.
ഏറ്റവുമധികം വാറ്റ് കുറഞ്ഞിരിക്കുന്നത് കേന്ദ്ര ഭരണ പ്രദേശമായ ലഡാക്കാണ്. ഇവിടെ പെട്രോള് ലിറ്ററിന് 13.43 രൂപയും ഡീസല് ലിറ്ററിന് 19.61 രൂപയും കുറഞ്ഞു.. രണ്ടാമത് കര്ണാടകയാണ്. ബംഗലൂരു നഗരത്തില് പെട്രോളിന് 13.35 രൂപയും ഡീസലിന് 19.49 രൂപയുമാണ് കുറവ് വന്നിരിക്കുന്നത്. കേന്ദ്ര ഭരണ പ്രദേശമായ പുതുച്ചേരിയിലാണ് നികുതി ഇളവില് മൂന്നാമത്. പ്രതിപക്ഷ കക്ഷികള് ഭരിക്കുന്ന സംസ്ഥാനങ്ങള് വാറ്റ് കുറയ്ക്കാന് തയ്യാറായിട്ടില്ലെങ്കിലും മൂന്ന് രൂപ കുറവ് വരുത്തുമെന്ന് ഒഡീഷ ഇന്നലെ രാത്രി വ്യക്തമാക്കിയിരുന്നു.
ദീപാവലിക്ക് തലേന്ന് പെട്രോള്, ഡീസല് വിലയില് നികുതി ഇളവ് നല്കിയ കേന്ദ്ര സര്ക്കാര്, സംസ്ഥാന സര്ക്കാരുകളും വാറ്റ് കുറയ്ക്കുന്നത് പരിഗണിക്കണമെന്ന് നിര്ദേശിച്ചിരുന്നു.
