തിരുവനന്തപുരം: നികുതി ലാഭിക്കുന്നതിനായി തന്റെ ഓഡി കാര് കേന്ദ്രഭരണ പ്രദേശമായ പോണ്ടിച്ചേരിയില് രജിസ്റ്റര് ചെയ്തുവെന്ന വാര്ത്തയോട് പ്രതികരിച്ച് ബി.ജെ.പി എം.പി സുരേഷ് ഗോപി. സഹകരണ മേഖലയുമായി ബന്ധപ്പെട്ട വിവാദങ്ങളില് പരിഭ്രാന്തരായവരാണ് തനിക്കെതിരെ ആരോപണം ഉന്നയിക്കുന്നതെന്ന് സുരേഷ് ഗോപി പറഞ്ഞു.
നികുതി ഒഴിവാക്കാനല്ല താന് പോണ്ടിച്ചേരിയില് വാഹനം രജിസ്റ്റര് ചെയ്തത്. കൃത്യമായ തവണകള് അടച്ചു കൊണ്ടാണ് താന് മുന്നോട്ട് പോകുന്നത്. അത് ആര്ക്കും പരിശോധിക്കാം. വിമര്ശകര് അവരുടെ എം.എല്.എ ആയ മുകേഷിന്റെ വാഹന രജിസ്ട്രേഷനും നമ്പരും പരിശോധിക്കണം. മുകേഷിന്റെ വാഹനം എവിടെ നിന്ന് വാങ്ങി. എത്ര നികുതി കൊടുത്തു എന്നൊക്കെ അന്വേഷിക്കണം.
അല്ലാതെ വിവാദങ്ങളില് നിന്ന് രക്ഷപെടുന്നതിന് മറ്റൊരു വിവാദം ഉണ്ടാക്കരുതെന്നും സുരേഷ് ഗോപി പറഞ്ഞു. അഞ്ച് വര്ഷം മുന്പ് മറ്റൊരു ഓഡി ക്യു 7 പോണ്ടിച്ചേരിയില് നിന്ന് തന്നെയാണ് വാങ്ങിയത്. തനിക്ക് പോണ്ടിച്ചേരിയില് മേല്വിലാസം ഉണ്ടെന്നും സുരേഷ് ഗോപി പറഞ്ഞു.
