താന് നേരിട്ട ദുരനുഭവം തുറന്നു പറഞ്ഞ നടിയെ അഭിനന്ദിച്ച് സംവിധായിക അഞ്ജലി മേനോന്. അവള്ക്കൊപ്പം ഡബ്ല്യുസിസി ഇനിയും പോരാട്ടം തുടരുമെന്നും അവര് പറഞ്ഞു. ഒരു പ്രമുഖ മാധ്യമത്തിന് നല്കിയ അനുഭവത്തിലായിരുന്നു അഞ്ജലി മേനോന് തുറന്നു പറഞ്ഞത്.
‘അതിജീവിത ഒളിച്ചിരിക്കേണ്ട ആളല്ല. തുറന്നു പറഞ്ഞതിന് അവളെ അഭിനന്ദിക്കണം. അവളുടെ തുറന്നു പറച്ചിലുകള് സമൂഹം കേള്ക്കേണ്ടതാണ്. അക്രമത്തിന് ശേഷവും അതിജീവിത നേരിടുന്ന വെല്ലുവിളികളുണ്ട്. ആ യാത്രയാണ് അവരെ ഇരയില് നിന്നും അതിജീവിതയിലേക്ക് ആക്കുന്നത്. അവളുമായി അടുത്തു നില്ക്കുന്നവരാണ് എല്ലാവരും.
അവളുടെ സ്പിരിറ്റ് ഞങ്ങള് പലരും ഏറ്റെടുക്കുകയായിരന്നു. ഞാന് നേരിട്ട് കണ്ടിട്ടു പോലുമില്ല. പക്ഷേ സ്ത്രീയെന്ന നിലയ്ക്ക് നമുക്കുണ്ടാകുന്ന ഒരു എംപതിയില്ലേ. അതുകൊണ്ടുകൂടിയാണ് ആ യാത്രയില് ഒപ്പം നില്ക്കാന് പറ്റുന്നത്. ഏതൊരു സര്വൈവറുടെയും കൂടെ തന്നെ നില്ക്കണം. നമ്മളെ കൊണ്ട് പറ്റാവുന്ന തരത്തില് എന്ത് സപ്പോര്ട്ടും കൊടുക്കാം.
മോറല് സപ്പോര്ട്ട്, ഇമോഷണല് സപ്പോര്ട്ട് അങ്ങനെ അവര്ക്ക് വേണ്ട പലതുമുണ്ട്. എല്ലാവരെയും സന്തോഷിപ്പിച്ച് മുന്നോട്ട് പോകാനില്ല, നടിയുടെ പ്രശ്നങ്ങള് ഏറ്റെടുത്തപ്പോള് സൗഹൃദങ്ങള് നഷ്ടമായിട്ടുണ്ടെന്നും അധികാര കേന്ദ്രങ്ങളെ ചോദ്യം ചെയ്യുമ്പോള് ഒരു വിഭാഗം അസ്വസ്ഥരാകുമെന്നും അഞ്ജലി മേനോന് പറഞ്ഞു.
