പാറശാല: സമൂഹ മാധ്യമത്തിലൂടെ നടി മഞ്ജുവാര്യരെ അപമാനിച്ചുവെന്ന പരാതിയില് സംവിധായകന് സനല്കുമാര് ശശിധരനെ പോലീസ് അറസ്റ്റു ചെയ്തു. എളമക്കര പോലീസ് ആണ് പാറശാലയിലെത്തി അറസ്റ്റു ചെയ്തത്. വൈകിട്ടോടെ കൊച്ചിയിലേക്ക് എത്തിക്കുമെന്ന് കൊച്ചി സിറ്റി പോലീസ് കമ്മീഷണര് അറിയിച്ചു.
അറസ്റ്റ് സനല് കുമാര് തന്നെയാണ് ഫെയ്സ്ബുക്കിലൂടെ അറിയിച്ചത്. തന്നെ ആരൊക്കെയോ ചേര്ന്ന് പിടിച്ചുകൊണ്ടുപോകുന്നുവെന്നാണ് സനല് പറഞ്ഞത്. കേരളം ഭരിക്കുന്ന സര്ക്കാരിനും രാഷ്ട്രീയ കക്ഷിക്കും പങ്കുണ്ടെന്നും സനല് പറയുന്നു. തന്നെ ഒരു കാറില് പിന്തുടര്ന്നുവന്ന സംഘമാണ് പിടിച്ചുകൊണ്ടുപോകാന് ശ്രമിക്കുന്നത്. തന്നെ കൊല്ലാനുള്ള ശ്രമമാണ് നടക്കുന്നത്. എവിടെ വേണമെങ്കിലും പോകാന് തയ്യാറാണ്. അനുജത്തിക്കൊപ്പമാണ് താമസിക്കുന്നത്. കുടുംബത്തിനൊപ്പം ക്ഷേത്രത്തില് എത്തിയപ്പോഴാണ് പിടിച്ചുകൊണ്ടുപോകുന്നത്.
തനിക്ക് മരിക്കാന് പേടിയില്ല. മഞ്ജുവാര്യര് കേസ് കൊടുത്തുവെന്ന് പറയുന്നു. മഞ്ജുവാര്യരോ പോലീസോ ഇത് പറഞ്ഞിട്ടില്ല. ലൈവ് ഇടാന് ശ്രമിച്ചപ്പോള് ഫോണ് പിടിച്ചുപറിക്കാനും കാറിന്റെ കീ എടുക്കാനും ശ്രമിച്ചു.
തന്നെ പിടിച്ചുവച്ചയാളുടെ പേര് ചോദിക്കുമ്പോള് പോലീസ് ആണെന്നും പോലീസ് വരട്ടെ എന്നാണ് പറയുന്നതെന്നും സനല്കുമാര് പറയുന്നു. ഇത് നാട്ടിലെ അരാജകത്വത്തിന്റെ തെളിവാണ്. ഇന്ന് തനിക്കാണെങ്കില് നാളെ ആര്ക്കും സംഭവിക്കാം. അമ്മയും സഹോദരിയും തടഞ്ഞതുകൊണ്ടാണ് തന്നെ കൊണ്ടുപോകാന് കഴിയാത്തതെന്നും സനല്കുമാര് പറയുന്നു. പാറശാല പോലീസ് വരാന് കാത്തിരിക്കുകയാണെന്നും സനല്കുമാര് പറയുന്നു.
കസ്റ്റഡിയിലെടുത്തത് എളമക്കര പോലീസാണെന്നും നെയ്യാറ്റിന്കര ഡി.വൈ.എസ്.പിയുടെ ഓഫീസില് നിന്ന് അറിയിപ്പുണ്ടെന്നും പാറശാല എസ്.ഐ എത്തി സനല്കുമാറിനെ അറിയിച്ചു. എന്നാല് കേസ് രജിസ്റ്റര് ചെയ്താല് എഫ്ഐആര് നമ്പര് അറിയിക്കണമെന്ന് സനല്കുമാര് ആവശ്യപ്പെട്ടു. പോലീസ് പ്രൊട്ടക്ഷന് വേണമെന്നും ആവശ്യപ്പെട്ടു. കഴിഞ്ഞ രണ്ടു വര്ഷമായി തനിക്ക് വധഭീഷണിയുണ്ട്. കേരളത്തിലെ ഒരു സംഘം തന്നെ വധിക്കാന് ശ്രമിക്കുന്നുണ്ട്. രണ്ട് വര്ഷമായി താന് തമിഴ്നാട്ടില് സഹോദരിക്കൊപ്പമാണ് ഒളിവില് താമസിക്കുന്നതെന്നും സനല്കുമാര് പറഞ്ഞു.
തുടര്ന്ന് കാറില് നിന്നിറങ്ങിയ സനല്കുമാറിനെ പോലീസ് പിടിച്ച് പോലീസ് വാഹനത്തില് കയറ്റി. തന്നെ കൊല്ലാനാണ് കൊണ്ടുപോകുന്നതെന്നും ആരെങ്കിലും കൂടെ വരണമെന്നും സനല്കുമാര് ആവശ്യപ്പെട്ടു. ഒന്നും സംഭവിക്കില്ലെന്ന് പാറശാല പോലീസും പറയുന്നുണ്ട്. ഇതിനിടെ പോലീസ് വാഹനത്തില് കയറ്റിയ ശേഷം അറസ്റ്റു ചെയ്തായി അറിയിക്കുകയായിരുന്നു.
തന്നെ നിരന്തരം സമൂഹ മാധ്യമങ്ങളിലൂടെ അധിക്ഷേപിക്കുന്നുവെന്നും അപവാദ പ്രചാരണം നടത്തുന്നുവെന്നും ഭീഷണിപ്പെടുത്തുന്നുവെന്നും കാണിച്ചാണ് കഴിഞ്ഞ ദിവസം മഞ്ജുവാര്യര് നല്കിയ പരാതിയില് പറയുന്നത്. കൊച്ചി സിറ്റി പോലീസിന്റെ ഷാഡോ പോലീസും എളമക്കര പോലീസും സംയുക്തമായാണ് സനല്കുമാറിനെ പിടികൂടിയത്. മഞ്ജുവാര്യര് നായികയായി 'കയറ്റം' സിനിമയുടെ സംവിധായകനാണ് സനല്കുമാര് ശശിധരന്.
