ഭുവനേശ്വര്: ഒഡീഷയിലെ പ്രസിദ്ധമായ പുരി ജഗന്നാഥ് ക്ഷേത്രത്തില് രൂക്ഷമായ എലിശല്യം. ദൈനംദിന പൂജകള്ക്കും മറ്റ് മതപരമായ ചടങ്ങുകള്ക്കും തുരപ്പനെലികള് വലിയ പ്രശ്നമാണ് സൃഷ്ടിക്കുന്നത്.
ശ്രീകോവിലും മറ്റും കയറി മാളമുണ്ടാക്കിയിരിക്കുന്ന എലികള് വിഗ്രഹത്തിലെ വസ്ത്രങ്ങളും മറ്റും കേടുപാടുകള് വരുത്തുന്നതായും ടൈംസ് ഓഫ് ഇന്ത്യ പുറത്തുവിട്ട റിപ്പോര്ട്ടില് പറയുന്നു. ജഗന്നാഥന്, സഹോദരന് ബാലഭദ്രന്, സുഭദ്രാദേവി എന്നിവയാണ് ക്ഷേത്രത്തിലെ പ്രതിഷ്ഠകള്. പ്രതിഷ്ഠകള്ക്കും കേടുപാട് വരുത്തുന്നത് ആശങ്കയായിട്ടുണ്ട്.
ക്ഷേത്രത്തിലെ ശ്രീകോവിലിനുള്ളില് ക്ഷേത്രത്തിന്റെ ഘടനയെ പോലും തകര്ക്കുന്ന രീതിയിലാണ് തറയില് എലികള് മാളം ഉണ്ടാക്കിയിട്ടുണ്ട്. എലി കാരണം ദൈനംദിന ക്ഷേത്ര ചടങ്ങുകള് നിര്വ്വഹിക്കാന് പോലും സാധിക്കുന്നില്ലെന്ന് പുരോഹിതരും പറയുന്നു.
തറയിട്ടിരിക്കുന്ന കല്ലുകളുടെ ചെറിയ വിടവില് പോലും മാളമാണ്. കോവിഡിനെ തുടര്ന്ന് 2020 - 21 കാലത്ത് ക്ഷേത്രം മാസങ്ങളോളം അടച്ചിട്ടതോടെയാണ് എലിയും പാറ്റയും പെരുകിയത്.
എലിക്കെണി വെച്ച് പിടിച്ചെങ്കിലും അതിനെ കൊല്ലാതെ ക്ഷേത്രത്തില് നിന്നും ഏറെ അകലെ കൊണ്ടുപോയി കളയുകയായിരുന്നു. വലിയ ശല്യമായി മാറിയിട്ടുണ്ടെങ്കിലും എലിയെ കൊല്ലാനുള്ള കാര്യങ്ങളൊന്നും ക്ഷേത്രം അധികൃതര് ഇതുവരെ ചെയ്തിട്ടില്ല.
