കൊച്ചി/തിരുവനന്തപുരം: ഹൈക്കോടതി ജഡ്ജിമാരുടെ പേരില് കക്ഷികളില്നിന്നു ലക്ഷങ്ങള് കോഴ വാങ്ങിയെന്ന പരാതിയില് ഹൈക്കോടതി അഡ്വക്കേറ്റ് അസോസിയേഷന് പ്രസിഡന്റ് സൈബി ജോസ് കിടങ്ങൂരിനെതിരേ എറണാകുളം സെന്ട്രല് പോലീസ് എഫ്.ഐ.ആര്. രജിസ്റ്റര് ചെയ്ത് അന്വേഷണമാരംഭിച്ചു.
അഴിമതി നിരോധനനിയമം വകുപ്പ് 7(1), ഐ.പി.സി. 420 എന്നിവ പ്രകാരമാണു കേസ്. പ്രത്യേകസംഘത്തിനാണ് അന്വേഷണച്ചുമതല. സൈബി 72 ലക്ഷം കൈപ്പറ്റിയെന്നും ഒരു ജഡ്ജിയുടെ പേരില് മാത്രം 50 ലക്ഷം രൂപ വാങ്ങിയെന്നും നാല് അഭിഭാഷകര് വിജിലന്സ് വിഭാഗത്തിനു നല്കിയ മൊഴി. ഒരു സിനിമാ നിര്മാതാവിനെതിരേ എറണാകുളം സൗത്ത് പോലീസ് രജിസ്റ്റര് ചെയ്ത പീഡനക്കേസില് 25 ലക്ഷമാണു വാങ്ങിയത്. 15 ലക്ഷം ഫീസാണെന്നും ജഡ്ജിക്കു പണം കൊടുക്കേണ്ടതുണ്ടെന്നും സൈബി പറഞ്ഞതായാണു മൊഴി.
കോഴയാരോപണ വിവാദത്തില് അന്വേഷണമാവശ്യപ്പെട്ട് ഹൈക്കോടതി രജിസ്ട്രാര് സംസ്ഥാന പോലീസ് മേധാവിക്കു കത്ത് നല്കിയിരുന്നു. കൊച്ചി സിറ്റി പോലീസ് കമ്മിഷണര് നടത്തിയ പ്രാഥമികാന്വേഷണത്തില് പരാതി കഴമ്പുള്ളതാണെന്നു കണ്ടെത്തി. കേസെടുക്കാമെന്ന് അഡ്വക്കേറ്റ് ജനറലും സംസ്ഥാന പോലീസ് മേധാവിക്കുനിയമോപദേശം നല്കി. പ്രോസിക്യൂഷന്സ് ഡയറക്ടര് ജനറലും അന്വേഷണത്തെ അനുകൂലിച്ചു. അന്വേഷണ സംഘത്തിന് രൂപം നല്കി സംസ്ഥാന പോലീസ് മേധാവി അനില് കാന്ത് ഉത്തരവിട്ടു.
ക്രൈംബ്രാഞ്ച് മേധാവി എ.ഡി.ജി.പി: ഡോ. ദര്വേഷ് സാഹിബ് നേരിട്ട് മേല്നോട്ടം വഹിക്കുന്ന സംഘത്തിലെ അന്വേഷണ ഉദ്യോഗസ്ഥന് ക്രൈം ബ്രാഞ്ച് ആലപ്പുഴ യൂണിറ്റ് എസ്.പി: കെ.എസ്. സുദര്ശനാണ്.
എറണാകുളം ക്രൈംബ്രാഞ്ചിലെ ഡിറ്റക്ടീവ് ഇന്സ്പെക്ടര്മാരായ എ.എസ്. ശാന്തകുമാര്, സിബി ടോം, ഗ്രേഡ് എസ്.ഐമാരായ കലേഷ് കുമാര്, ജോഷി സി. ഏബ്രഹാം, ക്രൈംബ്രാഞ്ച് ആലപ്പുഴ യൂണിറ്റിലെ ഗ്രേഡ് എസ്.ഐമാരായ എസ്. അമൃതരാജ്, ജയ്മോന് പീറ്റര് എന്നിവരാണ് പ്രത്യേക അന്വേഷണ സംഘത്തിലുള്ളത്. അന്വേഷണം ക്രൈംബ്രാഞ്ചിന് കൈമാറുമെന്നു നേരത്തെ 'മംഗളം' റിപ്പോര്ട്ട് ചെയ്തിരുന്നു.
