ഉഡുപ്പി: കര്ണാടകയിലെ ബ്രഹ്മാവറിനടുത്ത് ടോള്പ്ലാസയില് ഫാസ്റ്റാഗ് റീചാര്ജ്ജ് ചെയ്തയാള്ക്ക് നഷ്ടമായത് 99,997 രൂപ. നെറ്റില് ഫാസ്റ്റാഗ് നമ്പര് തെരഞ്ഞ് കിട്ടിയ ഹെല്പ്പ്ലൈന് നമ്പറില് വിളിച്ചതോടെ ഫ്രാന്സിസ് പയസ് എന്നയാള്ക്കാണ് വന്തുക നഷ്ടമായത്.
ജനുവരി 29 ന് ഹെജ്മാഡി ടോള് പ്ലാസയില് ഉണ്ടായ സംഭവത്തില് ഉഡുപ്പിയിലെ സിഇഎന് പോലീസ് സ്റ്റേഷനില് ഇയാള് പരാതി നല്കി. തന്റെ കാറില് ബ്രഹ്മവരയില് നിന്നും മാംഗ്ളൂരിലേക്കുള്ള യാത്രയ്ക്കിടയില് ഹെജമാഡി ടോള്പ്ലാസ ക്രോസ് ചെയ്യുമ്പോഴാണ് തന്റെ ഫാസ്റ്റാഗില് ബാലന്സ് ഇല്ലെന്ന വിവരം ഫ്രാന്സിസ് അറിയുന്നത്. ഉടന് തന്നെ റീച്ചാര്ജ് ചെയ്യാന് ഹെല്പ്പ്ലൈന് നമ്പറിനായി നെറ്റില് തിരഞ്ഞു. ആദ്യം കിട്ടിയ മൊബൈല് ഹെല്പ്പ്ലൈന് നമ്പറിലേക്ക് വിളിക്കുകയും ചെയ്തു.
പേടിഎം ഫാസ്റ്റാഗിന്റെ പ്രതിനിധിയെന്ന് മറുവശത്ത് ഒരാള് പരിചയപ്പെടുത്തുകയും സംസാരിക്കുകയും സഹായം ഉറപ്പ് പറയുകയും ചെയ്തു. തുടര്ന്ന് ഒരു വണ്ടൈം പാസ്വേഡ് വരുമെന്നും അത് തന്നോട് പറയണമെന്നും അയാള് വ്യക്തമാക്കി. തുടര്ന്ന് അയാള് പറഞ്ഞത് അതുപോലെ അനുസരിച്ച ഫ്രാന്സിസിന് ഉടന് തന്റെ അക്കൗണ്ട് ബാലന്സില് 49,000 രൂപ നഷ്ടമായതായി സന്ദേശം വന്നു. പിന്നാലെ നാലു ട്രാന്സാക്ഷന് കൂടി നടന്നു. 19,999, 19,998, 9,999, 1000 എന്നിങ്ങനെ പണം നഷ്ടമായി. എല്ലാം കൂടി കൂട്ടിയെടുത്തപ്പോള് ആകെ നഷ്ടമായത് 99,997 രൂപ.
നെറ്റില് കിട്ടിയ കസ്റ്റമര് കെയര് നമ്പറിന് പകരം വ്യാജ നമ്പറിലേക്കാണ് ഫ്രാന്സിസ് വിളിച്ചത് എന്നാണ് പോലീസ് വ്യക്തമാക്കുന്നത്. ഇതിനെല്ലാം പുറമേ അയാള് തട്ടിപ്പുകാര് പറഞ്ഞത് പ്രകാരം ഫ്രാന്സിസ് ഒരു മൊബൈല് ആപ്പ് ഡൗണ്ലോഡ് ചെയ്യുകയും ഉണ്ടായി. പരാതിക്കാരന്റെ ബാങ്ക് അക്കൗണ്ടും പണക്കൈമാറ്റം നടത്തിയ നമ്പറും പരിശോധിക്കുകയാണ് ഉഡുപ്പി പോലീസ് ഇപ്പോള്.
