ഭോപ്പാല്: മദ്ധ്യപ്രദേശില് അസുഖം മാറാന് പിഞ്ചുകുഞ്ഞിനെ ഇരുമ്പ് ദണ്ഡുകൊണ്ട് പൊള്ളിച്ച് കൊലപ്പെടുത്തി. മന്ത്രവാദത്തിന്റെ ഭാഗമായി ദേഹമാസകലം പൊള്ളിച്ച മൂന്ന് മാസം പ്രായമുള്ള പെണ്കുഞ്ഞാണ് മരണത്തിന് ഇരയായത്. 50 ലധികം തവണയാണ് ഇരുമ്പ് കമ്പി പഴുപ്പിച്ച് ശരീരത്ത് പൊള്ളലേല്പ്പിച്ചത്. കുട്ടി പിന്നീട് ആശുപത്രിയില് ചികിത്സയില് കഴിയവേ മരണപ്പെട്ടു.
മദ്ധ്യപ്രദേശിലെ ഷാദോള് ജില്ലയിലെ ഗോത്രവര്ഗ്ഗ മേഖലയിലാണ് സംഭവം. ന്യൂമോണിയ ബാധിച്ച കുഞ്ഞിനെ ആശുപത്രിയില് കൊണ്ടുപോകുന്നതിന് പകരം മന്ത്രവാദിയുടെ അരികില് കൊണ്ടുപോകുകയായിരുന്നു. തുടര്ന്ന് മന്ത്രവാദി ഇരുമ്പ് ദണ്ഡ് ചൂടാക്കി കുഞ്ഞിന്റെ ദേഹമാസകലം പൊള്ളിക്കുകയായിരുന്നു. ശരീരം പൊള്ളലേറ്റതിനെ തുടര്ന്ന് കുഞ്ഞ് നിര്ത്താതെ കരഞ്ഞതോടെ സ്ഥലത്തെ അംഗന്വാഡി പ്രവര്ത്തകര് ഇടപെട്ടാണ് ആശുപത്രിയില് കൊണ്ടുപോയത്. തുടര്ന്ന് ചികിത്സയ്ക്കിടെ രണ്ടു ദിവസം കഴിഞ്ഞപ്പോള് തന്നെ കുഞ്ഞ് മരണപ്പെടുകയുമായിരുന്നു.
വലിയ ദുരാചാരങ്ങള് ഇപ്പോഴും തുടരുന്ന ഈ ഗ്രാമത്തില് ആള്ക്കാര് അസുഖം വരുമ്പോള് മന്ത്രവാദത്തെ ആശ്രയിക്കുകയാണ് പതിവ്. കുട്ടിയ്ക്ക് ശ്വാസോഛ്വാസം ബുദ്ധിമുട്ടായ സാഹചര്യത്തില് മാത്രമായിരുന്നു ആശുപത്രിയില് പോകാന് മാതാവ് തയ്യാറായത്. ആരോഗ്യം മോശമാകും മുമ്പ് ചികിത്സ നല്കിയിരുന്നെങ്കില് ചിലപ്പോള് കുട്ടി രക്ഷപ്പെടുമായിരുന്നു എന്നാണ് ഡോക്ടറും പറഞ്ഞത്. കുഞ്ഞിന്റെ സംസ്ക്കരിച്ച മൃതദേഹം തിരിച്ചെടുത്താണ് പോസ്റ്റുമാര്ട്ടം നടത്തിയത്. പ്രശ്നത്തില് ആരോഗ്യവകുപ്പ് ബോധവല്ക്കരണ പരിപാടികള്ക്ക് ഒരുങ്ങുകയാണ്.
