മുന് മുഖ്യമന്ത്രി ഉമ്മന്ചാണ്ടിയെ മുതിര്ന്ന നേതാക്കളായ എ.കെ ആന്റണിയും, എം.എം ഹസനും സന്ദര്ശിച്ചു. രാഷ്ട്രീയ കാര്യങ്ങള് ചര്ച്ച ചെയ്യാന് എത്തിയതാണെന്നു എ കെ ആന്റണി അറിയിച്ചു. ഉമ്മന് ചാണ്ടിക്കു മതിയായ ചികിത്സ ലഭിയ്ക്കുന്നില്ലന്നു വാര്ത്ത പ്രചരിച്ചിരുന്നതിനു തൊട്ടു പിന്നാലെയാണ് ഇവരുടെ സന്ദര്ശനം. താന് ഉമ്മന് ചാണ്ടിയെ കാണാന് വരാറുണ്ടെന്നു എ.കെ ആന്റണി പറഞ്ഞു. ഉമ്മന് ചാണ്ടിയുടെ ചികിത്സയ്ക്കു പാര്ട്ടിയുടെ പിന്തുണ ഉണ്ടാകുമെന്നു എം.എം ഹസന് അറിയിച്ചു.
എന്നാല് ഉമ്മന് ചാണ്ടിക്കു വേണ്ടത്ര ചികിത്സ നല്കാന് ഭാര്യയും, മൂത്ത മകളും, ചാണ്ടി ഉമ്മനും തയാറാകുന്നില്ലെന്നു ഉമ്മന് ചാണ്ടിയുടെ ഇളയ സഹോദരന് അലക്സ്.വി.ചാണ്ടി പറഞ്ഞു.ഉമ്മന് ചാണ്ടിക്കു മതിയായ ചികിത്സ നല്കാത്തതില് കുടുംബാംഗങ്ങള് ഉള്പ്പെടെ 42 പേര് ഒപ്പിട്ട പരാതി മുഖ്യമന്ത്രിയ്ക്കു കൊടുത്തിരുന്നു.
എന്നാല് ഇതിനെതിരെ പ്രതികരിച്ചു ഉമ്മന് ചാണ്ടിയും മകനും ലൈവ് വന്നിരുന്നു. തന്റെ കുടുംബത്തിനെതിരെ നടത്തുന്ന വ്യാജപ്രചരണങ്ങള് അവസാനിപ്പിയ്ക്കണം, ഇത് കേള്ക്കുന്ന തനിയ്ക്ക് അത്യധികം വേദന ഉണ്ടാക്കുന്നുണ്ടെന്നും അദ്ദേഹം ഫേസ്ബുക്കില് പോസ്റ്റ് ഇട്ടിരുന്നു.
ഫേസ്ബുക്ക് കുറിപ്പ്
'എന്റെ ആരോഗ്യനിലയെ സംബന്ധിച്ച് ചില കോണുകളില് നിന്ന് വസ്തുതാവിരുദ്ധവും തെറ്റിദ്ധാരണയുണ്ടാകുന്നതുമായ വാര്ത്തകള് പ്രസിദ്ധീകരിക്കുന്നതില് ഏറെ ഖേദം ഉണ്ട്. ആധുനിക വൈദ്യശാസ്ത്രത്തിന്റെ എല്ലാ സാധ്യതകളും ഉപയോഗപ്പെടുത്തിയാണ് എന്റെ കുടുംബവും, പാര്ട്ടിയും, ചികിത്സയുമായി മുന്നോട്ട് പോകുന്നത്. എന്റെ രോഗവും ചികിത്സയും സംബന്ധിച്ച് എനിക്കും കുടുംബത്തിനും വ്യക്തമായ ബോധ്യമുണ്ട്. അതുകൊണ്ട്, ഒരാള്ക്കെതിരെയും നടത്താന് പാടില്ലാത്ത വേദനിപ്പിക്കുന്ന പ്രചരണം അവസാനിപ്പിക്കണമെന്ന് സ്നേഹത്തോടെ അഭ്യര്ത്ഥിക്കുന്നു. ഇപ്പോള് നടക്കുന്ന ദുഷ്പ്രചരണം എനിക്കും കുടുംബാംഗങ്ങള്ക്കും വലിയ മാനസിക പ്രയാസമാണ് സൃഷ്ടിക്കുന്നത്.ഞാനിപ്പോഴും കര്മ്മമണ്ഡലത്തില് തന്നെ സജീവമായി ഉണ്ട്.
മരുന്ന് കഴിക്കുന്നതിന്റെ ക്ഷീണം എന്റെ ശരീരത്തെ അലട്ടുന്നുണ്ട്. മറിച്ചുള്ള പ്രചരണങ്ങള് അടിസ്ഥാന രഹിതമാണ്. ലോകത്തിലെ മികച്ച വൈദ്യശാസ്ത്രത്തിന്റെ നിര്ദ്ദേശാനുസരണമാണ് എന്റെ ചികിത്സ മുന്നോട്ട് പോകുന്നത്. അതുകൊണ്ട് ഇതിന് പിന്നില് അറിഞ്ഞോ, അറിയാതെയോ ഇടപെട്ടിട്ടുള്ളവര് ഇനിയെങ്കിലും ഇത്തരം പ്രചരണങ്ങളില് നിന്നും പിന്തിരിയണമെന്ന് അഭ്യര്ത്ഥിക്കുന്നു'
