ദില്ലി: സംഘടനാ മാറ്റങ്ങള്ക്ക് കോണ്ഗ്രസ്സ് ഒരുങ്ങുന്നതായി റിപ്പോര്ട്ട്. റായ്പൂരില് നടക്കുന്ന മൂന്ന് ദിവസം നീണ്ട് നില്കുന്ന പ്ലീനറി സമ്മേളനത്തിന് മുന്നോടിയായി പാര്ട്ടി ഖജനാവിനെ ശക്തമാക്കാനും, പ്രവര്ത്തകരും നേതാക്കളും തമ്മിലുള്ള ബന്ധം ദൃഡപ്പെടുത്താനുമുള്ള മാറ്റങ്ങള്ക്കാണ് പാര്ട്ടി ഒരുങ്ങുന്നത് . അംഗത്വ ഫീസില് ഗണ്യമായ വര്ധനവ് നടത്താനാണ് തീതുമാനം .
കോണ്ഗ്രസ് പ്രതിനിധികളുടെ അംഗത്വ ഫീസ് 1000 രൂപയാക്കി ഉയര്ത്തും . നേരത്തെ ഇത് 100 രൂപയായിരുന്നു. ഇതില് 400 രൂപ പാര്ട്ടിക്കും 300 രൂപ പാര്ട്ടിയുടെ പ്രസിധീകരണത്തിനുമായി മാറ്റിവയ്ക്കും. 3000 രൂപയാവും മുതിര്ന്ന എഐസിസി അംഗങ്ങളില് നിന്നും ഈടാക്കുക. പ്രതിവര്ഷം 1000 രൂപവീതം അഞ്ച് വര്ഷത്തേക്ക് പാര്ട്ടി വികസന ഫണ്ടായി വാങ്ങും.
തീരുമാനം ഫണ്ട് ക്ഷാമം നികത്താനും പ്രവര്ത്തകര്ക്ക് പാര്ട്ടിയോടുള്ള പ്രതിബദ്ധത വര്ധിപ്പിക്കാനാകുമെന്നാണ് പാര്ട്ടി നേതൃത്വം കരുതുന്നത്. അതേസമയം പ്രവര്ത്തക സമിതിയിലേക്ക് തിരഞ്ഞെടുപ്പ് വേണമെന്ന് ഒരുവിഭാഗം ആവശ്യപ്പെടുമ്പോള് മറ്റൊരു വിഭാഗം ശക്തമായ എതിര്പ്പ് പ്രകടിപ്പിക്കുകയാണ് . ഉന്നത നേതൃത്വത്തിന് തിരഞ്ഞെടുപ്പ് നടത്തണമെന്നാണ് നിലപാട്.
മുന് അധ്യക്ഷന്മാര്, മുന് പ്രധാനമന്ത്രി, ലോക്സഭാ-രാജ്യസഭാ പാര്ട്ടി നേതാവ്, പാര്ലമെന്ററി പാര്ട്ടി ചെയര്പേഴ്സണ് എന്നിവര് തിരഞ്ഞെടുക്കപ്പെടാതെ പ്രവര്ത്തകസമിതിയിലേക്ക് അംഗങ്ങളാകും . അതുകൊണ്ട് തന്നെ പ്രിയങ്കാ ഗാന്ധിക്കും സമിതിയിലേക്ക് നേരിട്ട് എത്താനാകില്ല. ഈ സാഹചര്യത്തില് പ്രിയങ്കയ്ക്ക് പരമാവധി വോട്ടുകള് നല്കി പ്രവര്ത്തകസമിതിയിലേക്ക് എത്തിക്കാനാണ് നേതാക്കളുടെ തീരുമാനം.
