ഗാന ചിത്രീകരണത്തിനിടെയുണ്ടായ അപകടത്തില് നിന്നും മകന് അമീന് തലനാരിഴയ്ക്ക് രക്ഷപെട്ട സംഭവത്തില് പ്രതികരണവുമായി സംഗീത സംവിധായകന് എ.ആര് റഹ്മാന്. ഇന്ത്യയുടെ ഷൂട്ടിങ് ലൊക്കേഷനുകളില് ലോകോത്തര നിലവാരമുളള സുരക്ഷാസംവിധാനങ്ങളൊരുക്കണമെന്നും എല്ലാവിധ ചിത്രീകരണ സ്ഥലങ്ങളിലും സുരക്ഷാമാനദണ്ഡങ്ങള് കൃത്യമായി പാലിക്കണമെന്നും അദ്ദേഹം ദേശീയമാധ്യമത്തിന് നല്കിയ അഭിമുഖത്തില് പറഞ്ഞു. മകന് പരിക്കുകളൊന്നും ഇല്ലെന്നും അത്ഭുതകരമായാണ് രക്ഷപെട്ടതെന്നും റഹ്മാന് കൂട്ടിച്ചേര്ത്തു.
‘എന്റെ മകനും അവന്റെ കൂടെയുണ്ടായിരുന്ന മറ്റുളളവരും ആ ദുരന്തത്തില് നിന്നും അത്ഭുതകരമായാണ് രക്ഷപെട്ടത്. അവനു പരുക്കുകളൊന്നുമില്ല. കലാകാരന്മാര് സിനിമ -സംഗീത വ്യവസായത്തെ വളര്ത്തിയെടുക്കുമ്പോള് അവര്ക്കുളള സുരക്ഷ കൂടി ഒരുക്കേണ്ടത് അത്യാവശ്യമാണ്. ഇന്ത്യന് ഷൂട്ടിങ് സെറ്റുകളില് ലോകോത്തര നിലവാരമുളള സുരക്ഷാ സംവിധാനങ്ങള് ഒരുക്കേണ്ടതുണ്ട്. സുരക്ഷയുടെ കാര്യത്തില് വലിയ മുന്നേറ്റമുണ്ടാാകണം. അമീനും സംഘത്തിനും അപകടം പറ്റിയപ്പോള് ഞങ്ങളെല്ലാവരും അക്ഷരാര്ഥത്തില് ഞെട്ടി. സംഭവത്തെക്കുറിച്ചുളള അന്വേഷണഫലത്തിനായി കാത്തിരിക്കുകയാണിപ്പോള് ’എആര് റഹ്മാന് പറഞ്ഞു.
കഴിഞ്ഞ ദിവസമാണ് അമീന്റെ ആല്ബം ചിത്രീകരണത്തിനിടെ അപകടമുണ്ടായത്. അമീന് ഗാനമാലപിക്കവെ വേദിക്കു മുകളില് സ്ഥാപിച്ചിരുന്ന കൂറ്റന് അലങ്കാരദീപം ഒന്നടങ്കം വേദിയിലേക്കു തകര്ന്നുവീഴുകയായിരുന്നു. തലനാരിഴയ്ക്കാണ് താനും സഗഘവും അപകടത്തില് നിന്ന് രക്ഷപെട്ടതെന്ന് അമീന് സമൂഹമാധ്യമങ്ങളിലൂടെ അറിയിച്ചു. അപകടത്തിന്റെ നടുക്കത്തില് നിന്നും ഇപ്പോഴും മുക്തമായിട്ടില്ലെന്നും അമീന് കുറിച്ചു.
