റിയാദ്: കഴിഞ്ഞമാസം തുര്ക്കിയിലും സിറിയയിലുമായി ഉണ്ടായ ശക്തിയേറിയ ഭൂചലനത്തില് എല്ലാം നഷ്ടപ്പെട്ടവര്ക്ക് ഫുട്ബോളിലെ സൂപ്പര്താരം ക്രിസ്ത്യാനോയുടെ സാന്ത്വനം എത്തുന്നു. 3,50000 ഡോളര് മൂല്യം വരുന്ന സാധനങ്ങളുമായി റൊണാള്ഡോയുടെ വിമാനം ദുരന്തഭൂമിയില് ഇറങ്ങും.
ആയിരങ്ങള് മരണപ്പെടുകയും വന് നാശനഷ്ടം സംഭവിക്കുകയും ചെയ്ത ഭൂകമ്പത്തിലെ ഇരകള്ക്കായി മരുന്നും ഭക്ഷ്യവസ്തുക്കളും പുതപ്പുകളും ടെന്റുകളുമൊക്കെ ഉള്പ്പെടുന്ന സാധനങ്ങളാണ് താരം കയറ്റി അയച്ചത്.
ഭൂകമ്പ ബാധിത പ്രദേശത്തേക്കുള്ള ജീവകാരുണ്യത്തിനായി പണം കണ്ടെത്തുന്നതിന് തന്റെ ഒപ്പിട്ട ജഴ്സി ലേലം ചെയ്യാന് ക്രിസ്റ്റ്യാനോ റൊണാള്ഡോ തുര്ക്കി ഫുട്ബോള് താരം മെറിഹ് ദെമിറാലിന് അനുവാദം നല്കിയത് നേരത്തെ വലിയ വാര്ത്തയായി മാറിയിരുന്നു.
ഇതിന് പിന്നാലെയാണ് താരത്തിന്റെ സ്വന്തം വകയായി സാധനസാമഗ്രികളുമായി തുര്ക്കിയിലേക്ക് വിമാനം പോയിരിക്കുന്നത്. ഭക്ഷണപ്പൊതികള്, പുതപ്പ്, ടെന്റുകള്, ബേബി ഫുഡ്, മരുന്ന്, പാല് എന്നിവയൊക്കെയാണ് വിമാനത്തിലുള്ളത്.
ഫുട്ബോളില് നിന്നും കിട്ടുന്ന തുകകളില് ഒരുഭാഗം ജീവകാരുണ്യ പ്രവര്ത്തനത്തിനായി ക്രിസ്ത്യാനോ വിനിയോഗിക്കുന്നുണ്ട്. കോവിഡ് കാലത്ത് ജന്മനാടായ പോര്ച്ചുഗലിലെ ആശുപത്രികള്ക്കു താരം ധനസഹായം നല്കിയിരുന്നു. പോര്ച്ചുഗലില് കാന്സര് സെന്റര് സ്ഥാപിക്കുന്നതിനായി 165,000 ഡോളര് സംഭാവന ചെയ്ത താരം നേരത്തേ ഒരു കുഞ്ഞിന് ശസ്ത്രക്രിയ നടത്തുന്നതിനായി 83,000 ഡോളര് നല്കിയതും വാര്ത്തയായിരുന്നു.
