ഡോള്ബി: ഇന്ത്യയ്ക്ക് ചരിത്രനേട്ടം കുറിച്ച് ഓസ്ക്കറിലും തിളങ്ങിയ 'നാട്ടു നാട്ടു' ഗാനത്തിന് അപൂര്വ്വതകള് ഏറെ. ഹോളിവുഡ് സിനിമകളോട് കിടപിടിക്കുന്ന ചിത്രീകരണത്തിലൂടെ ബാഹുബലിയില് നഷ്ടമായ നേട്ടം നാട്ടുനാട്ടുവിലൂടെ കീരവാണിയും രാജമൗലിയും നേടിയെടുക്കുകയാണ്.
ഓസ്ക്കറില് വന് തിളക്കം കൊയ്ത നാട്ടു...നാട്ടു പാട്ടിന്റെ നിര്മ്മാണത്തിനും ചിത്രീകരണത്തിനും മൊത്തം കാര്യങ്ങള്ക്കുമായി ആര്.ആര്.ആര്. സംവിധായകനും രാജമൗലിയും കൂട്ടരും എടുത്തത് 19 മാസമായിരുന്നു. സിനിമയ്ക്ക് വേണ്ടി 20 വിവിധ ട്യൂണുകളാണ് കീരവാണി ഇട്ടത്.
എല്ലാം മനോഹരമായതിനാല് ഒടുവില് വോട്ടിംഗ് നടത്തിയായിരുന്നു ഇപ്പോഴത്തെ നാട്ടു...നാട്ടു ട്യൂണ് സിനിമയിലേക്ക് എത്തിയത്. സംവിധായകന് രാജമൗലിയ്ക്ക് ഇഷ്ടമുള്ളത് തെരഞ്ഞെടുക്കട്ടെ എന്ന് കരുതി പാട്ടിനായി പലവിധ ട്യൂണുകള് കീരവാണി ഇട്ടത്. എന്നാല് സംവിധായകന് പോലും ഏറ്റവും മികച്ചത് തെരഞ്ഞെടുക്കല് അസാധ്യമായതോടെയാണ് ഏറ്റവും കൂടുതല് പേര്ക്ക് ഇഷ്ടപ്പെട്ട ട്യൂണ് സിനിമയില് ഉപയോഗിക്കാന് തീരുമാനിച്ചത്.
ഇന്ത്യന് ഗ്രാമങ്ങളിലെ നാടന്പാട്ടുകളുടെ പരമ്പരാഗത താളമായിരുന്നു കീരവാണി പാട്ടില് ചേര്ത്തത്. പാട്ടില് ദക്ഷിണേന്ത്യന് സംഗീതത്തിലെ എട്ടിലധികം താളമാണ് വിന്യസിപ്പിച്ചിരിക്കുന്നത്. കീരവാണിയുടെ ഈ സംഗീതം പാട്ടെഴുതാന് ചന്ദ്രബോസിനും നൃത്തം ഒരുക്കാന് പ്രേം രക്ഷിതിനും വെല്ലുവിളിയായി മാറുകയായിരുന്നു.
സൗഹൃദം എന്ന തീമില് നിന്നുകൊണ്ടായിരുന്നു ചന്ദ്രബോസിന് പാട്ട് എഴുതേണ്ടിയിരുന്നത്. പകുതി ദിവസം കൊണ്ട് പാട്ടിന്റെ 90 ശതമാനവും എഴുതാന് ചന്ദ്രബോസിനായി. എന്നാല് ബാക്കി 10 ശതമാനം എഴുതാന് ഏതാണ്ട് ഒന്നരവര്ഷമാണ് വേണ്ടി വന്നത്. പാട്ടിന്റെ നൃത്തച്ചുവടുകള് തീരുമാനിക്കുമ്പോള് നൃത്തസംവിധായകന് പ്രേം രക്ഷിതിനെയും ഈ ആശയക്കുഴപ്പം ബാധിച്ചു.
രണ്ടു നായകന്മാര് ഒരുമിച്ച് വെയ്ക്കുമ്പോള് ഏറ്റവും മനോഹരമായി തോന്നണം എന്നതായിരുന്നു രാജമൗലിയുടെ താല്പ്പര്യം. രക്ഷിത് പാട്ടില് മൊത്തമായി 110 ചുവടുകളാണ് കണ്ടെത്തിയത്. ഇന്ത്യന് സിനിമയിലെ തന്നെ ഏറ്റവും മികച്ച നര്ത്തകരുടെ കൂടെ പട്ടികയില് പെടുന്ന രാംചരണും ജൂനിയര് എന്ടിയാറും മത്സരിച്ച് ചുവടുകള് വെയ്ക്കുക കൂടിയായപ്പോള് മനോഹരമായി.
റഷ്യ ഉഗ്രന് യുദ്ധം നടത്തിക്കൊണ്ടിരിക്കുന്ന ഉക്രയിനിലെ കീവീല് പ്രസിഡന്റിന്റെ ഔദ്യോഗിക വസതിയായ മരിന്സ്കി പാലസില് 2021 ആഗസ്റ്റിലായിരുന്നു നാട്ടു...നാട്ടുവിന്റെ ഷൂട്ടിംഗ്. പാട്ടു ചിത്രീകരിക്കാന് 15 ദിവസമാണ് എടുത്തത്. 50 ഡാന്സര്മാരും 300 എക്സ്ട്രാ നടന്മാരാണ് പങ്കെടുത്തത്. ബ്രിട്ടീഷുകാരുമായി മത്സരിച്ച് ഇന്ത്യന് യുവാക്കള് നടത്തുന്ന രീതിയിലാണ് നൃത്തരംഗം.
കീരവാണിയുടെ മകന് കാലഭൈരവനും രാഹുല് സിപ്ലിഗഞ്ചും മത്സരിച്ച് പാടിയിട്ടുള്ള പാട്ട് 2021 നവംബര് 10 ന് പുറത്തുവന്ന പാട്ട് ഇതിനകം 17 ദശലക്ഷം തെലുങ്ക് പ്രേക്ഷകരാണ് പല മാധ്യമങ്ങളിലൂടെ കണ്ടതായി കണക്കാക്കപ്പെടുന്നത്. ഏറ്റവും കൂടുതല് ആള്ക്കാര് കണ്ടിട്ടുള്ള തെലുങ്ക് സംഗീതം കൂടിയാണ് നാട്ടുനാട്ടു. യൂട്യൂബിലൂടെ മാത്രം പല ഭാഷകളിലെ നാട്ടുനാട്ടു കണ്ട ആള്ക്കാരുടെ എണ്ണം 35 ദശലക്ഷമാണ്. കഴിഞ്ഞ ഫെബ്രുവരിയില് തന്നെ പാട്ടിന്റെ മൊത്തം പ്രേക്ഷകര് 200 ദശലക്ഷം കടന്നിരുന്നു.
