ഓസ്കാര് വേദിയില് മികച്ച ഡോക്യൂമെന്ററി ഷോര്ട്ടിനുള്ള പുരസ്കാരം ഇന്ത്യയില് നിന്ന് എത്തിയ ‘ദി എലിഫന്റ് വിസ്പേഴ്സി’ന് കിട്ടിയപ്പോള് ഇന്ത്യക്കാരെല്ലാം ഒരുപോലെ ആഘോഷിച്ചതാണ്. രഘു എന്ന ആനകുട്ടിയെ വളര്ത്തുന്ന ദമ്പതികളായ ബൊമ്മന്റെയും ബെല്ലിയുടെയും ജീവിതം ആസ്വാദകരിലേക്കെത്തിച്ചത് കാര്ത്തികി ഗോണ്സാല്വസ് എന്ന സംവിധായികയാണ്. ബൊമ്മനും ബെല്ലിയും ഓസ്കാറുമായി നില്ക്കുന്ന ചിത്രത്തിനായി കാത്തിരിക്കുകയായിരുന്നു സോഷ്യല് മീഡിയ. ഒടുവിലിതാ കാര്ത്തികി തന്റെ അക്കൗണ്ടിലൂടെ ആ ചിത്രം പങ്കുവച്ചിരിക്കുകയാണ്. ‘‘നമ്മള് പിരിഞ്ഞ് നിന്നിട്ട് ഇപ്പോള് നാലു മാസങ്ങളായി, വീട്ടില് തിരിച്ചെത്തിയ പോലൊരു ഫീല് ആണ് നിങ്ങളെ കാണുമ്പോള് തോന്നുന്നത്’’ കാര്ത്തികി സോഷ്യല് മീഡിയയില് കുറിച്ചു. ബൊമ്മനും ബെല്ലിയും ഓസ്കാറുമായി ചിരിച്ചു കൊണ്ട് നില്ക്കുന്ന ചിത്രം സോഷ്യല് മീഡിയ ഏറ്റെടുത്തിട്ടുണ്ട്. രഘുവിനും അമ്മുവിനുമൊപ്പമുള്ള ഒരു ചിത്രവും തങ്ങള് പ്രതീക്ഷിക്കുന്നു എന്നാണ് കമന്റ് ബോക്സില് നിറയുന്നത്.
രഘു, അമ്മു എന്ന രണ്ട് ആനകുട്ടികളെ വളര്ത്തുന്നതാണ് ഡോക്യൂമെന്ററിയുടെ പ്രമേയം. നെറ്റ്ഫ്ലിക്സില് റിലീസ് ചെയ്ത ഡോക്യൂമെന്ററി ലക്ഷകണക്കിന് ആളുകളാണ് കണ്ടത്. ലോകം മുഴുവനുള്ള ആസ്വാദകര് ഇവര് നാലു പേരും തമ്മിലുള്ള ആത്മബന്ധം കണ്ട് സന്തോഷിച്ചു. രഘുവിന്റെയും അമ്മുവിന്റെയും കുട്ടിക്കുറുമ്പിനൊപ്പം അവരെ തങ്ങളുടെ ജീവിതത്തിന്റെ ഭാഗമായി കണ്ട് പരിപാലിക്കുന്ന ബൊമ്മനും ബെല്ലിയും പ്രശംസ അര്ഹിച്ചതാണ്. ഓസ്കര് ലഭിച്ചതിനു പിന്നാലെ ഒടിടി പ്ലാറ്റ്ഫോമായ നെറ്റ്ഫ്ലിക്സ് ബൊമ്മനെയും ബെല്ലിയെയും അഭിനന്ദിച്ച് പോസ്റ്റുകള് നിറഞ്ഞിരുന്നു. ഇവര് ഓസ്കാര് പിടിച്ചു നില്ക്കുന്ന ഇതേ ചിത്രംനെറ്റ്ഫ്ലിക്സ് ഇന്സ്റ്റഗ്രാമിലൂടെ പങ്കുവച്ചിട്ടുണ്ട്.
