സ്ക്രാപ്പ് സാധനങ്ങള് ഉപയോഗിച്ച് പല സാധനങ്ങള് നിര്മിയ്ക്കാറുണ്ട്. സ്ക്രാപ്പ് മെറ്റല്സ് കൊണ്ട് നിര്മ്മിച്ച ഒരു ഭീമന് സൈക്കിളാണ് ഇപ്പോള് സോഷ്യല് മീഡിയയില് വൈറല് ആയിരിയ്ക്കുന്നത്. ഈ സൈക്കിള് ലോകത്തിലെ ഏറ്റവും വലിയ സൈക്കിള് എന്നാണറിയപ്പെടുന്നത്. ഈ സൈക്കിളിന്റെ ഭാരം 4,800 പൗണ്ട് ആണ്. അതായത് 2177.243 കിലോഗ്രാം.
ഈ സൈക്കിള് പൂര്ണ്ണമായും സ്ക്രാപ്പ് മെറ്റല്സ് ഉപയോഗിച്ചാണ് നിര്മ്മിച്ചിരിയ്ക്കുന്നത്. ഈ സൈക്കിളിന്റെ പേര് ക്ലീന് ജോഹന്ന എന്നാണ്. ഇതിനോടകം തന്നെ ഗിന്നസ് ബുക്ക് ഓഫ് റെക്കോര്ഡിന്റെ ദേശീയ പതിപ്പായ ജര്മ്മനിയിലെ റെക്കോര്ഡ് ഇന്സ്റ്റിറ്റ്യൂട്ടില് ഈ സൈക്കിള് ഇടം നേടിയിട്ടുണ്ട്. സാധാരണ ഹാച്ച്ബാക്ക് കാറിനേക്കാള് ഭാരമുണ്ട് ഈ സൈക്കിളിന്.
5 മീറ്റര് നീളവും 2 മീറ്റര് ഉയരവുമുണ്ട് സൈക്കിളിന്. ജര്മന് സ്വദേശിയായ സെബാസ്റ്റ്യന് ബ്യൂട്ടര് ആണ് ഇത് നിര്മ്മിച്ചത്. സാധാരണ സൈക്കിളുകള് കാലു കൊണ്ട് ചവിട്ടുകയല്ലേ, എന്നാല് ഇത് കാലുകൊണ്ട് ചവിട്ടുന്നതിന് പകരം െട്രക്കിന്റെ ഗിയര്ബോക്സ് ആണ് ഇ് ഓടിക്കാനായി ഘടിപ്പിച്ചിരിക്കുന്നത്. ക്ലീന് ജോഹന്നയ്ക്ക് 35 ഫോര്വേഡ് ഗിയറുകളും 7 റിവേഴ്സ് ഗിയറുകളുമുണ്ട്. ഒരാള്ക്ക് മാത്രമേ ഒരു പെഡലിലൂടെ ഇത് പ്രവര്ത്തിപ്പിയ്ക്കാന് സാധിയ്ക്കു. ഒരേസമയം ഏകദേശം 15 ടണ് ഭാരം താങ്ങാന് ഇതിന് കഴിയും.
സെബാസ്റ്റ്യന് ബ്യൂട്ടലര് മൂന്ന് വര്ഷം സമയമെടുത്താണ് തന്റെ വര്ക്ക്ഷോപ്പില് ഈ സൈക്കിള് നിര്മ്മിച്ചത്. കഴിഞ്ഞ മൂന്നു വര്ഷത്തിനിടയില് ഏകദേശം 2,500 മണിക്കൂറുകള് തന്റെ സൈക്കിള് നിര്മാണത്തിനായി ചെലവഴിച്ചു എന്നാണ് ഇദ്ദേഹം പറയുന്നത്. സൈക്കിളിന്റെ ശരാശരി വേഗത കൃത്യമായി ഇദ്ദേഹം വെളിപ്പെടുത്തിയിട്ടില്ല. എങ്കിലും 389 കിലോമീറ്റര് സഞ്ചരിക്കാന് ഒരു മാസത്തോളം സമയമെടുക്കുമെന്നാണ് ബ്യൂട്ടലര് പറയുന്നത്.
